ޕެރިސް (ސެޕްޓެމްބަރު 5) - ފްރެންޗް ލީގުގައި ރޭ ކުޅުނު މެޗުން މޮނާކޯ އަތުން 2-1 އިން ބަލިވެ، ޕީއެސްޖީގެ ހާލަތު އިތުަރަށް ގޯސްވެއްޖެ އެވެ.
މި ފަހަރުގެ ފުޓްބޯޅަ ސީޒަނުގައި ޕީއެސްޖީން ކުޅުނު ފުރަތަމަ މެޗުގައި ވަނީ ޔުއެފާ ސުޕަ ކަޕްގައި އެސްޓަން ވިލާ އަތުން މޮޅުވެފަ އެވެ. އެކަމަކު، އޭގެ ފަހުން، ޕީއެސްޖީން ކުޅުނު ހަތަރު މެޗުން ވެސް މޮޅެއްނުވެ އެވެ. އެ ގޮތުން، ފްރެންޗް ސުޕަ ކަޕް މެޗުގައި ލޯންސް އަތުން ބަލިވިއިރު، ފްރެންޗް ލީގުގެ ފުރަތަމަ ތިން މެޗު ނިންމާލާފައި މި ވަނީ މޮޅެއް ނުލިބި އެވެ.
ލީގުގެ ފުރަތަމަ ދެ މެޗުން އެއްވަރުވި ޕީއެސްޖީ ވަނީ ރޭ އަމިއްލަ ދަނޑުގައި މޮނާކޯ އަތުން ބަލިވެފަ އެވެ.
އަމިއްލަ ދަނޑުގައި ކުޅުނު ޕީއެސްޖީން ރޭގެ މެޗުގައި ލީޑުނެގި އެވެ. ފުރަތަމަ ދެ މެޗުގައި ވެސް ޕީއެސްޖީން ޖެހުނީ ފަހަތުން އަރައި 2-2 އިން އެއްވަރުކުރާށެވެ. އެކަމަކު، އެ ދެ މެޗާ ހިލާފަށް ރޭގެ މެޗުގައި ޕީއެސްޖީން ލީޑުނެގި ނަމަވެސް އެ ޓީމަށް ކާމިޔާބު ލިބޭގޮތެއްނުވި އެވެ.
ޕީއެސްޖީން ލީޑުނެގީ އެ ޓީމުގެ ކެޕްޓަން، މާކީނިއޯސް، 31 ވަނަ މިނިޓްގައި ޖެހި ގޯލުންނެވެ. މާކީނިއޯސް، މި ލަނޑު ޖަހަން ފުރުސަތު ތަނަވަސްކޮށްދިނީ، އެ ޓީމަށް ކުޅޭ ޖޯޖިއާގެ ތަރި، ކްވިޗާ ކްވަރަޝްކޭލިއާ އެވެ.
މޮނާކޯ އިން ނަތީޖާ އަނބުރާލީ ދެ ވަނަ ހާފުގައި ކުޅެން އަރައި ދެ ގޯލު ޖަހައިގެންނެވެ. އެ ގޮތުން، ދެ ވަނަ ހާފުގެ ކުޅުން ފެށިގެން 13 މިނިޓް ތެރޭ ފްލާވިއޯ ނަޒީނިއޯ ވަނީ ޖޯޑަން ޓެޒޭ ނެގި ހުރަހަކަށް އަރައި ލަނޑު ޖަހައި މޮނާކޯ އަށް އެއްވަރުކޮށްދީފަ އެވެ. އެ ޓީމުން ލީޑުނެގި ލަނޑު ޖަހާފައިވަނީ، 72 ވަނަ މިނިޓްގަ އެވެ. މިއީ، ރަޝިއާގެ ތަރި، އަލެކްސަންޑަ ގޮލޯވިން ދިން ބޯޅައަކުން ސްޓާނިސް އިޑުމްބޯ ޖެހި ގޯލެކެވެ.
މި މެޗުގެ ބާކީ ވަގުތުގައި ލަނޑެއް ޖަހައި އެއްވަރުކުރެވޭތޯ ޕީއެސްޖީން ވަރަށް މަސައްކަތް ކުރި އެވެ. އެކަމަކު، އެ ޓީމަށް އެކަން ހާސިލްނުވެ، ފްރެންޗް ލީގުގެ މެޗެއްގެ ފުރަތަމަ ހާފުގައި ލީޑުނަގާފައި، މި ވަނީ ފަސް އަހަރަށް ފަހު ފުރަތަމަ ފަހަރަށް ބަލިވެފަ އެވެ. އެ ފަހަރު، ޕީއެސްޖީ ބަލިވީ 2021 ވަނަ އަހަރު ނޯންޓެސް އަތުންނެވެ.
ރޭގެ ނަތީޖާއާ އެކު، 2017 ވަނަ އަހަރުގެ ލީގު ޗެމްޕިއަންކަން ހޯދި، މޮނާކޯ އިން މި ވަނީ އާ ސީޒަނުގައި ލީގުގައި ކުޅުނު ތިން މެޗުން ވެސް މޮޅުވެ، 100 ޕަސެންޓް ރެކޯޑް ދަމަހައްޓައިފަ އެވެ. މޮނާކޯ، އެއް ވަނައިގައި ނުވަ ޕޮއިންޓާ އެކު އޮތްއިރު، ޕީއެސްޖީ 12 ވަނައިގައި އޮތީ ދެ ޕޮއިންޓް ހޯދައިގެންނެވެ.
