ކުރިއަށް އޮތް އޭޝިއަން ގޭމްސްގައި ރާއްޖޭގެ ދިދަ އުފުލުމުގެ ޝަރަފް ޓޭބަލް ޓެނިސް ތަރި، މޫސާ މުންސިފް އަހުމަދު އާއި ޝޫޓިން އެތުލީޓު، މަރިޔަމް އީޝަލް އައްބާސް އަށް ދިންއިރު، ޔޫތު އޮލިމްޕިކް ގޭމްސްގައި ރާއްޖޭގެ ދިދަ އުފުލުމުގެ ޝަރަފް ދެ ފެތުންތެރިން ކަމަށްވާ އަމްނާ ތަޒްކިޔާ މިރުސާދު (ތަޒްކީ) އަދި ލޫތު މުހައްމަދު ހުސެއިން އަށް ލިބިއްޖެ އެވެ.
ޖަޕާނުގެ އައިޗީ އަދި ނަގޯޔާގައި އޭޝިއަން ގޭމްސް އޮތީ މި މަހުގެ 19 އިން އަންނަ މަހުގެ ހަތަރު ވަނަ ދުވަހުގެ ނިޔަލަށެވެ. އަދި، ސެނެގާލްގެ ޑަކާރުގައި ޔޫތު އޮލިމްޕިކް ގޭމްސް އޮތީ 31 އޮކްޓޫބަރުން ފެށިގެން 13 ނޮވެމްބަރަށެވެ. މި ދެ ގޭމްސްގައި ރާއްޖޭގެ ދިދަ އުފުލާނެ އެތުލީޓުންނަށް ދިދަ ހަވާލުކުރުން އޮތީ އިއްޔެ ހަވީރު، ހ. މީރުމާ އިވެންޓް ހޯލުގައި މޯލްޑިވްސް އޮލިމްޕިކް ކޮމިޓީ (އެމްއޯސީ) އިން ބޭއްވި އިވެންޓެއްގަ އެވެ.
މި އިވެންޓް ޝަރަފްވެރިކޮށްދެއްވީ، ކުޅިވަރާ ބެހޭ ވަޒީރު، އަބްދުﷲ ރާފިއު (ރާއްޕެ)، މޯލްޑިވްސް އޮލިމްޕިކް ކޮމިޓީގެ ރައީސް މުހައްމަދު އަބްދުއްސައްތާރު (ޗަމްޕީ) އަދި ޖަޕާނުން ރާއްޖެ އަށް ކަނޑައަޅުއްވާފައި ހުންނަވާ ސަފީރު އިޝިގާމީ ރުމިކޯ އެވެ. މި އިވެންޓްގައި ވާހަކަ ދައްކަވަމުން، ރާފިއު އާއި ސައްތާރު ވަނީ ބައިނަލްއަގުވާމީ ބޮޑެތި ކުޅިވަރު ގޭމްސްތަކުގައި ރާއްޖެ ތަމްސީލްކޮށް ކާމިޔާބަށް ވާސިލްވުމުގެ މުހިންމު ކަމަށް އަލި އަޅުވާލައި ވާހަކަ ދައްކަވައިފަ އެވެ.
މުންސިފް އަކީ މި ވަގުތު ރާއްޖޭގައި ކުޅެމުން އަންނަ އެންމެ ތަޖުރިބާކާރު އެއް ޓީޓީ ކުޅުންތެރިޔާގެ އިތުރުން، ބައިނަލްއަގުވާމީ ގޭމްސްތަކުގައި އެތައް ފަހަރެއް މަތިން ރާއްޖެ ތަމްސީލްކޮށްފައިވާ އެތުލީޓެކެވެ. އަދި، އީޝަލް އަކީ ވެސް ގިނަ މުބާރާތްތަކެއްގައި ވާދަކޮށް، ގައުމު ތަމްސީލްކޮށްފައިވާ އެތުލީޓެކެވެ.
އޭޝިއަން ގޭމްސްގައި ހަރަކާތްތެރިވާ ރާއްޖޭގެ ކޮންޓިންޖެންޓްގެ ޖުމްލަ އަދަދަކީ، 81 އެވެ. އެއީ، ކުޅިވަރުތަކުގެ ކުޅުންތެރިންނާއި އޮފިޝަލުން އަދި ސްޕޯޓްސް މިނިސްޓަރުގެ ޑެލިގޭޝަން ވެސް ހިމަނައިގެންނެވެ. އޭޝިއަން ގޭމްސްގައި ރާއްޖޭން ހަތް ކުޅިވަރަކުން ވާދަކުރާނެ ކަމަށް މޯލްޑިވްސް އެއީ، އެތުލެޓިކްސް، ބެޑްމިންޓަން، ބީޗްވޮލީބޯޅަ، ޓޭބަލް ޓެނިސް، ސްވިމިން، ޝޫޓިން އަދި ސާފިން އެވެ.
އޭޝިއަން ގޭމްސް އަށް ރާއްޖޭގެ ކޮންޓިންޖެންޓްގެ ޗެފް ޑި މިޝަން އަކީ، މޯލްޑިވްސް ޕޫލް ބިލިއާޑް އެސޯސިއޭޝަންގެ ރައީސް، އަހުމަދު ނާސިފް އެވެ. އޭނާ އަކީ މޯލްޑިވްސް އޮލިމްޕިކް ކޮމިޓީ (އެމްއޯސީ)ގެ ހިންގާ ކޮމިޓީގެ މެމްބަރެއް ވެސް މެ އެވެ.
ސެނެގާލްގައި ބާއްވާ ޔޫތު އޮލިމްޕިކްސްގައި ރާއްޖޭން ވާދަކުރަނީ ސްވިމިން ޓީމު އެކަންޏެވެ. ސްވިމިން ޓީމުން މި ގޭމްސްގައި ރާއްޖެ ތަމްސީލްކުރާއިރު، ދިދަ އުފުލުމުގެ ޝަރަފް ލިބިފައިވާ ތަޒްކީ އާއި ލޫތު އަކީ ބައިނަލް އަގުވާމީ ގިނަ މުބާރާތްތަކެއްގައި ރާއްޖެ ތަމްސީލްކޮށް، ގައުމީ ރެކޯޑްތަކެއް ވެސް ހަދާފައިވާ ފެތުންތެރިންނެވެ.
ޔޫތު އޮލިމްޕިކްސްގައި ރާއްޖޭގެ ޝެފް ޑި މިޝަން އަކީ، މޯލްޑިވްސް އޮލިމްޕިކް ކޮމިޓީގެ މަރިޔަމް ޝައުފާ އެެވެ.
