އިންޑޮނީޝިއާގެ ބާލީގެ މަޝްހޫރު ފަތުރުވެރި ސަރަހައްދެއްގައި ހުރި ބަންގަލޯއެއްގެ ތެރޭގައި، އޮސްޓްރޭލިއާގެ ފިރިހެނަކާއި އޭނާގެ ދެ ދަރިން މަރުވެފައި ތިއްބާ ފެނުމާ ގުޅިގެން އެ ގައުމުގެ ފުލުހުން ތަހުގީގު ފަށައިފި އެވެ.
ބާލީގެ ކޫޓާގައި ހުންނަ ގޭގެ ތެރޭގައި މަރުވެފައި ތިއްބާ އާދީއްތަ ދުވަހު ފެނިފައިވަނީ އުމުރުން 56 އަހަރުގެ ޑޭމިއަން ޖޯން ޝޯ އާއި އޭނާގެ ހަ އަހަރުގެ ފިރިހެން ދަރިފުޅުގެ އިތުރުން ހަތަރު އަހަރުގެ އަންހެން ދަރިފުޅެވެ.
ފުލުހުން ބުނި ގޮތުގައި، އެ މީހުން ދިރިއުޅޭ ގެއަށް އަވަށްޓެރިން ގޮސް ބަލާފައިވަނީ ޝޯގެ އަންހެނުން ގުޅައި، އޭނާގެ ފިރިމީހާއާ ފޯނުން ވާހަކަދެއްކުމަށް ފަހު ކަންބޮޑުވުންތަކެއް ހުރުމުން އެދުމާ ގުޅިގެންނެވެ. އެ ހާދިސާ ހިނގި ވަގުތު އޭނާ ބާލީއަކު ނެތެވެ.
އޮސްޓްރޭލިއާގެ މީޑިއާތަކުން ރިޕޯޓްކޮށްފައިވާ ގޮތުގައި، ފުލުހުން މި މައްސަލަ ބަލަމުންދަނީ މީހަކު މަރާލުމަށްފަހު އަމިއްލައަށް މަރުވި މައްސަލައެއްގެ ގޮތުގަ އެވެ. ނަމަވެސް، ބީބީސީއަށް މައުލޫމާތު ދެމުން ފުލުހުން ބުނީ އެ މީހުން މަރުވި ސަބަބު ނުވަތަ މަރުވި ގޮތް އަދި ކަށަވަރު ނުވާ ކަމަށާއި، އިތުރު ތަހުގީގުތައް ކުރިއަށްދާ ކަމަށެވެ.
ފުލުހުން ބުނި ގޮތުގައި، ޝޯގެ އަންހެނުން އަވަށްޓެރިއަކަށް ގުޅީ، ފިރިމީހާއާ ފޯނުން ވާހަކަދައްކަން ހުއްޓާ އެތަނުން އެއް ކުއްޖަކު ރޮއިގަތް އަޑު އިވުމުންނެވެ. އޭގެ ފަހުން އޭނާއަށް ފިރިމީހާއާ ގުޅޭގޮތް ވަނީ ނުވެފަ އެވެ.
ރިޕޯޓްތައް ބުނާ ގޮތުގައި، ޝޯގެ އަންހެނުން މިދިޔަ ދުވަސްތަކުގައި ހުރީ އިންޑޮނީޝިއާގެ ވެރިރަށް ޖަކާޓާގަ އެވެ.
ފުލުހުން ބުނި ގޮތުގައި، އަވަށްޓެރިޔާ އިތުރު ބަޔަކާއެކު އެ ގެއަށް ގޮސް ދޮރުގައި ޓަކިޖެހުމުންވެސް ޖަވާބެއް ނުލިބުމުން، އެ މީހުން ވަނީ ގަދަކަމުން ގެއަށް ވަދެފަ އެވެ. އެ ތިން މީހުންގެ ހަށިގަނޑު ފެނުނީ ގޭގެ ތެރެއިންނެވެ.
ފުލުހުން ބުނި ގޮތުގައި ޝޯ އަކީ ހުޅަނގު އޮސްޓްރޭލިއާގެ ފްރީމެންޓްލްއަށް ނިސްބަތްވާ މީހެކެވެ. އެ ސްޓޭޓްގެ ޕްރިމިއާ ރޮޖާ ކުކް ވަނީ މިއީ ވަރަށް ހިތާމަވެރި އަދި ބިރުވެރި ހާދިސާއެއްގެ ގޮތުގައި ސިފަކުރައްވާފަ އެވެ.
