ރާއްޖެ ބެޑްމިންޓަންގައި އަންހެން ސިންގަލްސް އިވެންޓުގެ ވާދަވެރިކަން ބޮޑުވެ، އުނދަގޫ މެޗުތަކެއް ކުޅެގެން ކާމިޔާބު ހޯދުމަކީ އެންމެ ބޮޑު އުންމީދު ކަމަށް މިހާރު ކުރިއަށްދާ 50 ވަނަ ގައުމީ ބެޑްމިންޓަން މުބާރާތުގެ އަންހެން ސިންގަލްސް ޗެމްޕިއަންކަން ހޯދި، ގައުމީ ބެޑްމިންޓަން ޓީމުގައި ހިމެނޭ، ރިވައިވަލް ސްޕޯޓްސްގެ ފާތިމަތު ނަބާހާ އަބްދުއް ރައްޒާގު (ނަބާ) ބުނެފި އެވެ.
އަންހެން ސިންގަލްސްގެ އިތުރުން، ނަބާ ވަނީ އަންހެން ޑަބަލްސް އާއި މިކްސް ޑަބަލްސް ޗެމްޕިއަންކަން ހޯދައިފަ އެވެ.
ކެރިއަރުގައި މިހާތަނަށް ގައުމީ މުބާރާތްތަކުގަައި އެކަނި ވެސް ނަބާ ވަނީ ތިން އިވެންޓުގައި ވާދަކޮށް، 17 ތަށި ހޯދައިފަ އެވެ. އޭގެ ތެރެއިން ފަސް ތަށްޓަކީ، އަންހެން ސިންގަލްސް އިވެންޓުން ހާސިލްކުރި ކާމިޔާބެވެ.
"އަދަދު ސްޕޯޓްސް" އަށް ދިން އިންޓަވިއުއެއްގައި ނަބާ ބުނީ، ހަގީގަތަކީ އަންހެން އިވެންޓްގައި ވާދަވެރިކޮށް އުނދަގޫ މެޗަކަށް ދިޔައީ ފައިނަލް އެކަނި ކަމަށެެވެ.
ނަބާ ފަސް ވަނަ ފަހަރަށް ގައުމީ ޗެމްޕިއަންކަން ހޯދައިފި
50 ވަނަ ގައުމީ ބެޑްމިންޓަން މުބާރާތުގެ އަންހެން ސިންގަލްސް ފައިނަލުގައި އައިމިނަތު ނަބީހާ ބަލިކޮށް، ފާތިމަތު ނަބާހާ ފަސް ވަނަ ފަހަރަށް ގައުމީ ޗެމްޕިއަންކަން ހޯދައިފި. މީގެ އިތުރުން ނަބާހާ އާއި ނަބީހާގެ ޕެއާ އިން ވަނީ އަންހެން ޑަބަލްސް ތަށި ހަ ވަނަ ފަހަރަށް ދިފާއުކޮށް، ނަބާހާ އާއި ޒަޔާންގެ ޕެއާ އިން މިކްސް ޑަބަލްސް ޗެމްޕިއަންކަން ވެސް ހޯދާފައި.
"އަސްލު އަނެއްހެން ތެދައް ބުނާނަމަ، ފައިނަލްގައި ކަންނޭނގެ ކިރިޔާ ވެސް ޓަފް މެޗެއް މި ޖެހުނީ، ނަބީއާ އެއްކޮށް. ބޭނުންވި ވަރަށް ކޮމްޕެޓިޓިވް އެއް ނޫން އަސްލު، ތެދައް ބުނާނަމަ، ރާއްޖޭގައި މިހާރުގެ އަންހެން ސިންގަލްސް އޮތްގޮތުން. އުންމީދުކުރަނީ ކުރިއަށް އޮތްތާގައި ދެން، އަންނަ ތިބި ކުދިން ވެސް ނަބާ މެންނާ ރަނގަޅަށް ޓަފް ކޮމްޕެޓިޝަން އެއް ދޭ ވަރަށް ޕްރޮގްރެސް ވަމުން އައިސް ނަބާ މެންނަށް ރަނގަޅު ކޮމްޕެޓިޝަނެއް ދީފައި ގައުމީ ވެސް ނަގާނެ ކަމަށް،" 2018. 2019، 2021، 2022 އަދި 2026 ގެ ގައުމީ އަންހެން ސިންގަލްސް ޗެމްޕިއަން، ނަބާ ބުންޏެވެ.
ނަބާ ފައިނަލަށް ދަތުރުކުރީ ކިޔާން އާދިލް މުހައްމަދު އަތުން 15-1، 15-4 އިން މޮޅުވެގެންނެވެ. ފައިނަލުގައި، އައިމިނަތު ނަބީހާ އަބްދުއްރައްޒާގު (ނަބީ) އަތުން ނަބާ މޮޅުވީ، 15-6، 15-12 އިންނެވެ.
ނަބާ ބުނީ، ގިނަ ކާމިޔާބީތަކެއް ލިބި މި ލެވަލްގައި ހިފަަހައްޓައިގެން އަދިވެސް ކުރިއަށް ދާން ފުރުސަތު އޮތުމަކީ އެންމެ ބޮޑު ހިތްހަމަ ޖެހުން ކަމަށެވެ.
"އަދިވެސް މިހެން ޓޮޕް ލެވަލްގައި ރާއްޖޭގައި ވެސް، އިންޓަނޭޝަނަލް ވެސް މިހެން ކޮމްޕީޓްކޮށް، މިހެން ކުޅެލަން ލިބޭތީ، އެ ގޮތަށް ފިޓްނަސް ހުރީތީ ވަރަށް ބޮޑަށް މޯޓިވޭޓްވޭ ކުރިއަށް އޮތްތާގައި ވެސް ހަަމަ، މި ގޮތަށް ޓްރެއިނިން ހަދަމުން މި ކަހަލަ ކާމިޔާބީތައް ހޯދަން،" ނަބާ ބުންޏެވެ.
ރިވައިވަލް އިން ވަނީ ދާދި ފަހުން، މެލޭޝިއާގައި ދެ މަސް ދުވަހުގެ ޓްރެއިނިން ކޭމްޕެއް ކުރިއަށް ގެންގޮސްފަ އެވެ. ނަބާ ބުނީ، މެލޭޝިއާ ކޭމްޕަކީ ގައުމީ ބެޑްމިންޓަން މުބާރާތާއި އޭޝިއަން ގޭމްސް އަށް ތައްޔާރުވާން ލިބުނު ރަނގަޅު ޓްރެއިނިންތަކެއް ކަމަށެވެ.
"(ޓްރެއިނިން ކޭމްޕްގައި) ޕްރެޕަރޭޝަން އާ ދޭތެރޭ އަސްލު ބުނަންޏާ، ކޭމްޕަށް ދިޔަ ފަހުންނާއި ނަބާ ބަލިވެގެންނާއި އިންޖަރީ ކުޑަކޮށް ގޯސްވެގެންނާ އެއްކޮށް، ބޭނުންވި ވަރަކަށް ޓްރެއިނިން އެއް ނުއެއް ހެދުނު. އެކަމަކު، ވެސް ހިތްހަމަޖެހޭ. އޭގެ، ރިޒަލްޓް މި ފެނުނީ (ގައުމީ) މުބާރާތުގައި،" މި އަަހަރު ބޭއްވި ބެޑްމިންޓަން އެސޯސިއޭޝަން ޗެމްޕިއަންޝިޕްގެ އަންހެން ސިންގަލްސް ޗެމްޕިއަންކަން ހޯދި، ނަބާ ބުންޏެވެ.
ޗަޕާނުގައި މިއަދު ފަށާ އޭޝިއަން ގޭމްސްގެ ބެޑްމިންޓަން އިވެންޓް އޮތީ މި މަހު 25 ވަނަ ދުވަހު އެވެ. ނަބާގެ އިތުރުން، އޭޝިއަން ގޭމްސް އަށް ދާ ގައުމީ ބެޑްމިންޓަން ސްކޮޑުގައި ތިބީ ނަބީ އާއި ޒަޔާން ޒަކީ އަދި ނިބާލް އަހުމަދު އެވެ.
