ރަސްމާލޭގައި ވޯޓާފްރަންޓް އަދި މެރީނާއެއް ތަރައްގީކުރަން ޔޫއޭއީގެ ޑިވެލޮޕަރެއް ކަމުގައިވާ އީގަލް ހިލްސްއަށް އެ ރަށް ކުއްޔަށް ދެވިގެން ނުވާނެ ކަމަށާއި އެކަމާ ދެކޮޅު ހަދަން ޖެހޭ ކަމަށް ހުޅުމާލެ ދެކުނު ދާއިރާގެ އެމްޑީޕީ މެންބަރު ޑރ. އަހްމަދު ޝަމްހީދު ވިދާޅުވެއްޖެ އެވެ.
ޝަމްހީދު އެކްސް ގައި ވިދާޅުވީ ގައުމުގެ އިގްތިސާދީ ކުރިއެރުމަށް މިފަދަ ބޮޑެތި އިންވެސްޓްމަންޓްތައް ބޭނުންތެރިވިޔަސް، ވަކި ފަރާތްތަކަށް ނާޖާއިޒު މަންފާ ލިބޭގޮތަށް އަދި ދައުލަތަށް ގެއްލުންވާ ގޮތަށް އެކުލާވާލާ މިފަދަ އެއްބަސްވުންތަކަށް ނޫނެކޭ ބުނަން ޖެހޭ ކަމަށެވެ.
"ރާއްޖޭގެ ގާނޫނުއަސާސީގައި، ސަރުކާރު ޖަވާބުދާރީ ކުރުވުމުގެ އެންމެ މަތީ ޒިންމާ ރައްޔިތުންގެ މަޖިލީހާ މަތިކޮށްފައިވާއިރު، މަޖިލީހަށް ވެސް ސިއްރުން ދައުލަތުގެ މިފަދަ އަގުހުރި މުދާ ވިއްކައި ނުވަތަ ކުއްޔަށް ދޫކުރެވިގެން ނުވާނެ،" އޭނާ ވިދާޅުވި އެވެ.
ޝަމްހީދު ވިދާޅުވީ ރައްޔިތުންގެ ޓެކްސް ފައިސާއިން ބިން ހިއްކުމަށްފަހު، އެ ބިން ހިއްކުމަށް ދިޔަ ޚަރަދުވެސް ދައުލަތަށް އަނބުރާ ނުލިބޭ ގޮތަށް ހަދާ މިފަދަ އެއްބަސްވުންތަކުގެ ޤާނޫނީ ޞައްޙަކަމާމެދު ބޮޑެތި ސުވާލުތަކެއް އުފެދޭ ކަމަށެވެ.
މީގެއިތުރުން ހުޅުމާލޭގެ ބިމުގެ އަގުތަކަށް ބަލާއިރު، މި ބިންތަކުގެ އަގު ގާތްގަނޑަކަށް 10 ބިލިއަނާއި 17 ބިލިއަން ޑޮލަރާ ދެމެދުގެ އަދަދަކަށް އަރާކަން އޭނާ ފާހަގަކުރެއްވި އެވެ.
އީގަލް ހިލްސްގެ 12 ބިލިއަން ޑޮލަރުގެ މި ޕްރޮޖެކްޓުގެ ބޭނުމަށް ރަސްމާލޭގެ 500 ހެކްޓަރު ދޫކޮށްލާ ގޮތަށް ވަނީ ހަމަޖެހިފަ އެވެ. މިއީ ފުށިދިއްގަރު ފަޅުން ހިއްކާނެ ކަމަށް ބުނެފައިވާ 1,058 ހެކްޓަރުގެ ގާތްގަނޑަކަށް ދެބައިކުޅަ އެއް ބަޔެވެ.
ރަސްމާލޭ އިންޓަގްރޭޓަޑް ޒޯނުގައި ބައިިނަލްއަގުވާމީ ފެންވަރުގެ ހޮޓާތަކާއި، ރިސޯޓުތަކާއި، ބްރޭންޑެޑް ރެޒިޑެންސްތަކުގެ އިތުރުން ރެސްޓޯރެންޓުތަކާއި، ފިހާރަތަކުގެ އިތުރުން މުނިފޫހިފިލުވުމާއި ސިއްހީ މަރުކަޒުތައް ހުންނާނެ ކަަމަށް ސަރުކާރުން ވަނީ ބުނެފަ އެވެ.
މީގެއިތުރުން މި މަޝްރޫއުގެ ދަށުން، ކޮންޓްރެކްޓަރުގެ އަމިއްލަ ހަރަދުގައި 5،000 ސޯޝަލް ހައުސިން ޔުނިޓު އަޅައިދޭނެ ކަަމަށް ވެސް ވަނީ ބުނެފަ އެވެ.
