ޒިއުރިކް، ސްވިޒަލެންޑް (ސެޕްޓެމްބަރު 22) - ފީފާގެ ރައީސްގެ މަގާމުގައި ދެމިހުރުމަށްޓަކައި، ހަތަރު ވަނަ ދައުރެއް ހޯދުމަށް ކުރިމަތިލާާނެކަން އިއުލާނުކޮށްފައިވާ، މިހާރުގެ ރައީސް ޖިއާނީ އިންފަންޓީނޯ، ފީފާ ރިފޯމް ކުރަން މަރުހަބާ ކިޔާ ކަމަށް ވިދާޅުވެއްޖެ އެވެ.
އެ ގޮތުން، މީގެ ކުރިން ފީފާގެ އިންޓާނަލް ރިވިއުއެއް ހިންގުމުގެ ވާހަކަތައް އެކި ފަހަރު މަތިން ދެއްކެވި އިންފަންޓީނޯ، ފީފާ ކައުންސިލް އާއި މެމްބަރު އެސޯސިއޭޝަންތަކަށް ފޮނުއްވި ސިޓީއެއްގައި ވަނީ އެކްސްޓާނަލް ރިވިއު އަކަށް ވެސް މަރުހަބާ ކިޔަން ތައްޔާރަށް ހުންނެވި ކަމަށް ވިދާޅުވެފަ އެވެ.
އަންނަ މަހު ފީފާ ކައުންސިލް ބައްދަލުވުމެއް ބާއްވަން ނިންމާފައިވާއިރު، އޭގެ ކުރިން އިންފަންޓީނޯ އަންނަނީ ގިނަ ގޮތްގޮތުން، ފީފާގެ މެމްބަރު ގައުމުތަކާ ވާހަކަ ދައްކައި، އޭނާ އަށް ގެއްލިފައި އޮތް އިތުބާރު އަލުން ހޯދަން މަސައްކަތް ކުރަމުންނެވެ.
ފީފާ ފޯވާޑް އެންޓަޕްރައިސް (އެފްއެފްއީ)ގެ ނަމުގައި، ޕްރައިވެޓް އިންވެސްޓަރުންނަށް ފީފާ ވޯލްޑް ކަޕް ހިމެނޭހެން، ފީފާ މުބާރާތްތަކުގެ، 21 ޕަސެންޓް ހިއްސާ، 20 ބިލިއަން ޑޮލަރަށް އަގު އަރާ ޑީލެއްގައި ވިއްކާލަން ކުރި މަސައްކަތާ ހެދި ދުނިޔޭގެ ފުޓްބޯޅައިގެ ޕޮލިޓިކްްސްގެ ތެރޭގައި ފީފާގެ ރައީސް، އިންފަންޓީނޯ އަށް ދުވަހުން ދުވަހަށް އެކި ކަހަލަ ގޮންޖެހުންތައް އަންނަނީ ކުރިމަތިވަމުންނެވެ.
މި ކަންކަމުން އަަރައިގަތުމަށްޓަކައި، ކުރާ މަސައްކަތުގެ ތެރެއިން މި ފަހަރު، އިންފަންޓީނޯ ފޮނުވި ސިޓީގައި ވަނީ، ފީފާ އިން ކަންކަން ނިންމުމުގައި ގެންގުޅޭ އުސޫލު މިހާރަށް ވުރެން ބޮޑަށް ހަރުދަނާ ކުރަން މަސައްކަތް ކުރަން ތައްޔާރަށް ހުރި ކަމަށެވެ. އަދި، އެފްއެފްއީގެ މައުލޫމާތުގެ ކަންކަން ދިޔައީ އެންމެ ރަނގަޅަށް ނޫން ކަމަށާއި އެކަމާ ބެހޭގޮތުން، ފީފާ އިން އެންމެ ފުރަތަމަ ވެސް ގޮތެއް ނިންމިކަމަށް ދެކެވުނު ވާހަކަ ތަކަކީ ކަން ހިނގި ގޮތް ނޫން ކަމަށް ވެސް އިންފަންޓީނޯ ވަނީ އެ ސިޓީގައި ބަޔާންކޮށްފަ އެވެ.
"ޑިމޮކްރަޓިކް އުސޫލުތައް، މިނިވަންކަން މަތީ ކުރިއަށް ދިއުން، ކުޅިވަރުގައި ބާރު ހިނގާ ފަރާތެއްގެ ގޮތުގައި ދެމިތިބުން. މިއީ، ސޭލްގައި ވިއްކާލަން އޮތް ކަންކަމެއް ނޫން. އެކަން ދުވަހަކު ވެސް ނުވާނެ. މި ހުރީ ކެރިގެން ފީފާ ލީޑުކުރަން ތައްޔާރަށް. ޔަގީންކަން އެބައޮތް އެކުގައި މަސައްކަތް ކޮށްގެން ގިނަ ކަންކަން ހާސިލްކުރެވޭނެ ކަމުގެ،" އިންފަންޓީނޯ ސިޓީގައި ލިޔުއްވާފައިވެ އެވެ.
ފީފާ އަށް ދާދި ފަހުން، އިނގިރޭސި އެފްއޭގެ ޗެއާމަން، ޑެބީ ހެވިޓް ފޮނުއްވި ސިޓީގައި ވަނީ، އަންނަ މަހު 15 ގައި އޮންނަ ފީފާ ކައުންސިލް ބައްދަލުވުމުގެ ކުރިން، އެފްއެފްއީ އާއި އެ ނޫން ވެސް ފީފާގެ މުހިންމު ލިޔެކިޔުންތައް އާންމުކުރަން ޖެހޭނެ ކަމަށް ވިދާޅުވެފަ އެެވެ. އެ ސިޓީގައި ހެވިޓް ވަނީ، ފީފާގައި މިހާރު އޮތް ކަންކަން ސިއްރު ކުރުމުގެ ސަގާފަތް ނައްތާލައި، މެމްބަރުންނަށް ދެފުށްފެންނަ ގޮތަށް އެ ފެޑެރޭޝަން ހިންގަން ޖެހޭ ކަމަށް ވެސް ވިދާޅުވެފަ އެވެ.
ޔޫރަޕްގެ މައި ފުޓްބޯޅަ އިދާރާ، ޔުއެފާ އިން ވެސް އަންނަނީ އެފްއެފްއީ ޑީލުގެ މައްސަލައިގައި އިންފަންޓީނޯއާ ދެކޮޅަށް އެމެރިކާގެ ތިން ކޯޓެއްގައި މައްސަލަ ކުރިއަށްގެންދަމުންނެވެ. އެ އަށް ރައްދުދީ ފީފާ އިން ބުނެފައިވަނީ، ޔުއެފާ އިން އިސްވެ މަސައްކަތް ފަށާފައިވަނީ، އިންފަންޓީނޯ އާއި ފީފާގެ ލީޑަޝިޕްގެ އަގުވައްޓާލުމަށް ކަމަށެވެ.
އަންނަ އަހަރުގެ މާޗް މަހު ފީފާގެ އާ އިންތިހާބު އޮތްއިރު، ރަސްމީކޮށް ކެންޑިޑެސީ އިއުލާނުކުރެއްވީ، 2016 ވަނަ އަހަރުން ފެށިގެން ފީފާގެ ރައީސްގެ މަގާމު ފުރުއްވަމުން އަންނަ އިންފަންޓީނޯ އެކަންޏެވެ. ނޮވެމްބަަރު މަހު، 18 ވަނަ ދުވަހު އިންްތިހާބަށް ކުރިމަަތިލުމުގެ މުއްދަތު ހަމަވާނެ އެވެ. ފީފާގެ ރައީސްގެ މަގާމު ލިބޭނީ، ފީފާ މެމްބަރު، 211 ގައުމުގެ ތެރެއިން، މަދުވެގެން 106 ގައުމުގެ ތާއީދު ހޯދައިގެންނެވެ.
