އަންނަ ހޮނިހިރު ދުވަހު ޖަޕާންގައި ފަށާ އޭޝިއަން ގޭމްސްގައި ވާދަކުރާ ގައުމީ ބެޑްމިންޓަން ޓީމުގައި ހިމެނެނީ، ޒަޔާން ޒަކީ، ނިބާލް އަހުމަދު، އައިމިނަތު ނަބީހާ (ނަބީ) އަދި ފާތިމަތު ނަބާހާ (ނަބާ) އެވެ.
އައިޗީ އަދި ނަގޯޔާގައި އޭޝިއަން ގޭމްސް އޮތީ މި މަހުގެ 19 އިން އަންނަ މަހުގެ ހަތަރު ވަނަ ދުވަހުގެ ނިޔަލަށެވެ. އެ ގޭމްސްގައި ވާދަކުރަނީ ރާއްޖޭން ހަތް ކުޅިވަރަކުންނެވެ. ބެޑްމިންޓަން ޓީމު ފިޔަވައި، ބާކީ ހުރިހާ ޓީމެއް ވަނީ ޖަޕާނަށް ގޮސްފަ އެވެ.
އޭޝިއަން ގޭމްސްގެ ބެޑްމިންޓަން އިވެންޓް ފަށަން އޮތީ މި މަހު 25 ވަނަ ދުވަހު އެވެ. ނިބާލް، ޒަޔާން، ނަބާ އަދި ނަބީ، އޭޝިއަން ގޭމްސްގައި ވާދަކުރަން ޖަޕާނަށް ފުރާނީ މިހާރު ކުރިއަށްދާ 50 ވަނަ ގައުމީ ބެޑްމިންޓަން މުބާރާތް ނިމުމުން އަންނަ ހޯމަ ދުވަހު އެވެ.
ނަބާ، ނަބީ، ޒަޔާން އަދި ނިބާލްއާ އެކު، ކޯޗެއްގެ ގޮތުގައި އޭޝިއަން ގޭމްސް އަށް ދާނީ އެ ކުޅުންތެރިންނަށް، ރިވައިވަލް ސްޕޯޓްސްގައި އިރުޝާދުދޭ ކޯޗު، ނަޝްފާން މުހައްމަދުއާ އެވެ. އޭޝިއަން ގޭމްސްގެ ސްކޮޑަކީ ގައުމީ މުބާރާތް ފެށުމުގެ ކުރިން ރޭންކިން އަށް ބަލައިގެން ނަގާފައިވާ ސްކޮޑެވެ.
ގައުމީ ބެޑްމިންޓަން މުބާރާތުގެ ސިންގަލްސް ޗެމްޕިއަންކަން ދެެ ފަހަރު ހޯދާފައިވާ ޒަޔާން ޒަކީ މި ފަހަރުގެ މުބާރާތުގެ ސެމީ ފައިނަލުން ބަލިވިއިރު، ގައުމީ ސިންގަލްސް ތަށި އެއް ފަހަރު އުފުލާލައިފައިވާ ނިބާލް ވަނީ މި ފަހަރުގެ ފައިނަލުގައި ބަލިވެފަ އެވެ. ޒަޔާނާއި ނިބާލް ބަލިކޮށް، ރިވައިވަލްގެ ހައިޝަމް އިބްރާހިމް އަލީ ވަނީ ގައުމީ މުބާރާތް ފުރަތަމަ ފަހަރަށް ކާމިޔާބުކޮށްފަ އެވެ. ޒަޔާން އާއި ނިބާލް ވަނީ މި ފަހަރުގެ ގައުމީ މުބާރާތުގެ ފިރިހެން ޑަބަލްސް ޗެމްޕިއަންކަން ހޯދައިފަ އެވެ.
އަންހެން ސިންގަލްސް ޗެމްޕިއަންކަން ހޯދީ ނަބީ ބަލިކޮށް ނަބާ އެވެ. މިއީ، ނަބާ، ގައުމީ ސިންގަލްސްގެ ޗެމްޕިއަންކަން ހޯދި ފަސް ވަނަ ފަހަރެވެ. ނަބާ އާއި ނަބީ ވަނީ ހަ ވަނަ ފަހަރަށް އަންހެން ޑަބަލްސް ޗެމްޕިއަންކަން ހޯދައިފަ އެެވެ. އަދި، ނަބާ އާއި ޒަޔާން ވަނީ، މިކްސް ޑަބަލްސް ޗެމްޕިއަންކަން ހަ ފަހަރު ހޯދައިފަ އެވެ.
އޭޝިއަން ގޭމްސްގައި، ބެޑްމިންޓަންގެ އިތުރުން ދެން ރާއްޖޭން ވާދަކުރަނީ، އެތުލެޓިކްސް، ބީޗްވޮލީބޯޅަ، ޓޭބަލް ޓެނިސް، ސްވިމިން، ޝޫޓިން އަދި ސާފިން އެވެ. އޭޝިއަން ގޭމްސްގައި ހަރަކާތްތެރިވާ ރާއްޖޭގެ ކޮންޓިންޖެންޓްގެ ޖުމްލަ އަދަދަކީ، 81 އެވެ. އެއީ، ކުޅިވަރުތަކުގެ ކުޅުންތެރިންނާއި އޮފިޝަލުން އަދި ސްޕޯޓްސް މިނިސްޓަރުގެ ޑެލިގޭޝަން ވެސް ހިމަނައިގެންނެވެ. އޭޝިއަން ގޭމްސް އަށް ރާއްޖޭގެ ކޮންޓިންޖެންޓްގެ ޗެފް ޑި މިޝަން އަކީ، މޯލްޑިވްސް ޕޫލް ބިލިއާޑް އެސޯސިއޭޝަންގެ ރައީސް، އަހުމަދު ނާސިފް އެވެ.
