މެންޗެސްޓާ (ސެޕްޓެމްބަރު 18) - އިނގިރޭސި ލީގު ކަޕްގެ ތިން ވަނަ ބުރުގައި، މުބާރާތުގެ އެންމެ ފަހުގެ ޗެމްޕިއަން، މެންޗެސްޓާ ސިޓީން 5-0 އިން ނޯވިޗް ސިޓީ ބަލިކޮށް، މުބާރާތުގެ ގަދަ 16 ބުރުން ޖާގަ ހޯދައިފި އެވެ.
ލީގު ކަޕްގެ ހަތަރު ވަނަ ބުރު (ގަދަ 16 ޓީމު ވާދަކުރާ ބުރު) ގައި ސިޓީން ނުކުންނާނީ ބްރައިޓަން ހޯލްވް އެންޑް އަލްބިއަންއާ ދެކޮޅަށެވެ. ބްރައިޓަން އިން ވަނީ ތިން ވަނަ ބުރުގައި، މެންޗެސްޓާ ޔުނައިޓެޑް ދަނޑުގައި ފަހަތުން އަރައި، 3-2 އިން މޮޅުވެފަ އެވެ.
ސިޓީން އިއްތިހާދު ސްޓޭޑިއަމްގައި ރޭ ކުޅުނު މެޗުގައި ޒުވާން ކުޅުންތެރިންނަށް ފުރުސަތު ދިނެވެ. އެ ގޮތުން، ކޯޗު އެންޒޯ މަރެސްކާ ފުރުސަތު ދިން ކުޅުންތެރިންގެ ތެރެއިން ރޭގެ މެޗުގައި ވިދާލީ 17 އަހަރުގެ ފްލޮއިޑް ސަމްބާ އެވެ. ސިޓީ އަށް ރޭގެ މެޗުގައި ލީޑުނަގައިދިނީ ސަމްބާގެ ގޯލުންނެވެ. އެއީ، މެޗުގެ 29 ވަަނަ މިނިޓްގަ އެވެ. ސަމްބާ ވަނީ ސިޓީ އަށް ދެ ވަނަ ހާފުގައި ވެސް ލަނޑެއް ޖަހައިދީފަ އެވެ.
މި މެޗުގައި ސިޓީގެ އަނެއް ލަނޑުތައް ޖެހީ، ރަޔާން ޗާކީ އާއި ބްރެޒިލް ލީގުން މި ފަހަރު ސިޓީ އަށް އައި އަލަން އަދި ރަޔާން މެކް އައިޑޫ އެވެ. މި މެޗުގައި ނޯވިޗް އިން ފަށައިގެން ސިޓީ އަށް ކޮންމެ ވެސް ވަރެއްގެ ޕްރެޝަރެއް ދިން ނަމަވެސް ސިޓީން ލީޑު ނެގި ހިސާބުން ދެން ފެނިގެންދިޔައީ އެ ޓީމުން މެޗުގެ ކޮންޓްރޯލް ނަގައިގެން ކުޅެމުން ދިޔަތަނެވެ. އެ ގޮތުން، ސިޓީން ވަނީ ގޯލު ޖަހާނެ ފުރުސަތުތައް ހޯދައި، ފަސް ގޯލު ޖަހައި، މަރެސްކާގެ ކޯޗުކަމުގައި އެންމެ ބޮޑު މޮޅު ހޯދައިފަ އެވެ.
ސިޓީން މިދިޔަ ސީޒަނުގައި ލީގު ކަޕް ޗެމްޕިއަންކަން ހޯދީ ފައިނަލުގައި 2-0 އިން އާސެނަލް ބަލިކޮށްފަ އެވެ. ސިޓީން ނުވަ ފަަހަރު ލީގު ކަޕް ޗެމްޕިއަންކަން ހޯދިއިރު، އެންމެ ގިނައިން މި މުބާރާތް ކާމިޔާބުކުރި ލިވަޕޫލުން ވަނީ 10 ފަހަރު މުބާރާތުގެ ތަށި އުފުލާލައިފަ އެވެ.
އިނގިރޭސި ލީގު ކަޕްގެ ހަތަރު ވަނަ ބުރުގައި، ތިން ވަނަ ޑިވިޝަނުގެ ފްލީޓްވުޑް ޓައުން ކުޅޭނީ އާސެނަލާ އެވެ. މެންޗެސްޓާ ސިޓީން ބްރައިޓަންއާ ބައްދަލުކުރާއިރު، އެވަޓަން އިން ކުޅޭނީ ނިއުކާސަލް ޔުނައިޓެޑާ އެވެ. ސަންޑަލެންޑް ބައްދަލުކުރާނީ ބްރެންޓްފޯޑާ އެވެ. ލިވަޕޫލުން ޗެލްސީއާ ކުޅޭއިރު، ބްރެޑްފޯޑުން ޕީޓަބަރާއާ ބައްދަލުކުރާނެ އެވެ. ފުލަމް އިން ކްރިސްޓަލް ޕެލަަސްއާ ދެކޮޅަށް ނުކުންނައިރު، ބޯންމައުތުން ކުޅޭނީ އެސްޓަން ވިލާއާ އެވެ.
