އެންމެ ފުރަތަމަ ގައުމު އިސްކުރާނަމަ ޕީޕަލްސް ނެޝަނަލް ކޮންގްރެސް (ޕީއެންސީ) ގެ ފަލްސަފާއާ ދެބަސް ނުވާނެ ކަމަށް ރައީސް މުހައްމަދު މުއިއްޒު މިރޭ ވިދާޅުވެއްޖެ އެވެ.
ޒުވާނުންގެ މަރުކަޒުގައި ޕީއެންސީގެ ކޮންގްރެސް ނިންމުމަށް ބޭއްވި ޖަލްސާގައި މުއިއްޒު ވިދާޅުވީ އެންމެ ފުރަތަމަ ގައުމު އިސްކުރާނަމަ ޕީއެންސީން ރައްޔިތުންނަށްޓަކައި ފޯރުކޮށްދޭން ހުރި ކަންކަމުގައި އެއްބާރުލުންދޭނެ ކަމަށެވެ.
"އެންމެ ފުރަތަމަ ގައުމު އިސްކުރާނަމަ މި ޕާޓީގެ މި ފަލްސަފާގައި މި ކުރިއަށްދާ ކަންކަމާ ދޭތެރޭގައި ދެބަހެއް ނުވާނެ. މި ސަރުކާރުން، މި ޕާޓީން ކުރިއަށް އޮތް ދުވަސްތަކުގައި ރައްޔިތުންނަށްޓަކައި ފޯރުކޮށްދޭން ހުރި ކަންކަން ކުރުމުގައި އެންމެން އެއްބާރުލުން ދޭނެ،" މުއިއްޒު ވިދާޅުވި އެވެ.
"އެހެންވީމަ އިރާދަކުރެއްވިއްޔާ ޕީއެންސީގެ ފަރާތުން ރައްޔިތުންނަށްޓަކައި ކުރާ ހުރިހާ ކަމެއްގެވެސް ހުރިހާ ކަމެއްގެވެސް ފަލްސަފާއަކީ އަދި ކަންކަންކުރާ ގޮތުގެ މައިގަނޑު ސިޔާސަތަކީ މިދެންނެވި ސިޔާސަތު."
ޕީއެންސީ ކުރިއަށްދާނީ އެންމެ ފުރަތަމަ ގައުމުގެ ޝިޔާރާއެކުގައި ކަމަށާއި އެކަމާ ޕާޓީ ތެރޭގައި ހިޔާލު ތަފާތުވުމެއް ވެސް ނެތް ކަމަށް މުއިއްޒު ވިދާޅުވި އެވެ. އެމަނިކުފާނު ވިދާޅުވީ ޕީއެންސީގެ ސަފުތައް ބަދަހީވެ، ބައިބައިވުމެއް ނެތީވެސް އެ ސަބަބަށްޓަކައި ކަމަށެވެ.
ނަމަވެސް މުއިއްޒު ވިދާޅުވީ ޕީއެންސީއާ އިދިކޮޅު ފަނާކުރަނިވި ފިކުރުތަކުން މާޒީގައި ވެރިކަން ކުރި ކޮންމެ ފަހަރަކު އިސްކުރީ ގައުމު ނޫން ކަމަށާއި ބައެއް ފަހަރު އިސްލާމް ދީނާ ދެކޮޅަށްވެސް މަސައްކަތް ކޮށްފައިވާ ކަމަށް މުއިއްޒު ވިދާޅުވި އެވެ.
މުއިއްޒު ވިދާޅުވީ ރާއްޖޭގައި ގައުމު އިސްކޮށްގެން މަސައްކަތް ކުރަމުންދަނީ ހަމައެކަނި ޕީއެންސީ ކަމަށެވެ. ބާކީ ހުރިހާ ފިކުރަކީ ފަނާކުރަނިވި ފިކުރު ކަމަށް ވެސް އެމަނިކުފާނު ވިދާޅުވި އެވެ.
މީގެއިތުރުން އެމަނިކުފާނު ވިދާޅުވީ ޕީއެންސީން ގެންގުޅޭ ސިޔާސަތަކީ އިސްލާމް ދީނަށް ނަސްރު ދިނުމުގެ ސިޔާސަތު ކަމަށްވާއިރު، އެއީ އެހެން ޕާޓީތަކާ އުޑާއި ބިމާހާ ތަފާތު ކަމެއް ކަމަށެވެ. އެމަނިކުފާނު ވިދާޅުވީ ގައުމަށް އެންމެ ފައިދާވާނީ ޕީއެންސީއާ އެކީ ކުރިއަށް ގޮސްގެން ކަމަށެވެ.
