ދެ މިޝެލިން ސްޓާގެ ޝަރަފު ލިބިފައިވާ ދެކުނު ކޮރެއާގެ ސޯލްގެ ރެސްޓޯރެންޓަކުން، ފޮނިކާތަކެތި ޒީނަތްތެރިކުރުމަށް ހިނި ބޭނުންކުރި މައްސަލައެއްގައި އެ ރެސްޓޯރެންޓް ޖޫރިމަނާކޮށްފި އެވެ.
ދެކުނު ކޮރެއާގެ މީޑިއާތަކުން ރިޕޯޓްކޮށްފައިވާ ގޮތުގައި، ސޯލްގައި ހުންނަ "އެވެޓް" ރެސްޓޯރެންޓްގެ ވެރިޔާ 15 މިލިއަން ވޮން (10,965 ޑޮލަރު) އިން ވަނީ ޖޫރިމަނާކޮށްފަ އެވެ.
މީގެ އިތުރުން، ކާބޯތަކެތީގެ ރައްކާތެރިކަމާ ބެހޭ ގާނޫނާ ޚިލާފުވުމުގެ ސަބަބުން އެ ރެސްޓޯރެންޓް ހިންގާ ކުންފުނި 10 މިލިއަން ވޮން އިން ވަނީ ޖޫރިމަނާކޮށްފަ އެވެ.
އިރުމަތީ އޭޝިއާގެ ގައުމެއް ކަމަށްވާ ދެކުނު ކޮރެއާގައި އިންސާނުން ކެއުމަށް ހުއްދަދީފައިވާ 10 ބާވަތުގެ ސޫފީގެ ތެރޭގައި ހިނި ނުހިމެނެ އެވެ.
މި މައްސަލައިގައި ދައުލަތުގެ ވަކީލުން އެދިފައިވަނީ ރެސްޓޯރެންޓްގެ ވެރިޔާ އެއް އަހަރަށް ޖަލަށްލުމަށާއި 20 މިލިއަން ވޮން އިން ޖޫރިމަނާ ކުރުމަށެވެ. ނަމަވެސް، އޭނާ ކުށަށް އިއުތިރާފުވުމާއި މީގެ ކުރިން ކުށުގެ ރެކޯޑެއް ނެތުމުން، ފަނޑިޔާރު ވަނީ އެ ކަންކަމަށް ރިއާޔަތްކޮށް އަދަބު ލުއިކޮށްދީފަ އެވެ.
އެހެންނަމަވެސް، ކާބޯތަކެތީގެ މިންގަނޑުތަކާ ޚިލާފުވުމުގެ އިތުރުން، އެ ރެސްޓޯރެންޓުން ބޭނުންކުރި ހިނިތައް ޓެސްޓުކުރިއިރު އޭގައި ހުންނަންޖެހޭ މިންވަރަށް ވުރެ ގިނައިން "ހެވީ މެޓަލްސް" ނުވަތަ ވިހަ މާއްދާތައް ހުރިކަން ފާހަގަކުރެވިފައިވާ ކަމަށް ފަނޑިޔާރު ވިދާޅުވި ކަމަށް ރިޕޯޓްތައް ބުނެ އެވެ. އެހެންކަމުން، މިއީ ކުޑަ މައްސަލައެއްގެ ގޮތުގައި ބެލެވެން ނެތް ކަމަށް ފަނޑިޔާރު ފާހަގަކުރެއްވި އެވެ.
ރެސްޓޯރެންޓްގެ ވެރިޔާ ބުނި ގޮތުގައި، ދުނިޔޭގެ އެހެން ގައުމުތަކުގައި ވެސް ކާބޯތަކެތީގެ ގޮތުގައި ހިނި ބޭނުންކުރާތީ، ދެކުނު ކޮރެއާގައި އެއީ މަނާ ކަމެއްކަން އޭނާއަށް ކުރިން އެނގިފައެއް ނުވެ އެވެ.
"އެވެޓް" ރެސްޓޯރެންޓުން ތައްޔާރުކުރާ ސޯބޭ ފަދަ ފޮނިކާތަކެތީގެ މަތީގައި ހިނި ބޭނުންކުރާކަން ފަޅާއެރީ، އެ ގައުމުގެ މިނިސްޓްރީ އޮފް ފުޑް އެންޑް ޑްރަގް ސޭފްޓީއަށް އިންޓަނެޓްގައި ލިޔެފައިވާ ރިވިއުތަކާއި އޭގެ ފޮޓޯތައް ފެނުމާ ގުޅިގެންނެވެ.
އެ މިނިސްޓްރީން ބުނި ގޮތުގައި، ކާބޯތަކެތީގައި "ހުތް ރަހައެއް" ޖެއްސުމަށްޓަކައި، ގާތްގަނޑަކަށް ހަތަރު އަހަރު ދުވަހުގެ މުއްދަތަށް ބައެއް ކާތަކެތީގެ މައްޗަށް ތިނަކާއި ފަހަކާ ދެމެދުގެ އަދަދަކަށް ހިނި ބުރުވަމުން ގޮސްފައިވެ އެވެ. މި މުއްދަތުގެ ތެރޭގައި ޖުމްލަ 49،000 އެއްހާ ހިނި ކާބޯތަކެތި ޒީނަތްތެރިކުރުމަށް ބޭނުންކޮށްފައިވާ ކަމަށް ލަފާކުރެވެ އެވެ.
މިނިސްޓްރީން ހާމަކުރި ގޮތުގައި، މި ހިނިތަކުގެ ތެރެއިން ގިނަ ހިނި އެތެރެކޮށްފައިވަނީ އެމެރިކާއިންނެވެ. އަދި ބައެއް ހިނި ތައިލެންޑުން ވެސް އެތެރެކޮށްފައިވެ އެވެ.
ރެސްޓޯރެންޓްގެ ވެރިޔާގެ ދިފާއުގައި ބުނެފައިވަނީ، ހިނި ބޭނުންކުރީ އެ ރެސްޓޯރެންޓްގެ 15 ބާވަތުގެ މެނޫގެ ތެރެއިން ވަރަށް ކުޑަ މިންވަރެއްގައި ކަމަށެވެ. އަދި ކަސްޓަމަރުން ހިނި ކާން ބޭނުން ނުވާނަމަ، އެ ނޫން އެހެން ބާވަތެއް ބޭނުންކުރުމުގެ އިޚްތިޔާރު ދީފައިވާނެ ކަމަށް ވެސް އޭނާ ބުންޏެވެ.
އޭޝިއާ، އެފްރިކާ އަދި ލެޓިން އެމެރިކާގެ ބައެއް ސަގާފަތްތަކުގައި ހިންޏަކީ ކެއުމަށް ބޭނުންކުރާ، އަދި ބައެއް ފަހަރު ވަރަށް އަގުބޮޑު މީރު ކާއެއްޗެއްގެ ގޮތުގައި ބެލެވޭ އެއްޗެކެވެ. އެގޮތުން ތައިލެންޑާއި ކެމްބޯޑިއާގެ ކާތަކެތީގައި "ވީވާ އެންޓްސް" އާއި އޭގެ ބިސް ބޭނުންކުރާއިރު، ކޮލަމްބިއާގައި ބައެއް ބާވަތުގެ ހިންޏަކީ "ކެވިއާ" ފަދަ އަގުބޮޑު މީރު ކާއެއްޗެއްގެ ގޮތުގައި ބަލާ އެއްޗެކެވެ.
މިޝެލިން ގައިޑުން ބުނާ ގޮތުގައި، ދެ ތަރީގެ ރެސްޓޯރެންޓެއްގެ ދަރަޖަ ދެނީ "ނުހަނު ފުރިހަމަ ކާތަކެތި" ތައްޔާރުކުރާ އަދި އެ ތަނަކަށް ޒިޔާރަތްކޮށްލުމަކީ ބޭކާރު ކަމަކަށް ނުވާނެ ފަދަ ފެންވަރު ރަނގަޅު ތަންތަނަށެވެ.
