ސްޓުޓްގާޓް، ޖަރުމަނު (ސެޕްޓެމްބަރު 20) - ޖަރުމަނު ލީގުގައި ރޭ މެކްސިމިލިއަން ބައިއާ ޖެހި ހަމައެކަނި ގޯލުން 1-0 އިން ސްޓުޓްގާޓްގެ މައްޗަށް ކުރިހޯދައި ބޮރޫޝިއާ ޑޯޓްމަންޑުން ޖަރުމަނު ލީގުގެ އެއް ވަަނަ އަށް ޖެހިލައިފި އެވެ.
އިންޓަނޭޝަނަލް ބްރޭކަށް ދާއިރު ޑޯޓްމަންޑް އެއް ވަނައިގައި އޮތީ ހަތަރު މެޗުން ވެސް މޮޅުވެ، ފުރިހަމަ ރެކޯޑަކާ އެކު، 12 ޕޮއިންޓް ހޯދައިގެންނެވެ. އެންމެ ފަހުގެ ޗެމްޕިއަން، ބަޔާނުން ހަތަރު މެޗުން 10 ޕޮއިންޓާ އެކު ދެ ވަނައިގައި އޮތްއިރު، ރަނގަޅު ރެކޯޑެއް ދަމަހައްޓަމުން އައި ފްރެއިބާގް ވެސް އޮތީ ހަތަރު މެޗުން 10 ޕޮއިންޓާ އެކު ލީގުގެ ތިން ވަަނައިގަ އެވެ. ފްރެއިބާގް ރޭ ކުޅުނު މެޗުން އައިންޓްރަކްޓް ފްރޭންކްފާޓާ ވަނީ 2-2 އިން އެއްވަރުވެފަ އެވެ.
ސްޓުޓްގާޓް ދަނޑުގަައި ރޭ ކުޅުނު މެޗުގެ 30 ވަނަ މިނިޓްގައި އެ ޓީމަށް ލީޑުނަގައިދޭން ޑެނިސް އުންޑާވް އަށް ލިބުނު ހުސް ފުރުސަތުގައި ޖެހި ޝޮޓް ޑޯޓްމަންޑްގެ ކީޕަރު، ގްރެގޯ ކޯބެލް ވަނީ މަތަކޮށްފަ އެވެ. އޭގެ ތިން މިނިޓް ފަހުން އޭރިއާތެރެއަށް ނެގި ހުރަހަކަށް އަރައި، ސްޓުޓްގާޓްގެ ބިލާލް އެލް ކަނޫސް ބޮލުން ފޮނުވާލި ބޯޅަ ދިޔައީ ދަނޑިކައިރިން ބޭރުންނެވެ.
މެޗުގެ 70 ވަނަ މިނިޓްގައި ޑޯޓްމަންޑުން ލަނޑު ޖެހިއިރު، މިއީ، ރެއާލް މެޑްރިޑްގެ ތަރި، ޖޫޑް ބެލިންހަމްގެ ކޮއްކޮ، ޖޯބް ބެލިންހަމް ދިން ބޯޅައަކުން ކާމިޔާބުކުރި ގޯލެކެވެ. އެ ގޮތުން، ބެލިންހަމް ނަގައިދިން ހުރަހަކަށް އަރައި ކުޑަ އޭރިއާގެ ތެރެއިން ބައިއާ ވަނީ ގޯލަށް ބޯޅަ ފޮނުވާލައިފަ އެެވެ.
ލީޑުނެގިތާ 10 މިނިޓް ފަހުން، ޑޯޓްމަންޑަށް ދެ ވަނަ ލަނޑެއް ޖަހައިދޭން، ފަބިއޯ ސިލްވާ އަށް ލިބުނު ފުރުސަތުގައި، ސްޓުޓްގާޓްގެ އޭރިއާތެރެއިން ފޮނުވާލި ބޯޅަ ދިޔައީ ގޯލާ މާ ދުރުންނެވެ.
