ޕެރިސް (ސެޕްޓެމްބަރު 10) - ޔުއެފާ ޗެމްޕިއަންސް ލީގުގެ މިދިޔަ ދެ ފަހަރުގެ ޗެމްޕިއަން، ޕީއެސްޖީ އަށް ސްޕެއިނުގެ ފޯވާޑް، ފެރާން ޓޮރޭސް ކުޅުނު ފުރަތަމަ މެޗުގައި ހެދި ހެޓްރިކާ އެކު، ސްލޮވާކިއާގެ ސްލޯވަން ބްރަޓިސްލާވާ އަތުން 6-1 އިން ޕީއެސްޖީ މޮޅުވެއްޖެ އެވެ.
ބާސެލޯނާ އިން ވަނީ ރޭ އަމިއްލަ ދަނޑުގައި ފެޔަނޫޑާ ދެކޮޅަށް ކުޅެ، 5-1 އިން މޮޅުވެފަ އެވެ. މި މެޗުގައި، މި ސީޒަނުގައި ރަނގަޅު ފޯމެއްގައި ކުޅެމުން އަންނަ ބާސެލޯނާގެ ރަފީނިއާ ވަނީ ދެ ގޯލު ޖަހައިފަ އެވެ.
ޕީއެސްޖީން މި ސީޒަން ފެށިއިރު، ޔުއެފާ ސުޕަ ކަޕް މެޗުން އެސްޓަން ވިލާ އަތުން މޮޅުވި ނަމަވެސް، އޭގެ ފަހުން، ޑޮމެސްޓިކް ފުޓްބޯޅައިގައި މި ފަހަރު ކުޅުނު ހަތަރު މެޗުން ވެސް މޮޅެއް ނުވެ އެވެ. އޭގެ ތެރޭގައި ހިމެނެނީ ފްރެންްޗް ސުޕަ ކަޕްގެ މެޗާއި ފްރެންޗް ލީގުގެ ތިން މެޗެވެ.
އެކަމަކު، ޗެމްޕިއަންސް ލީގުގައި ރޭ ސްލޯވަން ބްރަޓިސްލާވާ ކޮޅަށް މުޅި މެޗު ކޮންޓްރޯލް ކޮށްގެން ކުޅެ ކާމިޔާބު ހޯދި އެވެ. މެޗުގެ 17 ވަނަ މިނިޓްގައި އޮސްމާން ޑެމްބެލޭގެ ގޯލުން ކުރިހޯދި ޕީއެސްޖީ ވަނީ އޭގެ ފަސް މިނިޓް ފަހުން އޭނާ ޖެހި ގޯލުން ލީޑުފުޅާކޮށްފަ އެެވެ.
ފުރަތަމަ ހާފުގައި ފެރާން ފުރަތަމަ ލަނޑު ޖެހިއިރު، ދެ ވަނަ ހާފުގެ ފުރަތަމަ 13 މިނިޓް ތެރޭ އިތުރު ދެ ލަނޑު ޖަހައި ހެޓްރިކް ފުރިހަމަަކުރި އެވެ. ފެރާން ތިން ވަނަ ލަނޑު ޖެހިތާ މިނިޓެއް ފަހުން، ސްލޯވަން ބްރަޓިސްލާވާ އިން މި މެޗުގައި ޖެހި ހަމައެކަނި ލަނޑު ކާމިޔާބުކުރީ ސުލައިމާން ކަމާރާ އެެވެ.
ޕީއެސްޖީން މެޗުގައި ޖެހި ފަހު ލަނޑު ކާމިޔާބުކުރީ ފަބިއަން ރުއީޒް އެވެ. އެއީ، މެޗުގެ ފުރިހަމަ ވަގުތު ހަމަވާން ތިން މިނިޓަށް ވެފައި ހުއްޓަ އެވެ.
އަމިއްލަ ދަނޑުގައި ކުޅުނު ބާސެލޯނާ އިން، ތިން ވަނަ މިނިޓްގައި ލީޑުނެގި އެވެ. މިއީ، ލަމީން ޔަމާލް ދިން ބޯޅައަކުން ހަަމަޖެހިލައިފައި ރަފީނިއާ ޖެހި ގޯލެކެވެ. މެޗުގެ 22 ވަނަ މިނިޓްގައި ބާސެލޯނާ އިން ލީޑުފުޅާކުރި ލަނޑަކީ ކަރީމް އަޑެޔޭމީ އޭރިއާބޭރުން ފޮނުވާލި ޝޮޓަކުން ޖެހި ގޯލެކެވެ.
ދެ ގޯލުގެ ލީޑެއްގައި ފުރަަތަމަ ހާފު ނިންމާލި ބާސެލޯނާ އިން ދެ ވަނަ ހާފު ފެށިގެން 12 މިނިޓް ތެރޭ ތިން ވަނަ ލަނޑެއް ޖެހި އެވެ. މި ލަނޑު ޖެހީ ޕެޑްރީ ދިން ބޯޅައަކުން ރަފީނިއާ އެވެ. މެޗުގެ 77 ވަނަ މިނިޓްގައި، ޔަމާލް ވަނީ ހިލޭ ޖެހުމަކުން ބާސެލޯނާގެ ހަތަރު ވަނަ ގޯލު ޖަހައިފަ އެވެ. އޭގެ ފަަސް މިނިޓް ފަހުން ފެޔަނޫޑްގެ ސެމް ސްޓެއިން ވަނީ ލަނޑެއް ޖަހައިފަ އެވެ.
މެޗުގައި ބާސެލޯނާގެ ފަހު ލަނޑު ޖެހީ ބަދަލަކަށް ކުޅެން އެރި ފޯވާޑް، ގަބްރިއެލް ޖީސޫސް އެެވެ. މިއީ، ޔަމާލް ދިން ބޯޅައަކުން ޖީސޫސް ބޮލުން ޖެހި ގޯލެކެވެ.
ޗެމްޕިއަންސް ލީގުގައި ރޭ ކުޅުނު އަނެއް މެޗުތަކުގެ ނަތީޖާ އަށް ބަލާއިރު، ސްޓުޓްގާޓުން ވަނީ 3-1 އިން ވައިކިން ބަލިކޮށްފަ އެވެ. އަދި، ސްޕޯޓިން ލިޒްބަން އިން ވަނީ 3-1 އިން ގަލަތަސަރާއި އަތުން މޮޅުވެފަ އެވެ.
