ޕެރިސް (ސެޕްޓެމްބަރު 7) - މި ފަހަރުގެ ސީޒަނުގައި މިހާތަނަށް ޕީއެސްޖީން ކުޅުނު މެޗުތަކުގައި ނަތީޖާ ނެރުމުގައި ގިނަ މައްސަަލަތަކެއް ދިމާވެފައިވީ ނަމަވެސް މިހާރު އަމާޒުވާ ފާޑުކިޔުންތަކުން މާބޮޑު އަސަރެއް ނުކުރާކަމަށާއި ޕީއެސްޖީއާ މެދު ގޮތެއް ނިންމަންވީ ސީޒަން ނިމުމުން ކަމަށް އެ ޓީމުގެ ކޯޗު، ލުއިސް އެންރީކޭ ބުނެފި އެވެ.
މި ފަހަރުގެ ފުޓްބޯޅަ ސީޒަނުގައި ޕީއެސްޖީން ކުޅުނު ފުރަތަމަ މެޗުގައި ވަނީ ޔުއެފާ ސުޕަ ކަޕްގައި އެސްޓަން ވިލާ އަތުން މޮޅުވެފަ އެވެ. އެކަމަކު، އޭގެ ފަހުން، ޕީއެސްޖީން ކުޅުނު ހަތަރު މެޗުން ވެސް މޮޅެއްނުވެ އެވެ. އެ ގޮތުން، ފްރެންޗް ސުޕަ ކަޕް މެޗުގައި ލޯންސް އަތުން ބަލިވިއިރު، ފްރެންޗް ލީގުގެ ފުރަތަމަ ތިން މެޗު ނިންމާލާފައި މި ވަނީ މޮޅެއް ނުލިބި އެވެ. ލީގުގެ ފުރަތަމަ ދެ މެޗުން އެއްވަރުވި ޕީއެސްޖީ ވަނީ އެންމެ ފަހުން ކުޅުނު މެޗުގައި އަމިއްލަ ދަނޑުގައި މޮނާކޯ އަތުން 2-1 އިން ބަލިވެފަ އެވެ.
ދާދި ފަހުން މުސާރަ ބޮޑު ކުރުމަށް ފަހު، 2030 ވަަނަ އަހަރުގެ ޖޫން މަހުގެ ނިޔަލަށް ޕީއެސްޖީއާ އެކު ކޮންޓްރެކްޓް އާ ކުރި އެންރީކޭ ބުނީ، ހަމައެކަނި މި ވަގުތުގެ ފޯމަށް ބަލައިގެން ހާސްވެގެން ކަންތައްތަކެއް ކުރަން ނުޖެހޭ ކަމަށެވެ.
"ހާސްވާން ޖެހޭ ކަމެއް އޮތް ކަމަކަށް ނުދެކެން. ހަގީގަތަަށް މި ވާހަކަ ދައްކަނީ. މޮނާކޯ އިން މި މެޗުގައި ޖެހީ ދެ ޝޮޓް. އެއީ ދެ ގޯލު. އަހަރެމެން ކުރީ ކޮން ކަންކަމެއްކަން އަހަރެމެންނަށް އެބަ އެނގޭ. އެހެންވީމަ، އަހަރެން މިހާރު މި އޮތް ހާލަތުގައި ބުނަން އޮތީ އެންމެ ވާހަކައެއް. ސީޒަން ނިމޭއިރު އަހަރެމެންގެ ހާލަތު ބަލަމާ ހިނގާށޭ،" މޮނާކޯ އަތުން ބަލިވި މެޗަށް ފަހު އެންރީކޭ ބުންޏެވެ.
އެންރީކޭ ބުނީ، މޮނާކޯ އާއި ޕީއެސްޖީގެ ހާލަތަށް ބަަލައި، އަޅާކިޔާނަަމަ، ދެ ޓީމުގެ މެޗުގައި 10 މެޗު ކުޅޭއިރު، އަށް މެޗުން ޕީއެސްޖީ މޮޅުވާނެ ކަމަށެވެ. އަދި، އެއް މެޗު އެއްވަރުވާއިރު، ބަލިވެފައި މި ވަނީ މި ފަހަރުގެ މެޗުގައި ކަމަށްވާނެ ކަމަށް އެންރީކޭ ފާހަގަކުރި އެވެ.
ލީގުގެ އެއް ވަނައިގައި އޮތް މޮނާކޯ އަށް ތިން މެޗުން ނުވަ ޕޮއިންޓް ލިބިފައިވާއިރު، ޕީއެސްޖީ 13 ވަނައިގައި އޮތީ ދެ ޕޮއިންޓް ހޯދައިގެންނެވެ.
މިދިޔަ ސީޒަނުގައި ޕީއެސްޖީން ފްރެންޗް ލީގު ފަށައި، ފުރަތަމަ ތިން މެޗު ނިންމިއިރު ވެސް އޮތީ ލީޑުގަ އެވެ. އެކަމަކު، މި ފަހަރު ލީގުގެ ފުރަތަމަ ތިން މެޗު ނިމުނުއިރު، ޕީއެސްޖީ އަށް އެންމެ ދެ ޕޮއިންޓް ލިބިފައިވާއިރު، މިއީ، 2007/2008 ވަނަ އަހަރުގެ ލީގަށް ފަހު ޕީއެސްޖީން އެންމެ ދަށްކޮށް ފެށި ފަހަރެވެ.
އެންމެ ފަހުން ދެ ސީޒަނުގައި ވެސް ޗެމްޕިއަންސް ލީގުގެ ތަށި އުފުލާލި ޕީއެސްޖީން އެ ކްލަބްގެ ތާރީހުގައި ހޯދި ގިނަ ޓްރޮފީ ލިބިފައިވަނީ، 2011 ވަނަ އަހަރު ގަތަރުގެެ ސްޕޯޓްސް އިންވެސްޓްމަންޓްސް (ކިއުއެސްއައި) އިން އެ ކްލަބް ގަތް ފަހުންނެވެ. އޭގެ ފަހުން، ފްރެންޗް ލީގުގައި ކުޅުނު 15 ސީޒަނުގެ ތެރެއިން ތިން ފަހަރު ފިޔަވައި ހުރިހާ ފަހަރެއްގައި ލީގު ޗެމްޕިއަންކަން ހޯދީ ޕީއެސްޖީންނެވެ.
