ޕެރިސް (ސެޕްޓެމްބަރު 19) - ފްރެންޗް ލީގުގައި ރޭ ކުޅުނު މެޗުން ލޯންސްގެ މައްޗަށް 2-1 އިން ކުރިހޯދައި، މޮނާކޯ އިން ފްރެންޗް ލީގުގެ އެއް ވަނައިގައި ތިން ޕޮއިންޓުގެ ލީޑު ދަމަހައްޓައިފި އެވެ.
ބްރެޒިލްގެ ކޯޗު ފިލީޕޭ ލުއިޒްގެ އިރުޝާދުގެ ދަށުން ތަފާތު ދައްކަމުން އަންނަ މޮނާކޯ އިން މި ސީޒަނުގައި އަދި ލީގުގެ މެޗަކުން ބަލިނުވެ އެވެ. ރޭގެ މެޗުން ލިބުނު ތިން ޕޮއިންޓާ އެކު، އެ ޓީމުން 18 ޓީމު ކުޅޭ ފްރެންޗް ލީގުގެ އެއް ވަނައިގައި އޮތީ ފަސް މެޗުން 13 ޕޮއިންޓާ އެކު އެވެ. ދެ ވަނައިގައި އޮތް ލިލް އާއި ތިން ވަނައިގައި އޮތް ރެން އަށް ހަތަރު މެޗުން 10 ޕޮއިންޓް ވަނީ ލިބިފަ އެވެ.
އެންމެ ފަަހުގެ ޗެމްޕިއަން، ޕީއެސްޖީ އަތުން މި ސީޒަނުގައި މޮޅުވެފައިވާ މޮނާކޯ އިން ވަނީ ރޭ އަމިއްލަ ދަނޑުގައި ލޯންސްއާ ދެކޮޅަށް ކުޅުނު މެޗުގައި، ފުރަތަމަ ހާފުގައި ލީޑުނަގައިފަ އެވެ. މެޗުގެ ފުރަތަމަ ބައިގަނޑިއިރު ނިމުނުތަނާހެން މޮނާކޯ އިން ވަނީ ގޯލެއް ޖަހައިފަ އެވެ. އެ ގޮތުން، މޮނާކޯ އަށް މި ލަނޑު ޖަހައިދިނީ، އެ ޓީމުގެ ފޯވާޑް، ޕެރިސް ބްރޫނާ އެވެ. މިއީ، މެތިސް އަބްލައިން ތަނަވަސްކޮށްދިން ފުރުސަތަކުން ބްރޫނާ ޖެހި ގޯލެކެވެ.
މި ފަހަރުގެ ފްރެންޗް ސުޕަ ކަޕްގެ ޗެމްޕިއަންކަން ޕީއެސްޖީ އަތުން މޮޅުވެގެން ހޯދި ލޯންސް އިން ވަނީ ދެ ވަނަ ހާފުގެ ކުޅުން ފެށިގެން 12 ވަނަ މިނިޓްގައި ލަނޑު ޖަހައި ނަތީޖާ ހަމަހަމަކޮށްފަ އެވެ. އެ ގޮތުން، 57 ވަނަ މިނިޓްގައި ލޯންސް އަށް މި ލަނޑު ޖަހައިދިނީ، މަތިއު އުޑޯލް އެވެ. މިއީ، ކުރިން ފްރާންސް ގައުމީ ޓީމަށް ކުޅެފައިވާ ފްލޯރިއަން ތޯވާން ތަނަވަސްކޮށްދިން ފުރުސަތަކުން އުޑޯލް ޖަހައިދިން ގޯލެކެވެ.
މެޗުގެ ފުރިހަމަ ވަގުތު ހަމަވާން ހަ މިނިޓަށް ވެފައި ވަނިކޮށް، 84 ވަނަ މިނިޓްގައި މޮނާކޯ އިން މެޗުން މޮޅުވި ލަނޑު ޖެހިއިރު، މިއީ، ލޯންސްގެ ޖޮނަތަން ގްރެޑިޓް އަތުން ބައިކޮޅަށް ވަން ގޯލެކެވެ. އޭނާ ބޮލުން ޖައްސާލި ބޯޅަ ވަނީ ބަައިކޮޅަށެވެ.
ފްރެންޗް ލީގުގެ އެންމެ ފަހުގެ ޗެމްޕިއަން، ޕީއެސްޖީން މި ހަފްތާގައި ކުޅޭ މެޗުގައި ބައްދަލުކުރާނީ މާސޭއާ އެވެ. ޕީއެސްޖީ ލީގުގެ ހަތް ވަނައިގައި އޮތްއިރު، މާސޭ އޮތީ ލީގުގެ 13 ވަނައިގަ އެވެ.
