ހޮނިހިރު ދުވަހު އެމެރިކާގެ ރައީސް ޑޮނަލްޑް ޓްރަމްޕް ޓެނެސީއަށް ކުރައްވާ ދަތުރުފުޅުގައި، ރައީސްގެ ރަސްމީ މަތިންދާބޯޓު "އެއA ފޯސް ވަން" ގައި ދަތުރުކުރުން އެމެރިކާގެ ބްރޯޑްކާސްޓަރު ސީއެންއެންއަށް މަނާކޮށްފި އެވެ.
މިއީ ބައެއް މީޑިއާތަކަށް ކުރިން ކުރި މަނާކުރުންތައް އުވާލަން ވައިޓް ހައުސްއަށް މަޖުބޫރުވުމާ ގުޅިގެން، އެ އިދާރާއާއި މީޑިއާތަކާ ދެމެދު އުފެދިފައިވާ ހަމަނުޖެހުންތަކުގެ ތެރެއިން އެޅި އެންމެ ފަހުގެ ފިޔަވަޅެވެ.
އެމެރިކަން ފުޓްބޯޅަ މެޗެއް ބައްލަވާލެއްވުމަށް ޓްރަމްޕް ޓެނެސީއަށް ކުރައްވާ މި ދަތުރުފުޅުގައި ސީއެންއެންއިން ބައިވެރިވުމަށް ކުރިން އޮތީ ހަމަޖެހިފަ އެވެ. ނަމަވެސް، ހުކުރު ދުވަހުގެ ރޭ ވައިޓް ހައުސްއިން ނެރުނު މީޑިއާ ޝެޑިއުލްގައި އެ ނޫސް އެޖެންސީގެ ނަމެއް ހިމަނާފައެއް ނުވެ އެވެ.
ސީއެންއެންއިން ރިޕޯޓްކޮށްފައިވާ ގޮތުގައި، ރައީސްގެ ދަތުރުފުޅުގެ ވަގުތީ ޝެޑިއުލްގައި އެ އެޖެންސީގެ ބަދަލުގައި އެހެން އެއްވެސް މީޑިއާ އިދާރާއެއް ހިމަނާފައެއް ނުވެ އެވެ.
ރައީސް ޓްރަމްޕްގެ ސަރުކާރާ ގުޅޭގޮތުން "ޚިޔާލީ ވާހަކަތަކާއި ދޮގު" ފަތުރާ ކަމަށް ތުހުމަތުކޮށް، މިދިޔަ ހަފުތާގައި ޓްރަމްޕް ވަނީ ސީއެންއެން، ޕޮލިޓިކޯ އަދި އެމްއެސް ނައު ގެ ނޫސްވެރިން ވައިޓް ހައުސްއަށް ވަނުން މަނާކޮށްފަ އެވެ.
މި ތިން މީޑިއާ އިދާރާއިން ވެސް ބުނެފައިވަނީ މި މައްސަލައިގައި ގާނޫނީ ފިޔަވަޅު އަޅާނެ ކަމަށެވެ. އަދި ޓްރަމްޕްގެ މި ނިންމުމަކީ ގާނޫނުއަސާސީން ކަށަވަރުކޮށްދޭ ހިޔާލުފާޅުކުރުމުގެ މިނިވަންކަމާއި ނޫސްވެރިކަމުގެ މިނިވަންކަމާ ޚިލާފު ކަމެއް ކަމަށް އެ ފަރާތްތަކުން ވަނީ ތުހުމަތުކޮށްފަ އެވެ.
ސީއެންއެންއާއެކު ވައިޓް ހައުސްގެ ޚަބަރުތައް ކޮންމެ ދުވަހަކު ރޮޓޭޝަން އުސޫލުން ކަވަރުކުރާ ހަތަރު ޓީވީ ނެޓްވޯކް ކަމަށްވާ އޭބީސީ، ސީބީއެސް، ފޮކްސް ނިއުސް އަދި އެންބީސީން ވަނީ، މަނާކުރި މީޑިއާތަކަށް ތާއީދުކޮށް ރައީސްގެ ޚަބަރުތައް ބްރޯޑްކާސްޓްކުރުން މެދުކަނޑާލާފަ އެވެ.
މީޑިއާތަކާ ދެމެދު އުފެދުނު މި މައްސަލަތަކާ ގުޅިގެން، ނިއުޔޯކްގައި ބޭއްވި އދ. ގެ އާންމު މަޖިލީހުގެ ކުރިން ވައިޓް ހައުސްއިން ވަނީ "ޓްރަމްޕް ޓީވީ" ގެ ނަމުގައި އަމިއްލަ ސްޓްރީމިން ޗެނަލެއް އިފްތިތާހުކޮށްފަ އެވެ.
ފެޑަރަލް ފަނޑިޔާރަކު ފަހުން ނިންމެވި ގޮތުގައި، ނޫސް އިދާރާތައް ވައިޓް ހައުސްއަށް ވަނުން މަނާކުރުމަކީ ގާނޫނުއަސާސީއާ ޚިލާފުވުން އެކަށީގެންވާ ކަމެކެވެ. އެހެންކަމުން، މިވަގުތަށް އެ ނޫސްވެރިންނަށް އަލުން ވަނުމުގެ ހުއްދަ ދިނުމަށް ސަރުކާރަށް ވަނީ އަމުރުކޮށްފަ އެވެ.
އެހެންނަމަވެސް، ޗައިނާގެ ލީޑަރު ޝީ ޖިންޕިންގެ ޝަރަފުގައި ބުރާސްފަތި ދުވަހު ބޭއްވި ރަސްމީ ޖާފަތަށް ވަޑައިގެންނެވި ބޭފުޅުންގެ ޚަބަރުތައް ކަވަރުކުރުމަށް ދިޔަ ސީއެންއެން އަދި އެމްއެސް ނައުގެ ބައެއް ނޫސްވެރިންނަށް ވައިޓް ހައުސްއިން ވަނީ ވަނުމުގެ ހުއްދަ ނުދީ ހިފަހައްޓާފަ އެވެ.
