ޕެރިސް (ސެޕްޓެމްބަރު 14) - މި ވަގުތު ރަނގަޅު ފޯމެއްގައި ހުރި ފޯވާޑް، ފެރާން ޓޮރޭސް ޖެހި ހަމައެކަނި ގޯލުން 1-0 އިން ބްރެސްޓްގެ މައްޗަށް ކުރިހޯދައި، ޕީއެސްޖީން މި ފަހަރުގެ ފްރެންޗް ލީގުގައި ފުރަތަމަ ފަހަރަށް މެޗަކުން މޮޅުވެއްޖެ އެވެ.
މި ފަހަރުގެ ފުޓްބޯޅަ ސީޒަނުގައި ޕީއެސްޖީން ކުޅުނު ފުރަތަމަ މެޗުގައި ވަނީ ޔުއެފާ ސުޕަ ކަޕްގައި އެސްޓަން ވިލާ އަތުން މޮޅުވެފަ އެވެ. އެކަމަކު، އޭގެ ފަހުން، ޕީއެސްޖީން ކުޅުނު ހަތަރު މެޗުން ވެސް މޮޅެއްނުވެ އެވެ. އެ ގޮތުން، ފްރެންޗް ސުޕަ ކަޕް މެޗުގައި ލޯންސް އަތުން ބަލިވިއިރު، ފްރެންޗް ލީގުގެ ފުރަތަމަ ތިން މެޗު ނިންމާލާފައި ވަނީ މޮޅެއް ނުލިބި އެވެ. ލީގުގެ ފުރަތަމަ ދެ މެޗުން އެއްވަރުވި ޕީއެސްޖީ ވަނީ ލީގުގައި ރޭގެ މެޗުގެ ކުރިން އެންމެ ފަހުން ކުޅުނު މެޗުގައި އަމިއްލަ ދަނޑުގައި މޮނާކޯ އަތުން 2-1 އިން ބަލިވެފަ އެވެ.
ޕީއެސްޖީން މި ހަފްތާގައި ޗެމްޕިއަންސް ލީގުގައި، ސްލޮވާކިއާގެ ސްލޯވަން ބްރަޓިސްލާވާ އަތުން 6-1 އިން މޮޅުވި އެވެ. އެ މެޗުގައި ޕީއެސްޖީ އަށް ހެޓްރިކެއް ހަދައިދިން ފެރާން ވަނީ އެ ފޯމު ދަމަހައްޓައިފަ އެވެ. ރޭގެ މެޗުގައި ޕީއެސްޖީން ބްރެސްޓް އަތުން މޮޅުވިއިރު ޖެހި ހަމައެކަނި ގޯލު ޖެހީ މެޗުގެ ފަސް ވަނަ މިނިޓްގައި ފެރާން އެވެ. މިއީ، އޮސްމާން ޑެމްބެލޭ ދިން ބޯޅައަކުން ފެރާން ޖެހި ގޯލެކެވެ. ޑެމްބެލޭ އޭރިއާބޭރުން ޖައްސާލި ބޯޅަ ފެރާން ވަނީ ހަމަޖެހިލައިފައި ތިރިތިރިން ގޯލަށް ފޮނުވާލައިފަ އެވެ.
ސްޕެއިނަށް މި ފަަހަރުގެ ވޯލްޑް ކަޕް ކާމިޔާބުކޮށްދިން ލަނޑު ޖެހި ފެރާން، ޓްރާންސްފާގައި ބާސެލޯނާ ދޫކޮށް ޕީއެސްޖީ އަށް ބަދަލުވި ފަހުން ވަނީ ކުޅުނު ފަސް މެޗުން ހަ ލަނޑު ޖަހައިފަ އެވެ.
އޭގެ ފަހުން، ލަނޑު ޖަހަން މި މެޗުގައި ޕީއެސްޖީ އަށް ގިނަ ފުރުސަތުތަކެއް ލިބިގެންދިޔަ އެވެ. އެ ގޮތުން، ޕީއެސްޖީގެ ޑެމްބެލޭ އާއި ކްވިޗާ ކްވަރަޝްކޭލިއާ އަށް ލިބުނު ފުރުސަތުތަކުގައި ބޭނުމެއް ހިފޭ ގޮތެއްނުވި އެވެ. މި މެޗުގައި ބްރެސްޓުން ގޯލެއް ޖަހަން ކުރި މަސައްކަތް ކާމިޔާބުވިޔަ ނުދިނީ ޕީއެސްޖީގެ ގޯލުގައި ހުރި ރަޝިއާގެ ގޯލްކީޕަރު، މަޓްވެއި ސަފޯނޯވްގެ ހުށިޔާރުކަމުންނެވެ.
މި ނަތީޖާއާ އެކު، ހަތަރު މެޗުން ފަސް ޕޮއިންޓާ އެކު، ޕީއެސްޖީ އޮތީ ލީގުގެ ހަތް ވަނައިގަ އެވެ. ލީގުގެ ގަދަ ތިނެއްގައި އޮތް ތިން ޓީމަށް ވެސް ހަތަރު މެޗުން ވަނީ 10 ޕޮއިންޓް ލިބިފަ އެވެ. އެއީ، އެއް ވަނައިގައި އޮތް ލިލް، ދެ ވަނައިގައި އޮތް މޮނާކޯ އަދި ތިން ވަނައިގައި އޮތް ރެން އެވެ.
