ލިވަޕޫލް (ސެޕްޓެމްބަރު 16) - އިނގިރޭސި ލީގު ކަޕް ތިން ވަނަ ބުރުގައި ރޭ ލިވަޕޫލުން 3-1 އިން ޓޮޓެންހަމް ހޮޓްސްޕާސް ބަލިކުރިއިރު، އިޕްސްވިޗް ޓައުން 4-2 އިން ބަލިކޮށް އާސެނަލުން ވެސް މުބާރާތުގެ އަނެއް ބުރުން ޖާގަ ހޯދައިފި އެވެ.
އެންފީލްޑް ސްޓޭޑިއަމްގައި ރޭ ލިވަޕޫލުން ނުކުތީ އެންމެ ފަހުން ފުލަމްއާ ދެކޮޅަށް ކުޅުނު މެޗުގެ ފުރަތަމަ 11 އަށް 10 ބަދަލެއް ގެނެސްގެންނެވެ. ރޮނާލްޑް އަރައުހޯ ފިޔަވައި ދެން ތިބި ހުރިހާ ކުޅުންތެރިން ވަނީ ބަދަލުކޮށްފަ އެވެ. ޓޮޓެންހަމް އަށް ރޭގެ މެޗުގައި ލީޑުނަގަން ލިބުނު ރަނުގެ ފުރުސަތެއްގައި އޭރިއާތެރެއިން ސްޓީވް ބާގްވެލް ޖެހި ބޯޅަ ލިވަޕޫލްގެ ގޯލުގައި ހުރި ޖިއޯޖީ މަމަޑާޝްވިލީ ވަނީ މަަތަކޮށްފަ އެވެ.
ލިވަޕޫލުން ލީޑުނެގީ 21 ވަނަ މިނިޓްގައި އަލެކްސިސް މެކް އަލިސްޓާ ގޯލުގެ މަތީ ކަނަށް ޖެހި ގޯލުންނެވެ. ދެ ވަނަ ހާފުގެ ކުޅުން ފަށައިގެން ނުވަ މިނިޓް ތެރޭ މެކް އަލިސްޓާ ދިން ބޯޅައަކުން ކޯޑީ ގަކްޕޯ ވަނީ ލަނޑު ޖަހައި ލިވަޕޫލްގެ ލީޑުފުޅާކޮށްދީފަ އެވެ.
މެޗުގެ 69 ވަނަ މިނިޓްގައި ޓޮޓެންހަމްގެ މަޓެއުސް ފެނާންޑޭސް ނެގި ކޯނަރަކުން ކޮނާ ގަލަގާ ބޮލުން ޖެހި ގޯލުން އުންމީދެއް ހޯދި ޓޮޓެންހަމް އިން އެއްވަރުކުރަން އޮމަރު މާމޫޝް އާއި މުހައްމަދު ކުޑޫސް ފޮނުވާލި ބޯޅަތައް ލިވަޕޫލްގެ ކީޕަރު، މަމަޑާޝްވިލީ ވަނީ މަތަކޮށްފައެވެ.
ލިވަޕޫލަށް އަނެއް ބުރުގެ ޖާގަ ކަށަވަރުކޮށްދިން ލަނޑު ޖެހީ އިތުރު ވަގުތުގެ ފުރަތަމަ މިނިޓްގައި ޑޮމިނިކް ސޮބޯސްލާއި އެވެ. ހާފުގެ މެދެެއްހާ ހިސާބުން ސޮބޯސްލާއި ޖެހި ބޯޅަ އަމާޒުވީ ގޯލުގެ މަތީ ކަނަށެވެ. މި ނަތީޖާއާ އެކު، ލިވަޕޫލުން މި ވަނީ ޖެހިޖެހިގެން އަށް ސީޒަނުގައި ލީގު ކަޕްގެ ހަތަރު ވަނަ ބުރުން ފުރުސަތު ހޯދައިފަ އެވެ.
ގިނަ ބަދަލުތަކާ އެކު ރޭގެ މެޗުގައި ކުޅުނު އާސެނަލުން ފުރަތަމަ 16 މިނިޓް ތެރޭ ދެ ލަނޑުގެ ލީޑެއް ނެގި އެވެ. ހަތް ވަނަ މިނިޓްގައި ފުރަތަމަ ލަނޑު ޖެހީ 16 އަހަރުގެ މެކްސް ޑައުމަން އެވެ. އަދި، 16 ވަނަ މިނިޓްގައި ނޯނީ މަޑުއޭކޭ ޖެހި ގޯލުން ދެ ލަނޑުގެ ލީޑެއް ނަގައި، އެ ނަތީޖާގައި އާސެނަލުން ފުރަތަމަ ހާފު ނިންމާލި އެވެ. އަދި، ދެ ވަނަ ހާފުގެ ދެ މިނިޓް ތެރޭ ޑައުމަން އިތުރު ލަނޑެއް ޖަހައި، އާސެނަލަށް ހަމަޖެހުމެއް ހޯދައިދިނެވެ.
މެޗުގެ 58 ވަނަ މިނިޓްގައި މިކޭލް މެރީނޯ، އާސެނަލްގެ ހަތަރު ވަނަ ލަނޑު ޖެހިއިރު، މެޗުގައި އިޕްސްވިޗުން ޖެހި ދެ ގޯލު ވެސް ޖެހީ އޭގެ ފަހުންނެވެ. އެ ގޮތުން، 62 ވަނަ މިނިޓްގައި އިޕްސްވިޗުގެ ފުރަތަމަ ލަނޑު ޖެހީ އަނީސް މެހްމޭތީ އެވެ. އަދި، އިތުރު ވަގުތުގެ ފުރަތަމަ މިނިޓްގައި އިޕްސްވިޗްގެ ދެ ވަނަ ގޯލު ޖެހީ، ޗޫބާ އަކްޕޮމް އެވެ.
ލީގު ކަޕްގައި ރޭ ކުޅުނު އެހެން މެޗުތަކުގެ ނަތީޖާ އަށް ބަލާއިރު، ބްރެންޓްފޯޑުން ވަނީ 2-1 އިން ރެޑިން ބަލިކޮށްފަ އެވެ. އަދި، ފުލަމް އިން ވަނީ 3-2 އިން ވެސްްޓް ހޭމް ޔުނައިޓެޑް ބަލިކޮށްފަ އެވެ.
