ފުށިދިއްގަރު ފަޅު ހިއްކައިގެން ތަރައްގީކުރަމުން އަންނަ ރަސްމާލޭގެ ބިން ހިއްކުމުގެ ޕްރޮޖެކްޓުގެ ދަށުން ހިއްކަމުން އަންނަ ސަރަހައްދުތަކުގެ ތެރެއިން ބޮޑެތި ސައިޓުތަކެއް ހިއްކާ ނިމެން ގާތްވެއްޖެ އެވެ.
ރަސްމާލޭގެ ސައިޓުތަކެއް ހިއްކާ މި ނިމެނީ، މި އަހަރުގެ އޭޕްރިލްގެ ފަހުން ބިން ހިއްކުމުގެ މަސައްކަތް ވަރަށް ބޮޑަށް މަޑުޖެހިފައި އޮތުމަށް ފަހު، މޯލްޑިވްސް އެއާޕޯޓްސް ކޮމްޕެނީ (އެމްއޭސީއެލް) އިން މިދިޔަ މަހު އަލުން މަސައްކަތް ފެށުމުންނެވެ.
އެމްއޭސީއެލްއިން މިހާރު ހިއްކަމުން އަންނަނީ އެ ކުންފުންޏާ ހަވާލުކޮށްފައިވާ ހަތަރު ސައިޓުގެ ތެރެއިން ފަހު ސައިޓު ކަމުގައިވާ، "ސައިޓު ބީ" އެވެ. ސެޓެލައިޓް ފޮޓޯތަކުން ދައްކާ ގޮތުގައި މި ސައިޓުގެ ހިއްކާ ނުނިމި ބާކީ އޮތީ ވަރަށް ކުޑަ ސަރަހައްދެކެވެ.
މިހާރު އެކީ ކަހަލަ ގޮތަކަށް ހިއްކާ ނިމިފައިވާ ރަސްމާލޭގެ އަނެއް ސައިޓަކީ ޗައިނާ ހާބާ އިންޖިނިއަރިން ކޯޕަރޭޝަން (ސީއެޗްއީސީ) އާ ހަވާލުކޮށްގެން ހިއްކަމުން އަންނަ "ސައިޓު ސީ" އެވެ. ރަސްމާލޭގެ ދެ ވަނައަށް އެންމެ ބިން ބޮޑު މި ސައިޓުގެ 190 ހެކްޓަރު ވަނީ ހިއްކާފަ އެވެ.
މި ދެ ސައިޓުގެ ބިން ހިއްކާ ނިމުމާއެކީ، ރަސްމާލެއަށް ހިއްކަން ބޭނުންވާ 1040 ހެކްޓަރުގެ ތެރެއިން 70 ޕަސެންޓަށް ވުރެ ބޮޑު ބައި ނިމޭނެ އެވެ. ސަރުކާރުން ބުނަމުން އަންނަނީ މި އަހަރުގެ ފަހުކޮޅަށް 100 ޕަސެންޓު ބިން ހިއްކާ ނިމޭނެ ކަމަށެވެ.
ރަސްމާލޭގެ ބޮޑު ބަޔެއް ހިއްކާ ނިމުނު ކަމުގައި ވިޔަސް، ރަސްމާލޭގެ އެންމެ ބޮޑު ސައިޓު ކަމުގައިވާ "ސައިޓު ޑީ" ހިމެނޭހެން އަދިވެސް ފަސް ސައިޓެއް ހިއްކާ ނިންމަން އެބައޮތެވެ. މި ސައިޓުތަކުގެ ތެރެއިން ރަސްމާލޭގެ ޓޫރިޒަމް ޒޯނުގެ ގޮތުގައި ކަނޑައަޅާފައިވާ "ސައިޓު އީ" ހިއްކަނީ ސީއެޗްއީސީއިންނެވެ. ދެން ހުރި ސައިޓުތަކަކީ މޯހަން މުތާ އެކްސްޕޯޓާ ހަވާލުކޮށްފައިވާ ސައިޓުތަކެކެވެ.
މޯހަން މުތާއާ ހަވާލުކުރި ހަތަރު ސައިޓުގެ ތެރެއިން އެ ކުންފުންޏަށް މިހާތަނަށް އެއްކޮށް ނިންމާލެވުނީ "ސައިޓު އެފް" އެވެ. އަދި، "ސައިޓު އެލް" ގެ ބޮޑު ބައެއް ވަނީ ހިއްކާ ނިންމާފަ އެވެ. މިހެން ނަމަވެސް އެ ކުންފުންޏަށް "ސައިޓު ޑީ" ގެ ހިއްކުނީ އެންމެ 17 ޕަސެންޓެވެ. އަދި، "ސައިޓު ޖީ" ހިއްކަން ނުވެސް ފަށަ އެވެ.
އަދަދު ނޫހުން ބެލި ސެޓެލައިޓް ފޮޓޯތަކުން ކަށަވަރު ކުރެވުނު ގޮތުގައި މިދިޔަ އަހަރުގެ ސެޕްޓެމްބަރުން ފެށިގެން މޯހަން މުތާގެ ހަވާލުގައިވާ އެއްވެސް ސައިޓެއްގައި އެއްވެސް މަސައްކަތެއް ނުހިނގަ އެވެ.
މި ސަރުކާރުގެ އެންމެ ބޮޑު ޕްރޮޖެކްޓު ކަމުގައިވާ ރަަސްމާލެ ހިއްކަން ފެށިތާ އަންނަ ޑިސެމްބަރު މަހަށް ތިން އަހަރު ވާނެ އެވެ. ސަރުކާރުން ބުނަނީ މިއީ ދިވެހިންނަށް ދިމާވެފައިވާ ބޯހިޔާވަހިކަން ނެތުމުގެ މައްސަލައަށް އޮތް ވަށައިޖެހޭ ފުރިހަމަ ހައްލެއް ނުވަތަ "ޓޯޓަލް ސޮލިއުޝަން" ކަމަށެވެ.
މިހެން ނަމަވެސް، މިއަދާ ހަމައަށް މި މަޝްރޫއަށް ހަރަދުވާ ވަރެއް ނޫނީ ފައިސާ ހޯދާ ގޮތެއް ވެސް ސަރުކާރާއި މި މަޝްރޫއު ހަވާލުކޮށްފައިވާ އެޗްޑީސީން ވެސް ނުބުނެ އެވެ.
މި މަޝްރޫއަށް ފައިސާ ހޯދާ ގޮތާ މެދު ހުރި ކަންބޮޑުވުންތަކުގެ އިތުރުން، މި މަޝްރޫއުގެ ސަބަބުން ތިމާވެއްޓަށް ކުރާ ނޭދެވޭ އަސަރުތަކާ ގުޅިގެން ހުރި ކަންބޮޑުވުންތައް ވެސް ގިނަ އެވެ.
