ޕެރިސް (އޮގަސްޓް 29) - ފްރެންޗް ލީގުގައި ރޭ އިތުރު ވަގުތުގެ ތެރޭގައި ޖެހި ދެ ގޯލާ އެކު، 2-2 އިން ލިލްއާ އެއްވަރުކޮށް ޕީއެސްޖީން ބަލިނުވެ ސަލާމަތްވެއްޖެ އެވެ.
މި ފަހަރުގެ ސީޒަން ފެށިއިރު، ޔުއެފާ ސުޕަ ކަޕްގެ ޗެމްޕިއަންކަން އެސްޓަން ވިލާ ބަލިކޮށް ހޯދި ޕީއެސްޖީ ވަނީ ފްރެންޗް ސުޕަ ކަޕް ފައިނަލުގައި ލޯންސް އަތުން ބަލިވެފަ އެވެ. ފްރެންޗް ލީގުގެ އާ ސީޒަނުގެ ފުރަތަމަ މެޗުގައި ރެން ދަނޑުގައި ފުރަތަަމަ ހާފު ނިމުނުއިރު، ޕީއެސްޖީ އޮތީ ދެ ގޯލު ފަހަތުގައި އޮތްއިރު، އެއްވަރުކުރީ ދެ ވަނަ ހާފުގައި ދެ ލަނޑު ޖަހައިގެންނެވެ. ރޭ ލިލް ދަނޑުގައި އިތުރު ވަގުތުގެ ކުޅުން ފެށިއިރު، ޕީއެސްޖީ ދެ ގޯލު ފަހަތުގައި އޮތް ނަަމަވެސް ދެ ގޯލު ޖަހައި ވަނީ އެއްވަރުކޮށްފަ އެވެ.
މަޝްހޫރު ކޯޗު، ކާލޯ އަންޗެލޮޓީގެ ދަރިފުޅު، ޑަވިޑޭ އަންޗެލޮޓީ ކޯޗުކޮށްދޭ ލިލް އިން ރޭ އަމިއްލަ ދަނޑުގައި ލީޑުނެގީ 39 އަަހަރުގެ ފޯވާޑް، އޮލިވިއޭ ޖިރޫ ދިން ބޯޅައަކުން ހަކޮން ހަރާލްޑްސަން ޖެހި ގޯލުންނެވެ. ހަރާލްޑްސަން މި ލަނޑު ޖެހީ އޭރިއާބޭރުން ފޮނުވާލި ޝޮޓަކުންނެވެ.
މެޗުގެ ބޮޑުބައި އެއް ގޯލުގެ ލީޑެއްގައި އޮތް ލިލް އިން ދެ ވަނަ ލަނޑު ޖެހީ މެޗުގެ ފުރިހަަމަ ވަގުތު ހަމަވާން ހަ މިނިޓަށް ވެފައިވަނިކޮށެވެ. އެ ގޮތުން، 84 ވަނަ މިނިޓްގައި ޑިލާނޭ ބަކްވާ މި ގޯލު ޖެހިއިރު، މި ލަނޑަށް ވެސް ފުރުސަތު ތަނަވަސްކޮށްދިނީ މެޗުގައި މޮޅު ކުޅުމެއް ދެއްކި ޖިރޫ އެވެ. މި ލަނޑު ޖެހި ބަކްވާ އަކީ އިނގިރޭސި ޕްރިމިއާ ލީގުގެ ނޮޓިންހަމް ފޮރެސްޓުގެ ލޯން އެއްބަސްވުމެއްގެ ދަށުން ލިލް އަށް ކުޅެމުން އަންނަ ކުޅުންތެރިއެކެވެ.
ޕީއެސްޖީ އަށް މެޗުގައި އުންމީދެއް ލިބުނީ އިތުރު ވަގުތުގެ ފުރަތަމަ މިނިޓްގަ އެވެ. އެ ގޮތުން، އެ ޓީމުގެ ފުރަތަމަ ލަނޑު ޖަހައިނީ ޕޯޗުގީސް މިޑްފީލްޑަރު، ވިޓީނިއާ އެވެ. އޭނާ ފޮނުވާލި ބޯޅަ އަމާޒުވީ ގޯލުގެ މަތީ ކަަނަށެވެ. ޕީއެސްޖީން އެއްވަރުކުރި ލަނޑުގައި ވެސް ވިޓީނިއާ ވަނީ އިސް ދައުރެއް އަދާކޮށްފަ އެެވެ. އެ ގޮތުން، އިތުރު ވަގުތުގެ ފަސް ވަނަ މިނިޓްގައި، ވިޓީނިއާ ނަގައިިދިން ހުރަހަކުން ޕީއެސްޖީގެ ކެޕްޓަން، ބްރެޒިލްގެ ޑިފެންޑަރު، މާކީިނިއޯސް ވަނީ ބޮލުން ގޯލަށް ބޯޅަ ފޮނުވާލައިފަ އެވެ.
މި ސީޒަނުގައި މިހާތަނަށް ޑޮމެސްޓިކް ތިން މެޗު ކުޅެގެން ވެސް ޕީއެސްޖީ އަށް މޮޅެއް ލިބިފައިނުވެ އެވެ. އެ ޓީމުގެ ކޯޗު، ލުއިސް އެންރީކޭ ވަނީ ޓީމުގެ ހާލަތު ރަނގަޅު ކުރުމަށްޓަކައި، ގެންނަން ޖެހޭ ބަދަލުތަކާ މެދު ވިސްނައި، އެކަންކަން ކުރަމުން އަންނަ ކަމަށް ބުނެފަ އެެވެ.
