ޒިއުރިކް، ސްވިޒަލެންޑް (އޮގަސްޓް 21) - ފީފާ ވޯލްޑް ކަޕްގެ ފައިނަލް މެޗަށް ފަހު ހިނގައިދިޔަ ކަންކަމަށް ބަލައި، ފީފާ ޑިސިޕްލިނަރީ ކޮމިޓީން އާޖެންޓީނާ ފުޓްބޯޅަ އެސޯސިއޭޝަން (އޭއެފްއޭ)، 321،000 ޑޮލަރުން ޖޫރިމަނާކޮށް، ހަމަނުޖެހުން ހިންގުމުގައި އެންމެ ބޮޑަށް ބައިވެރިވި، މިޑްފީލްޑަރު، ލެއަންޑްރޯ ޕަރޭޑޭސް، 10 މެޗަށް ސަސްޕެންޑްކޮށްފި އެވެ.
އިތުރު ވަގުތުގެ ދެ ވަނަ ހާފުގައި، ފެރާން ޓޮރޭޒްގެ ގޯލުން 1-0 އިން އާޖެންޓީނާ ބަލިކޮށް ސްޕެއިނުން، މި ފަހަރުގެ ފީފާ ވޯލްޑް ކަޕްގެ ޗެމްޕިއަންކަން ދެ ވަނަ ފަހަރަށް ހޯދި ފައިނަލް މެޗުގެ ވަގުތު ހަމަވެގެން ސްޕެއިން ކުޅުންތެރިން ދަނޑަށް ދުވެފައި އެރި ވަގުތު ހަމަނުޖެހުންތަކެއް ހިނގި އެވެ. އެ ގޮތުން، ސްޕެއިންގެ އެރިކް ގާސިއާ އާއި ގަވީ އަށް އާޖެންޓީނާގެ ލެއަންޑްރޯ ޕަރޭޑޭސް، ހަމަލާ ދިން މަންޒަރު ޓިވީ އަށް އެރިއިރު، އާޖެންޓީނާގެ ނަހުއެލް މޮލީނާ ވަނީ ސްޕެއިނުގެ ރޮޑްރީގޯ (ރޮޑްރީ) ގައިގައި ޖަހައިފަ އެވެ. އަދި، އާޖެންޓީނާގެ އެސިސްޓަންޓް ކޯޗު، ރޮބާޓޯ އަޔާލާ ދަނޑަށް އަރައި، ސްޕެއިންގެ ޑެނީ އޮލްމޯ އަށް ހަމަލާ ދިން މަންޒަރުގެ ވީޑިއޯތައް ވެސް ވަނީ އާންމުވެފަ އެވެ.
ފީފާ ޑިސިޕްލިނަރީ ކޮމިޓީން މި މައްސަަލަ ތަހުގީގު ނިންމާލީ، ރެފްރީގެ ރިޕޯޓާއި މެޗުގެ ވީޑިއޯ ފޫޓޭޖްތައް ބެލުމަށް ފަހު އެވެ.
މި މައްސަލައިގައި އާޖެންޓީނާގެ އެފްއޭ، 321،000 ޑޮލަރުން ޖޫރިމަނާކުރިއިރު، އޭގެއިން 100،000 ޑޮލަރު އިންވެސްޓްކުރާނީ ނަސްލީ ތަފާތުކުރުން ނަައްތާލުުމަށް ކުރެވޭ މަސައްކަތްތަކުގަ އެވެ. އަދި، އިތުރު 100،000 ޑޮލަރު މި ފަހަރުގެ ޖޫރިމަނާ ތެރޭގައި ދައްކަން ނުޖެހޭނެ އެވެ. އެއީ، މި ފަދަ ކުށެއް ތަކުރާރުކޮށްފިނަމަ، އަންނާނެ އަދަބަކަށް ވަނީ ކަނޑައަޅައިފަ އެވެ.
ޖޫރިމަނާގެ އިތުރުން، ފީފާ އިން ވަނީ، އާޖެންޓީނާ އިން ދެން ކުޅޭ ފީފާ ރަޖިސްޓާޑް ހޯމް ދެ މެޗުގައި، ސަޕޯޓަރުންނަށް ދަނޑަށް ވެއްދޭނީ 50 ޕަސެންޓް ޖާގަ އަށް ކަމަށް ކަނޑައަޅައިފަ އެވެ.
ވަކިވަކި ސަސްޕެންޝަން އައި އާޖެންޓީނާގެ ކުޅުންތެރިންނާއި އޮފިޝަލުންނަށް ބަލާއިރު، ޕަރޭޑޭސް، 10 މެޗަށް ސަސްޕެންޑް ކުރުމުގެ އިތުރުން 90،000 ޑޮލަރުގެ ޖޫރިމަނާއެއް ދައްކަން ޖެހޭނެ އެވެ. މޮލީނާ، ހަތް މެޗަށް ސަސްޕެންޑްވިއިރު، އޭނާ ވެސް 90،000 ޑޮލަރުގެ ޖޫރިމަނާއެއް ދައްކަން ޖެހެ އެވެ. ތިއާގޯ އަލްމާޑާ، އެއް މެޗަށް ސަސްޕެންޑްވިއިރު، ދައްކަން ޖެހެނީ، 30،000 ޑޮލަރެވެ. އާޖެންޓީނާގެ ކޯޗިން ސްޓާފް، އަޔާލާ ތިން މެޗަށް ސަސްޕެންޑްވިއިރު، 30،000 ޑޮލަރު ދައްކަން ޖެހެ އެވެ.
މި ހަމަނުޖެހުމުގެ ތެރެއަށް ވަން، ސްޕެއިންގެ މިޑްފީލްޑަރު، ގަވީ އަށް ވަނީ އެއް މެޗުގެ ސަސްޕެންޝަނަކާއި 30،000 ޑޮލަރުގެ ޖޫރިމަނާއެއް އަތުވެފަ އެވެ.
އާޖެންޓީނާ ފުޓްބޯޅަ އެސޯސިއޭޝަނުން ވަނީ ފީފާގެ މި އަދަބާ ދެކޮޅަށް އެޕީލްކުރަން ނިންމައިފަ އެވެ. އަދި، އެޕީލުން ނާކާމިޔާބުވެއްޖެނަމަ، ކުޅިވަރުގެ އެންމެ މަތީ ކޯޓު ކަމަށްވާ ކޯޓް އޮފް އާބިޓްރޭޝަން ފޯ ސްޕޯޓްސް (ކާސް) އަށް ދާނެ ކަމަށް ވެސް ވަނީ ބުނެފަ އެވެ.
