ފުށިދިއްގަރުފަޅު ހިއްކައިގެން ތަރައްގީކުރާ ރަސްމާލެ މަޝްރޫއުއަކީ ދައުލަތަށް މާލީ ބޮޑު ގެއްލުމެއް ކަމަށާއި، ދެން އަންނަ ސަރުކާރަކުން އެ މަޝްރޫއު ހުއްޓާލަންޖެހޭނެ ކަމަށް ކުރީގެ ރައީސް އަބްދުއްﷲ ޔާމީން އަބްދުލްގައްޔޫމް ވިދާޅުވެއްޖެ އެވެ.
ޕީޕަލްސް ނޭޝަނަލް ފްރަންޓް (ޕީއެންއެފް) އިން ރޭ ބޭއްވި ޖަލްސާގައި ޔާމީން ވިދާޅުވީ ދިވެހި ރައްޔިތުންނަށް ގެދޮރުވެރިކަމާއި ހިޔާވަހިކަން ފޯރުކޮށްދިނުމަށްޓަކައި ރަސްމާލެއާ ހަމައަށް ދާން ނުޖެހޭ ކަމަށާއި، އެއީ އިގުތިސާދު އަނަރޫފަވެފައިވާ ދަނޑިވަޅެއްގައި ކުރިއަށް ގެންދަންޖެހޭ މަޝްރޫއުއެއް ނޫން ކަމަށެވެ.
"އެތަން ހިއްކުމަކުން ނިމުނީއަކީ ނޫން، ދެން ހުރީ ބޮޑެތި މަސައްކަތް. ގޮނޑުދޮށް ހިމާޔަތްކުރުމާއި މަގުހެދުމާއި ފެނުގެ ނިޒާމާއި މިކަހަލަ ބައިވަރު އެތައް ކަމެއް،" ޔާމީން ވިދާޅުވި އެވެ.
ރަސްމާލެ އެ މަޝްރޫއުގެ ބޭނުންކޮށްގެން ހިޔާނާތާއި ވައްކަން ކުރަމުން ގެންދާ ކަމަށް ވެސް އެމަނިކުފާނު ތުހުމަތު ކުރެއްވި އެވެ. އެ ސަހަރު ހިއްކުމަށް އަޅާ ކޮންމެ ކޮޑިމީޓަރެއްގެ ވެއްޔަށް ދެ ޑޮލަރު ނުވަތަ ތިން ޑޮލަރު ވައްކަމުގެ ގޮތުގައި ދައުލަތަށް ގެއްލިގެންދާ ކަމަށް ޔާމީން ފާހަގަ ކުރެއްވި އެވެ.
ރަސްމާލޭގެ ފަސް ސައިޓެއް ހިއްކުމުގެ މަސައްކަތާ ހަވާލުވީ ޗައިނާ ރެއިލްވޭ ކޮންސްޓްރަކްޝަން ކޯޕަރޭޝަން (ސީއާރުސީސީ) އިން ބިން ހިއްކުމުގެ އެއްވެސް މަސައްކަތެއް ނުފަށަނީސް، އެޑްވާންސުގެ ގޮތުގައި 13.2 މިލިއަން ޑޮލަރު ދީފައިވާ ކަން ދާދި ފަހުން ވަނީ ފަޅާ އަރައިފަ އެވެ.
ސީއާރުސީސީއަކީ ރަސްމާލެ ހިއްކުމުގެ މަސައްކަތް ފުރަތަމަ ހަވާލުކުރި ކެޕިޓަލް މެރިން އިންޖިނިއަރިން ކޮންސްޓްރަކްޝަން (ސީއެމްސީ) އާ އެކީ ސޮއިކުރި އެއްބަސްވުން ބާތިލުކޮށް، އެކި ސައިޓުތައް އެކި ކޮންޓްރެކްޓަރުންނާ ހަވާލުކޮށްގެން ހިއްކަން ނިންމިއިރު މަސައްކަތް ހަވާލުކުރި ކުންފުންޏެކެވެ. އެ ކުންފުންޏާ ހަވާލުކުރީ ސައިޓު "އޭ" އާއި "ބީ" އާއި "އެޗް" ގެ އިތުރުން "އައި" އާއި "ކޭ" ހިމެނޭހެން 352 ހެކްޓަރުގެ ބިން ހިއްކުމުގެ މަސައްކަތެވެ.
ނަމަވެސް ސީއާރުސީސީއަށް ކޮންޓްރެކްޓުގައި އެއްބަސްވި ގޮތަށް އެއްވެސް މަސައްކަތެއް ނުނިންމުނެވެ.
މިހާރު ކުރިމަތިވެފައިވާ ޑޮލަރުގެ ދަތިކަމުގެ އެއް ސަބަބަކީ ވެސް މި މަޝްރޫއުއަށް ގިނަ އަދަދެއްގެ ޑޮލަރު ބޭރުގެ ކުންފުނިތަކަށް ދިނުން ކަމަށް މާލީ ދާއިރާގެ ތަޖުރިބާކާރުން ފާހަގަ ކުރައްވާފައިވެ އެވެ.
ރަސްމާލެ މަޝްރޫއު ފެށީ ޑިސެމްބަރު 18، 2023 ގަ އެވެ. މި މަޝްރޫއުގެ ދަށުން ފުށިދިއްގަރުފަޅުން 1153 ހެކްޓަރު ހިއްކަން ނިންމާފައިވާއިރު، މަޝްރޫއުގެ ބޮޑުބައެއް އަދިވެސް ނުނިމެ އެވެ. ނަމަވެސް ކައުންސިލް އިންތިހާބާ ދިމާކޮށް މާލޭގެ ރަށްވެހިންނާއި މާލޭގައި ދިރިއުޅޭ މީހުންނަށް ރަސްމާލެއިން 15،000 ގޯތި ދިނުމަށް ހުޅުވާލި އެވެ.
