ޖަޕާނުގެ އައިޗީ-ނަގޯޔާގައި މިހާރު ކުރިއަށްދާ 20 ވަނަ އޭޝިއަން ގޭމްސްގައި، ރާއްޖޭގެ އެންމެ ބާރު ދުވުންތެރިޔާ، ހަަސަން ސާއިދު ވާދަކުރާއިރު، މިއީ، އޭނާެގެ ދިގު ކެރިއަރުގައި، އޭޝިއާގެ އެންމެ ބޮޑު ކުޅިވަރު ހަރަކާތް، އޭޝިއަން ގޭމްސްގަައި ފެންނާނެ ފަސް ވަނަ ފަހަރެވެ.
ސާއިދު، 34، އެންމެ ފުރަތަމަ ވާދަކުރީ 2010 ވަނަ އަހަރު ޗައިނާގެ ހަންޒޫގައި ކުރިއަށްދިޔަ އޭޝިއަން ގޭމްސްގަ އެވެ. އެއީ، އުމުރުން 18 އަަހަރުގަ އެވެ. އޭގެ ފަހުން، ދެން އޭޝިއަން ގޭމްސްއެއްގައި އޭނާ ވާދަކުރީ، 2014 ވަނަ އަހަރު ދެކުނު ކޮރެއާގެ އިންޗިއޮންގައި ބޭއްވި އޭޝިއަން ގޭމްސްގަ އެވެ. އަދި، 2018 ވަނަ އަހަރު އިންޑޮނޭޝިއާގެ ޖަކާޓާ-ޕަލަމްބޭގައި އޮތް އޭޝިއަން ގޭމްސްގައި ފެނިގެންދިޔަ ސާއިދު ވަނީ، 2023 ވަނަ އަހަރު ޗައިނާގެ ހަންޒޫގައި ބޭއްވި އޭޝިއަން ގޭމްސްގައި ވެސް ވާދަކޮށްފަ އެވެ.
ތަފާތު ފަސް އޭޝިއަން ގޭމްސްއެއްގައި އެތުލެޓިކްސް ފަދަ ކުޅިވަރަކުން ވާދަކުރުމަކީ ވަރަށް މަދު އެތުލީޓަކަށް ހާސިލްކުރެވިފައިވާ ކަމެކެވެ. ސާއިދުގެ ނަން އެ ލިސްޓަށް އިތުރުވީ އެވެ.
މި ފަހަރުގެ އޭޝިއަން ގޭމްސް އަށް ފުރުމުގެ ކުރިން، ރާއްޖޭގެ އެންމެ ބާރު ދުވުންތެރިޔާ، ސާއިދު، ސޯޝަލް މީޑިއާގައި ޕޯސްޓު ކޮށްފައިވާ ގޮތުގައި، ތަފާތު ފަސް އޭޝިއަން ގޭމްސްއެއްގައި ވާދަކުރުމަކީ އަދި 20 ވަރަަކަށް އަހަރު އޭޝިއާގެ އެންމެ ބޮޑު ކުޅިވަރު ހަރަކާތުގައި ރާއްޖެ ތަމްސީލްކުރުމަކީ ލިބޭ ފަހުރެއް ކަމަށެވެ.
އެ ގޮތުން، 2010 ވަނަ އަހަރުގެ ފަހުން، ބޭއްވި ކޮންމެ އޭޝިއަން ގޭމްސްއެއްގައި ބައިވެރިވިިއިރު، އޭނާ ހުރީ ކެރިއަރުގެ ތަފާތު އެކި ހިސާބުތަކުގައި ކަމަށް ސާއިދު ބުނެފައިވެ އެވެ. އަދި، އޭގެއިން ކޮންމެ ފަހަރަކު ކެރިއަރަށް މުހިންމު ފިލާވަޅުތަކެއް ލިބޭކަން ވެސް ސާއިދު ވަނީ ފާހަގަކޮށްފަ އެވެ.
"މިހާރު މި އޮތީ ކުރިއަށް ވުރެން ބޮޑަށް އިތުރަށް ހިތްވަރު ކުރުން. އަމިއްލަ ނަފްސަށް ޗެލެންޖް ކޮށްގެން ވެސް ގައުމު ތަމްސީލްކުރުމުގެ ޒިންމާ އެންމެ މަތީ ފަންތީގައި އަދާކުރުން. މި ދަތުރު މިހާރު މި ދަނީ ކުރިއަށް،" ސާއިދު، ލިޔެފައިވެ އެވެ.
ބައިނަލްއަގުވާމީ ކުޅިވަރު މުބާާރާތްތަކުގައި ރާއްޖެ އަށް އެންމެ ބޮޑެތި ކާމިޔާބީތައް ހޯދައިދީފައިވާ ސާއިދުގެ ކެރިއަރުގައި މިއީ ފަހުކޮޅެވެ. މިއީ، އޭނާގެ ފަހު އޭޝިއަން ގޭމްސް އެވެ. ގަތަރުގައި 2030 ވަނަ އަަހަރު ބާއްވާ އޭޝިއަން ގޭމްސް އަންނައިރު، ސާއިދު އަށް 38 އަހަރު ފުރޭނެ އެވެ. އެހެންކަމުން، އިތުރު އޭޝިއަން ގޭމްސް އަކުން އޭނާ ފެނުމުގެ ފުރުސަތު ކުޑަ އެވެ. އަދި، ފަހަރުގައި މިއީ، ކެރިއަރުގެ ފަހު ބޮޑު ގޭމްސް އަށް ވުމުގެ ފުރުސަތު ވެސް އޮތުމަކީ ދުރުގައި އޮތް ކަމެއް ނޫނެވެ.
އޭޝިއަން ގޭމްސްގައި ސާއިދު، 100 މީޓަރު ދުވުމުގެ އިތުރުން، ރިލޭ އިވެންޓެއްގައި ވާދަކުރާނެ އެވެ.
