ޖަޕާނުގައި މިހާރު ކުރިއަށްދާ އޭޝިއަން ގޭމްސްގައި، ދެކުނު ކޮރެއާގެ ފިރިހެން ހޮކީ ޓީމަށް އުތުރު ކޮރެއާގެ ގައުމީ ސަލާމް ޖެހުމާ ގުޅިގެން މުބާރާތް އިންތިޒާމުކުރާ ފަރާތްތަކުން މައާފަށް އެދިއްޖެ އެވެ.
ބަންގްލަދޭޝް އަތުން 5-0 ގެ ނަތީޖާއަކުން ދެކުނު ކޮރެއާ މޮޅުވި މެޗުގެ ކުރިން، ނުބައި ގައުމީ ސަލާމެއް ޖެހުމުން އެ ގައުމުގެ ކުޅުންތެރިން ތިބީ ވަރަށް ބޮޑަށް ހައިރާންވެފަ އެވެ.
ދެކުނު ކޮރެއާގެ ޔޮންހަޕް ނިއުސް އެޖެންސީން ރިޕޯޓްކޮށްފައިވާ ގޮތުގައި، އުތުރު ކޮރެއާގެ ގައުމީ ސަލާމަށް ފަހު ދެން ޖެހީ ބަންގްލަދޭޝްގެ ގައުމީ ސަލާމެވެ. ދެކުނު ކޮރެއާގެ އަސްލު ގައުމީ ސަލާމް ޖަހާފައިވަނީ އޭގެ ފަހުންނެވެ.
މި ހިނގި އޮޅުމާ ގުޅިގެން ސްޓޭޑިއަމްގެ އެނައުންސަރު ވަނީ އެ ވަގުތު މައާފަށް އެދިފަ އެވެ.
މިކަމާ ގުޅިގެން ދެކުނު ކޮރެއާގެ ކޯޗު މިން ތައޭ-ސިއޮކް ބުނީ މިއީ ވަރަށް ސީރިއަސް މައްސަލައެއް ކަމަށެވެ. އަދި އެކަމާ ދެކޮޅަށް ޝަކުވާ ކުރުމުން، އެއީ ގައުމީ ސަލާމް ތައްޔާރު ނުވެ އޮތުމުން ދިމާވި ކަމެއް ނޫން ކަމަށާއި، އެއީ އެކަން އޮޕަރޭޓް ކުރަން ތިބި މީހުންނަށް އޮޅުމަކުން ދިމާވި ކަމެއް ކަމަށް ބުނެ އިންތިޒާމުކުރާ ފަރާތުން މައާފަށް އެދިފައިވާ ކަމަށް އޭނާ ބުންޏެވެ.
ނަމަވެސް ކޯޗު ބުނި ގޮތުގައި މިއީ އެއްގޮތަކަށް ވެސް ދިމާވެގެންވާނެ ފަދަ ކަމެއް ނޫނެވެ.
ދެކުނު ކޮރެއާގައި އުތުރު ކޮރެއާގެ ގައުމީ ސަލާމާއި އެ ގައުމު ރަމްޒުކޮށްދޭ އެހެނިހެން ނިޝާންތައް ބޭނުންކުރުމަކީ މަނާ ކަމެކެވެ.
މީގެ އިތުރުން، 1950 އިން 1953 އަށް މި ދެ ގައުމުގެ މެދުގައި ކުރެވުނު ހަނގުރާމަ އެއްވެސް ސުލްހައިގެ އެއްބަސްވުމަކާ ނުލައި ނިމިފައިވާތީ، ގާނޫނީ ގޮތުން ބަލާއިރު މި ދެ ގައުމަކީ އަދިވެސް ހަނގުރާމައިގެ ހާލަތުގައި އޮތް ދެ ގައުމެވެ.
އަންނަ ހޮނިހިރު ދުވަހު ރަސްމީކޮށް ފެށުމަށް ހަމަޖެހިފައިވާ އޭޝިއަން ގޭމްސްގެ ތައްޔާރީތަކުގެ ތެރޭގައި، އެކޮމޮޑޭޝަންގެ ފެންވަރާއި ޖާގައިގެ ދަތިކަމާ ގުޅިގެން ބައެއް ޓީމުތަކުން ވަނީ މީގެ ކުރިން ވެސް ޝަކުވާ ހުށަހަޅާފަ އެވެ.
ދެކުނު ކޮރެއާގެ ބާސްކެޓްބޯޅަ ޓީމުގެ ކުޅުންތެރިއަކު ވަނީ އޭނާ ހުރި ކޮޓަރީގެ ހޮޅިއެއް ފަޅައިގެން ގޮސް މުޅި ތަން ފެންބޮޑުވެފައިވާ މަންޒަރު ފެންނަ ވީޑިއޯއެއް އާންމުކޮށްފަ އެވެ.
މީގެ އިތުރުން، މި ހަފުތާގައި ޖަޕާނަށް ދިޔަ ބައެއް ޓީމުތައް އެއާޕޯޓުގައި ހަ ގަޑިއިރަށް ވުރެ ގިނަ އިރު މަޑުކުރަން ޖެހުނު މައްސަލަތަކެއް ވެސް ވަނީ ފެންމަތިވެފަ އެވެ.
އޭޝިއަން ގޭމްސްގެ ފީލްޑް ހޮކީ އިވެންޓްތައް މިދިޔަ ހުކުރު ދުވަހު ފަށާފައިވާއިރު، މި މުބާރާތް ކުރިއަށްދާނީ އަންނަ އޮކްޓޫބަރު މަހުގެ 3 ވަނަ ދުވަހުގެ ނިޔަލަށެވެ.
