މިހާރު ކުރިއަށްދާ 50 ވަނަ ގައުމީ ބެޑްމިންޓަން މުބާރާތުގެ ފިރިހެން ސިންގަލްސް ސެމީ ފައިނަލުގައި ޒަޔާން ޒަކީ ބަލިކޮށް، ހައިޝަމް އިބްރާހިމް އަލީ، މުބާރާތުގެ ފައިނަލުގައި ނިބާލް އަހުމަދާ ދެކޮޅަށް ނުކުންނަން ތައްޔާރުވެއްޖެ އެވެ.
ކުޅިވަރު އެކުވެނި ބެޑްމިންޓަން ކޯޓުގައި މިއަދު ގައުމީ މުބާރާތުގެ އެއް ވަނަ އާއި ދެ ވަނަ ޑިވިޝަނުގެ ފައިނަލް މެޗުތައް ކުޅޭއިރު، އެއް ވަނަ ޑިވިޝަނުގެ ފަސް ފައިނަލުގަައި މުޅިން ވެސް ކުޅޭނީ ރިވައިވަލް ސްޕޯޓްސްގެ ކުޅުންތެރިންނެވެ. މިއީ، ގައުމީ މުބާރާތެއްގެ އެއް ވަނަ ޑިވިޝަނުގެ ހުރިހާ ފައިނަލެއްގެ ދެކޮޅުގައި ވެސް އެއް ކްލަބެއްގެ ކުޅުންތެރިން ކުޅޭނެ ފުރަތަމަ ފަހަރެވެ.
ގައުމީ މުބާރާތުގެ އެންމެ ފަަހުގެ ޗެމްޕިއަން، ޒަޔާން ޒަކީ އަށް ސެމީ ފައިނަލުގައި ނާކާމިޔާބުވީ ހައިޝަމް އަތުންނެވެ. ކުރިން އަތޮޅު ލީގުގެ ފިރިހެން ސިންގަލްސް ޗެމްޕިއަންކަން ހޯދާފައިވާ، ވ. ކެޔޮދޫ އަށް ނިސްބަތްވާ ހައިޝަމް ބްރޭކަކަށް ފަހު އަލުން ކުޅުމުގެ ތެރެއަށް އައިސް މި ވަނީ ދެ އަހަރު ތެރޭ ގައުމީ ސިންގަަލްސް ފައިނަލުން ޖާގަ ހޯދައިފަ އެވެ. ސެމީ ފައިނަލުގައި ޒަޔާން ޒަކީ އަތަުން ހައިޝަމް މޮޅުވީ، 15-6، 11-15، 15-4 އިންނެވެ.
މީގެ ކުރިން، ތިން ގައުމީ ސިންގަލްސް ފައިނަލުގައި ކުޅެ ބަލިވި ނިބާލް ވަނީ 2022 ވަނަ އަހަރުގެ ގައުމީ ތަށި އުފުލާލައިފަ އެވެ. އެންމެ ފަހުން، 2023 ވަނަ އަހަރުގެ ފައިނަލުގައި ބަލިވި ނިބާލް މި ފަަހަރުގެ ފައިނަލުން ޖާގަ ހޯދީ ސެމީގައި، ހަސަން ޒަޔާން މުހައްމަދުގެ މައްޗަށް ކުރިހޯދައިފަ އެވެ. ނިބާލް ވަނީ 16-14 އާއި 15-10 އިން ސެޓުތައް ގެންގޮސް ހަސަން ޒަޔާން ބަލިކޮށްފަ އެވެ.
ފިރިހެން ޑަބަލްސް ފައިނަލުގައި ކުޅޭނީ ޒަޔާން ޒަކީ އާއި ނިބާލްގެ ޕެއާ އާއި ހައިޝަމް އާއި ހަލަފް އިމްރާންގެ ޕެއާ އެވެ. ޒަޔާން ޒަކީ އާއި ނިބާލް ވަނީ ކުއާޓާ ފައިނަލުގައި 15-13، 15-9 އިން މުހައްމަދު އަޖުފާން ރަޝީދު އާއި ޔޫނުސް ކައިފް މުހައްމަަދު އަތުން މޮޅުވެފަ އެވެ. އަދި، ސެމީ ފައިނަލުަގައި އާސިރު ނިޒާރު އާއި އިބްރާހިމް ހުޝާމް އަތުން މޮޅުވީ 15-9، 15-4 އިންނެވެ. ހައިޝަމް އާއި ހަލަފް، ފުރަތަމަ ފަހަރަށް ޑަބަލްސް ފައިނަލަކަށް ދިޔައިއިރު، ކުއާޓާ ފައިނަލުގައި އިބްރާހިމް ޝާމިއު އާއި ޔައުގޫބް އަލްވިން ބިން ހުޝާމް އަތުން ވަނީ 15-12، 13-15 އަދި 15-9 އިން މޮޅުވެފަ އެވެ. އަދި، ސެމީ ފައިނަލުގައި ހައިޝަމް އާއި ހަލަފް ވަނީ އަހުމަދު އަޔާން ބިން މުހައްމަދު ސޮލާހު އާއި ހަސަން ޒަޔާން އަތުން 16-14، 15-11 އިން މޮޅުވެފަ އެވެ.
އަންހެން ސިންގަލްސްގެ އެންމެ ފަހުގެ ޗެމްޕިއަން، ނަބީ މި ފަހަރުގެ ފައިނަލުން ފުރުސަތު ހޯދީ ލައިބާ އަހުމަދު މަހުލޫފް 15-8، 15-6 އިން ބަލިކޮށްފަ އެވެ. އަދި، ކުރިން ގައުމީ ތަށި އުފުލާލައިފައިވާ، ނަބާ ފައިނަލަށް ދަތުރުކުރީ ކިޔާން އާދިލް މުހައްމަދު އަތުން 15-1، 15-4 އިން މޮޅުވެގެންނެވެ.
އަންހެން ޑަބަލްސް ފައިނަލުގައި އެންމެ ފަހުގެ ޗެމްޕިއަން، ނަބާ އާއި ނަބީގެ ޕެއާ އިން ވާދަކުރަނީ ރިވައިވަލްގެ މައިސާ ފަތުހުﷲ އިސްމާއިލް އާއި އައިޝަތު އަފްނާން ރަޝީދުގެ ޕެއާއާ އެވެ. ނަބާ އާއި ނަބީ ފައިނަލަށް ދިޔައީ އައިޝަތު ނިޔަމް ސާއިދު އާއި ލައިސާ ޝަޒްވާން އަހުމަދުގެ ޕެއާ އަތުން 15-4، 15-2 އިން މޮޅުވެގެންނެވެ. މައިސާ އާއި އަފަްނާން ވަނީ ސެމީ ފައިނަލުގައި އައިޝަތު ޒޯޔާ ހުސެއިން އާއި ޝުބާ މުހައްމަދު ޝަރީފް 15-9، 15-12 އިން ބަލިކޮށްފަ އެވެ.
މިކްސް ޑަބަލްސް ފައިނަލުގައި އެންމެ ފަހުގެ ޗެމްޕިއަން، ޒަޔާން އާއި ނަބާގެ ޕެއާ އިން ކުޅޭނީ ނަބީ އާއި ނިބާލްގެ ޕެއާއާ އެވެ. ޒަޔާން އާއި ނަބާ ފައިނަލަށް ދަތުރުކުރީ، ހައިޝަމް އާއި މައިސާ، 15-12، 15-13 އިން ބަލިކޮށްފަ އެވެ. އަދި، ނިބާލް އާއި ނަބީ ފައިނަަލަށް ދަތުރުކުރީ، އަޖުފާން އާއި އައިޝަތު ޔޫހާ އަހުމަދު، 15-8، 15-6 އިން ބަލިކޮށްފަ އެވެ.
