ރޭ ނިމުނު 50 ވަނަ ގައުމީ ބެޑްމިންޓަން މުބާރާތުގެ ޓީމު އިވެންޓްގެ އަންހެން އަދި ފިރިހެން ކެޓަގަރީގެ ތަށި ވެސް މުބާރާތުގައި ފުރިހަމަ ކާމިޔާބެއް ހޯދި ރިވައިވަލް ސްޕޯޓްސް ކްލަބުން ހާސިލްކޮށްފި އެވެ.
މިއާ އެކު، ރިވައިވަލް އިން މި ވަނީ މި ފަހަރުގެ ގައުމީ މުބާރާތުގެ ފުރަތަމަ ޑިވިޝަނުގެ ހަތް އިވެންޓުން ވެސް ތަށި ހޯދައިފަ އެވެ. އެ ގޮތުން، މީގެ ކުރިން، އޯޕަން އިވެންޓްސްތަކުގައި، ފައިނަލުގައި މުޅިން ކުޅެފައިވަނީ ރިވައިވަލް ކުޅުންތެރިންނެވެ. މިއީ، ގައުމީ ބެޑްމިންޓަން މުބާރާތެއްގައި އެއް ކްލަބެއް މިހާތަނަށް ހޯދި އެންމެ ބޮޑު ކާމިޔާބެވެ.
ފުރަތަމަ ޑިވިޝަނުގެ ފިރިހެން ޓީމު އިވެންޓްގައި އަށް ޓީމު ވާދަކުރި އެވެ. އިވެންޓުގެ ފައިނަލުގައި، ރިވައިވަލް ސްޕޯޓްސް އިން ކުޅުނީ ޕޮލިސް ކްލަބާ އެވެ. ޕޮލިސް ކްލަބުން ފައިނަލަށް އައީ ސެމީގައި ރިވައިވަލް ބެޑްމިންޓަން ކްލަބް ބަލިކުރުމަށް ފަހު އެވެ. ފައިނަލުގައި، ރިވައިވަލް ސްޕޯޓްސް އިން ވަނީ 3-1 މެޗުން ޕޮލިސް ބަލިކޮށްފަ އެވެ.
އެ ގޮތުން، ފުރަތަމަ ސިންގަލްސްގައި ރިވައިވަލްގެ ޖެލާން ފަޖަރު ވަނީ 15-5، 15-1 އިން ޕޮލިހުގެ އަހުމަދު ތޯއިފް މުހައްމަދު ބަލިކޮށްފަ އެވެ. ދެ ވަނަ ސިންގަލްސް އިން ރިވައިވަލްގެ ސޫރްޔާ އަދީ ޕަމްޕުދީ ވަނީ 15-11، 15-11 އިން ޕޮލިހުގެ ޕްރިންޔަވަތު ތޮންގުނަމް ބަލިކޮށްފަ އެވެ. ތިން ވަނަ ސިންގަަލްސްގައި ރިވައިވަލްގެ ނިބާލް އަހުމަދުގެ މައްޗަށް ޕޮލިހުގެ ޕްރިންސް ޑާހަލް ވަނީ 15-8، 15-10 އިން ކުރިހޯދައިފަ އެވެ.
އެ އަށް ފަހު، ދެން ކުޅުނު ފުރަތަމަ ޑަބަލްސް މެޗުން ރިވައިވަލްގެ ނަޝީއު ޝަރަފުއްދީން އާއި ޖެލަންގްގެ ޕެއާ އިން ވަނީ 15-10، 15-12 އިން ކާމިޔާބު ހޯދައި މެޗުން މޮޅުވެފަ އެވެ. ރިވައިވަލް ސްޕޯޓްސް އިން ތަށި އުފުލާލީ ކުޅުނު ހުރިހާ މެޗަކުން މޮޅުވެގެންނެވެ.
އަންހެން ޓީމު އިވެންޓްގައި ތިން ޓީމެއް ކުޅުނުއިރު، ރިވައިވަލް އިން ތަށި ހޯދީ ކުޅުނު ހުރިހާ މެޗަކުން މޮޅުވެގެންނެވެ. އެ ގޮތުން، ފައިނަލުގައި ރިވައިވަލް އިން ބައްދަލުކުރީ ސީއެސް ސްޕޯޓްސްއާ އެވެ. ފައިނަލުން ރިވައިވަލް މޮޅުވީ ފުރަތަމަ ތިން ސިންގަލްސް މެޗުތަކުން މޮޅުވެ، 3-0 އިންނެވެ. ދެ ޑަބަލްސް މެޗަށް ނުގޮސް ރިވައިވަލް އިން ވަނީ ފައިނަލުން މޮޅުވެފަ އެވެ.
ފުރަތަަމަ ސިންގަލްސްގައި ރިވައިވަލްގެ ފާތިމަތު ނަބާހާ (ނަބާ) ވަނީ ސީއެސްގެ ޔަލްވީ ހުސެއިން ޒުހުރީ އަތުން 15-8، 15-10 އިން މޮޅުވެފަ އެވެ. ދެ ވަނަ ސިންގަލްސްގައި ރިވައިވަލްގެ އައިމިނަތު ނަބީހާ (ނަބީ) ވަނީ ސީއެސްގެ އައިމިނަތު ފަރްހާ ފަރޫޒާން އަތުން 15-6، 15-1 އިން މޮޅުވެފަ އެވެ. ތިން ވަނަ ސިންގަލްސްގައި ރިވައިވަލްގެ ނުރާނީ ރަތޫ އަޒަހްރާ ވަނީ 15-2، 15-6 އިން ސީއެސްގެ ކިޔާން އާދިލް މުހައްމަދު އަތުން މޮޅުވެފަ އެވެ.
ޓީމު އިވެންޓްގެ ދެ ވަނަ ޑިވިޝަނަށް ބަލާއިރު، ފިރިހެން ކެޓަގަރީގެ ޗެމްޕިއަންކަން ރައިޒިން ސްޓާ ފޯ ވިލިފުށީ ރެކްރިއޭޝަނުން ވަނީ 3-2 ސެޓުން ސީއެސް ސްޕޯޓްސް ބަލިކޮށް ހޯދައިފަ އެވެ. އަދި، ދެ ވަނަ ޑިވިޝަނުގެ އަންހެން ކެޓަގަރީގެ ތަށި ހޯދީ އެމް ސްޕޯޓްސް އިންނެވެ. އެއީ، ފައިނަލުގައި 3-0 އިން ޓޫޒީ ސްޕޯޓްސް ބަލިކޮށްފަ އެވެ.
