ޕެރިސް (ސެޕްޓެމްބަރު 21) - ފްރެންޗް ލީގުގައި ރޭ 2-1 އިން މާސޭ ބަލިކޮށް، އެންމެ ފަހުގެ ޗެމްޕިއަން، ޕީއެސްޖީން މި ފަހަރުގެ ލީގުގައި ދެ ވަނަ މޮޅު ހޯދައިފި އެވެ.
މި ފަހަރުގެ ފުޓްބޯޅަ ސީޒަނުގައި ޕީއެސްޖީން ކުޅުނު ފުރަތަމަ މެޗުގައި ވަނީ ޔުއެފާ ސުޕަ ކަޕްގައި އެސްޓަން ވިލާ އަތުން މޮޅުވެފަ އެވެ.
އެކަމަކު، އޭގެ ފަހުން، ޕީއެސްޖީން ކުޅުނު ހަތަރު މެޗުން ވެސް މޮޅެއްނުވެވުނެވެ.
އެ ގޮތުން، ފްރެންޗް ސުޕަ ކަޕް މެޗުގައި ލޯންސް އަތުން ބަލިވިއިރު، ފްރެންޗް ލީގުގެ ފުރަތަމަ ތިން މެޗު ނިންމާލާފައި ވަނީ މޮޅެއް ނުލިބި އެވެ. ލީގުގެ ފުރަތަމަ ދެ މެޗުން އެއްވަރުވި ޕީއެސްޖީ ވަނީ ތިން ވަނަ އަށް ކުޅުނު މެޗުގައި އަމިއްލަ ދަނޑުގައި މޮނާކޯ އަތުން 2-1 އިން ބަލިވެފަ އެވެ.
އެކަމަކު، އޭގެ ފަހުން، ބްރެސްޓް އަތުން މޮޅުވުމަށް ފަހު، ރޭ މާސޭ ދަނޑުގައި ކުޅެ ވެސް މި ވަނީ މޮޅުވެފަ އެވެ.
ރޭގެ މެޗުގައި ޕީއެސްޖީ އަށް ލީޑުނަގައިދިނީ 66 ވަނަ މިނިޓްގައި ފެރާން ޓޮރޭސް އެވެ. މިއީ، ޕީއެސްޖީގެ ޑެޒީރޭ ޑޫއޭ ދިން ބޯޅައަކުން ފެރާން ޖެހި ގޯލެކެވެ. ބްރެސްޓް އަތުން މޮޅުވި މެޗުގައި ވެސް ޕީއެސްޖީގެ ހަމައެކަނި ލަނޑު ޖެހީ ފެރާން އެވެ.
ޕީއެސްޖީން ލީޑުނެގިތާ ހަ މިނިޓް ފަހުން، މާސޭ އިން އެއްވަރުކުރި އެވެ. އެ ގޮތުން، 72 ވަނަ މިނިޓްގައި މާސޭ އަށް މި ލަނޑު ޖަހައިދިނީ، އޭންޖެލް ގޯމޭސް އެވެ. ލިބުނު ފުރުސަތުގައި އޭނާ ވަނީ ހަމަޖެހިލައިފައި ގޯލަށް ބޯޅަ ވައްދާލައިފަ އެވެ. އޭގެ ފަސް މިނިޓް ފަހުން، ޕީއެސްޖީ މެޗުން މޮޅުކޮށްދިން ލަނޑު ޖެހީ ޓީމުގެ ކެޕްޓަން، މާކީނިއޯސް އެވެ. ދެ ވަނަ ފަހަރަށް ފޮނުވާލަން ލިބުނު ފުރުސަތުގައި މާކީނިއޯސް ޖެހި ބޯޅަ ހުއްޓުވަން މާސޭގެ ކީޕަރު، ޖެފްރޭ ޑެ ލޯންޖަށް މާ ބޮޑު ކަމެއް ނުކުރެވުނެވެ.
މާސޭ އިން މެޗު ނިންމާލީ ކުޅުންތެރިއަކު މަދުކޮށެވެ. އެއީ، އެ ޓީމުގެ ޓިމޮތީ ވެއާ އަށް ރަތެއް ދެއްކުމުންނެވެ. ވެއާ އަށް ދެ ވަނަ ރީނދޫ ކާޑަކާ އެކު ރަތެއް ދެއްކީ، ޕީއެސްޖީގެ ނޫނޯ މެންޑޭސް އަށް ކުރި ފައުލަކާ ގުޅިގެންނެވެ.
ތިން ހަފްތާ އަށް ދިގުދެމިގެންދާ ފީފާ އިންޓަނޭޝަނަލް ބްރޭކަށްދާއިރު، ފްރެންޗް ލީގުގެ އެއް ވަނައިގައި ފަސް މެޗުން 13 ޕޮއިންޓާ އެކު އޮތީ މޮނާކޯ އެވެ. ޕީއެސްޖީ، ހަ ވަނައިގައި އޮތީ ފަސް މެޗުން އަށް ޕޮއިންޓް ހޯދައިގެންނެވެ.
