ދެކުނު ކޮރެއާގެ ގޭމިން މަހުޖަނު ކުއޮން ހިއުކް-ބިން، އޭނާގެ ކުރީގެ އަނބިމީހާއަށް މުދަލުގެ ގޮތުގައި 2.55 ޓްރިލިއަން ވޮން (1.87 ބިލިއަން ޑޮލަރު) ދިނުމަށް އެ ގައުމުގެ ކޯޓަކުން އަމުރުކޮށްފި އެވެ. މިއީ އެ ގައުމުގެ ތާރީޚުގައި ވެސް ކޯޓުން ވަރީގެ މައްސަލައެއް ދިން އެންމެ ބޮޑު ބަދަލެވެ.
ދެކުނު ކޮރެއާގެ ތިންވަނައަށް އެންމެ ބޮޑު ވީޑިއޯ ގޭމް ކުންފުނި ކަމަށްވާ "ސްމައިލްގޭޓް" އުފެއްދި ކުއޮންއަކީ އެ ގައުމުގެ އެންމެ މުއްސަނދި މީހުންގެ ތެރޭގައި ހިމެނޭ މީހެކެވެ. ބްލޫމްބާގުން އަންދާޒާކުރާ ގޮތުގައި އޭނާގެ މިލްކިއްޔާތުގައި 3 ބިލިއަން ޑޮލަރު އެބަ ހުއްޓެވެ.
ސްމައިލްގޭޓް ކުންފުންޏަކީ މިދިޔަ ބުދަ ދުވަހާ ހަމައަށް ކުއޮންގެ ފުރިހަމަ މިލްކިއްޔާތުގައި އޮތް ކުންފުންޏެކެވެ. ނަމަވެސް، ކޯޓުން މިހާރު ވަނީ އެ ކުންފުނީގެ 35 އިންސައްތަ ހިއްސާ، އޭނާގެ ކުރީގެ އަނބިމީހާ ލީ ހުވާ-ޖިންއަށް ބަދަލުކުރުމަށް އަމުރުކޮށްފަ އެވެ. އެ ހިއްސާގެ އަގު ގާތްގަނޑަކަށް 2.5 ޓްރިލިއަން ވޮންއަށް އަރާއިރު، މީގެ އިތުރުން ނަގުދު ފައިސާގެ ގޮތުގައި 65 ބިލިއަން ވޮން ދިނުމަށް ވެސް ކޯޓުން ވަނީ އަމުރުކޮށްފަ އެވެ.
މި ބަދަލަކީ މީގެ ކުރިން ދެކުނު ކޮރެއާގައި ރެކޯޑް ކުރެވުނު އެންމެ ބޮޑު އަދަދު ކަމަށްވާ 944 ބިލިއަން ވޮންއަށް ވުރެ ދެގުނަ ބޮޑު އަދަދެކެވެ. އެ ފަހަރު އެ އަދަދު ދިނުމަށް އަމުރުކޮށްފައިވަނީ ޓެކްނޮލޮޖީ ދާއިރާގެ މަހުޖަނު ޗޭ ތޭ-ވޮންގެ މައްޗަށެވެ.
ވަރިވުމުގެ މައްސަލަ ކޯޓަށް ހުށަހަޅަމުން ލީ އެދިފައިވަނީ ސްމައިލްގޭޓް ކުންފުނީގެ 50 އިންސައްތަ ހިއްސާ ހޯދުމަށެވެ. ބްލޫމްބާގުން ރިޕޯޓްކޮށްފައިވާ ގޮތުގައި، ލީގެ ވަކީލުން ކޯޓުގައި ބުނެފައިވަނީ ކުންފުނި އުފެއްދުމުގައި މާލީ ގޮތުން އޭނާގެ އެހީތެރިކަން ލިބިފައިވާ ކަމަށެވެ.
ކުއޮން އާއި ލީ ކައިވެނީގެ ގޮތުން ގުޅުނީ 2001 ވަނަ އަހަރު އެވެ. އެއީ ސްމައިލްގޭޓް ކުންފުނި އުފެއްދުމުގެ އެއް އަހަރު ކުރި އެވެ. އެ ކުންފުނިން އުފައްދާފައިވާ މަޝްހޫރު ގޭމްތަކުގެ ތެރޭގައި "ކްރޮސްފަޔާ" އާއި "ލޮސްޓް އާކް" ހިމެނެ އެވެ.
ލީ ކޯޓުގައި އިތުރަށް ބުނެފައިވަނީ، ވޭތުވެދިޔަ 20 އަހަރަށް ވުރެ ގިނަ ދުވަސް އޭނާ ހޭދަކުރީ ދަރިން ބެލުމާއި ގޭތެރޭގެ ކަންކަން ބެލެހެއްޓުމުގައި ކަމަށެވެ.
ނަމަވެސް ކުއޮން ވަނީ އެ ވާހަކަތައް ދޮގުކޮށްފަ އެވެ. އޭނާ ބުނި ގޮތުގައި ލީއަކީ ކުންފުނީގައި އެއްވެސް އިންވެސްޓްމަންޓެއް ކުރި ނުވަތަ މަސައްކަތެއް ކުރި މީހެއް ނޫނެވެ. މިއަހަރުގެ ކުރީކޮޅު ސްމައިލްގޭޓުން ނެރުނު ބަޔާނެއްގައި ބުނެފައިވަނީ ކުންފުނި ފެށުމަށް ބޭނުންވި ހުރިހާ ފައިސާއަކީ ކުއޮންގެ އަމިއްލަ ފައިސާ ކަމަށެވެ.
މި ހުކުމް އިސްތިއުނާފު ކުރުމުގެ ފުރުސަތު ދެ ފަރާތަށް ވެސް އަދި އެބައޮތެވެ.
މިއަހަރުގެ ޖުލައި މަހު، އެސްކޭ ގްރޫޕްގެ ޗެއާމަން ޗޭ ތޭ-ވޮންގެ މައްޗަށް ވެސް ވަނީ އޭނާގެ ކުރީގެ އަނބިމީހާއަށް 944 ބިލިއަން ވޮން ދިނުމަށް އަމުރުކޮށްފަ އެވެ. ނަމަވެސް، އެ މައްސަލައިގައި މުދަލުގެ އަގު ކަނޑައެޅުމުގައި ހިސާބު އޮޅިފައިވާ ކަމަށް ބުނެ ސުޕްރީމް ކޯޓުން ވަނީ އެ ހުކުމް ބާތިލުކޮށް، މައްސަލަ އަލުން ބެލުމަށް އަމުރުކޮށްފަ އެވެ.
