މިއުނިކް (އޮގަސްޓް 29) - ޖަރުމަނު ލީގުގެ އާ ސީޒަނުގައި އެންމެ ފަހުގެ ޗެމްޕިއަން، ބަޔާން މިއުނިކުން ކުޅުނު ފުރަތަމަ މެޗުގައި ރޭ 5-1 އިން ސްޓުޓްގާޓް ބަލިކޮށް ވަރުގަދަކޮށް ފަށައިފި އެވެ.
ބަޔާނުން މިދިޔަ ސީޒަނުގައި ހަ އަހަރަށް ފަހު ޖަރުމަނު ކަޕްގެ ޗެމްޕިއަންކަން ހޯދިއިރު، ލީގު ޗެމްޕިއަންކަން ހޯދީ އެ ކްލަބްގެ ތާރީހުގައި 35 ވަނަ ފަހަރަށެވެ. ބަޔާނުން ވަނީ އެންމެ ފަހުން، ކުޅުނު 14 ސީޒަނުގެ ތެރެއިން 13 ފަހަރު ލީގު ޗެމްޕިއަންކަން ހޯދައިފަ އެވެ. އެ ޓީމަށް ލީގު ގެއްލުނީ މީގެ އެއް އަހަރު ކުރިން، ޒަބީ އަލަޮންސޯގެ ކޯޗުކަމުގައި ބަޔާ ލެވަކޫސަނުން ލީގު ނެގިއިރު އެވެ. ބަޔާނުން މިދިޔަ ފަހަރު ލީގު ޗެމްޕިއަންކަން މި ހޯދީ ބާކީ ހަތަރު މެޗު އޮއްވަ އެވެ.
ޖަރުމަަނުގެ ފުޓްބޯޅަ ސީޒަން ފަށަން ކުޅުނު ސުޕަ ކަޕް މެޗުގައި ބޮރޫޝިއާ ޑޯޓްމަންޑް އަތުން ބަޔާން މޮޅުވީ 2-1 އިންނެވެ. އެ ނަތީޖާއާ އެކު ބަޔާނުން ވަނީ އެ ކްލަބްގެ ތާރީހުގައި 12 ވަނަ ފަހަރަށް ސުޕަ ކަޕްގެ ތަށި އުފުލާލައިފަ އެވެ.
ބަޔާންގެ ދަނޑުގައި އަލިއާންޒް އެރީނާގައި ރޭ ކުޅުނު މެޗުގައި ބަޔާނުން ލީޑުނެގީ 21 ވަނަ މިނިޓްގައި ފްރާންސްގެ ޑިފެންޑަރު، ޑަޔޫ އުޕަމެކާނޯ ޖެހި ގޯލުންނެވެ. ޖޯސުއާ ކިމިކް ނަގައިދިން ކޯނަަރަކުން އުޕަމެކާނޯ މި ލަނޑު ޖެހީ ބޮލުންނެވެ. ސްޓުޓްގާޓްގެ ކީޕަރު، ފަބިއަން ބްރެޑްލޯ ވަނީ ބަޔާންގެ ގިނަ ހަމަލާތަކެއް ފުރަތަމަ ހާފުގައި ހުއްޓުވައިފަ އެވެ.
ދެ ވަނަ ހާފުގެ ކުޅުން ފަށައިގެން ހަތް މިނިޓް ތެރޭ ސްޓުޓްގާޓުން ވަނީ ލަނޑު ޖަހައި އެއްވަރުކޮށްފަ އެވެ. މި ލަނޑު ޖެހީ ޖޯޝާ ވަގްނޯމަން އެވެ. ސްޓުޓްގާޓުން އެއްވަރުކުރިތާ ދެ މިނިޓް ފަހުން ބަޔާނުން އަނެއްކާ ވެސް ލީޑުނެގި އެވެ. މި ލަނޑު ޖެހީ ކިމިކް ދިން ބޯޅައަކުން ރަނގަޅު ފޯމެއްގައި ހުރި މައިކަލް އޮލީސޭ އެވެ. މި ލަނޑު ޖެހުމަށް ފަހު، ދެން އައި އެޓޭކުގައި އިތުރު ލަނޑެއް ޖަހައި ބަޔާނުން ލީޑުފުޅާކުރި އެވެ. މިއީ، ސްޓުޓްގާޓުގެ ވަގްނޯމަން އަތުން ބައިކޮޅަށް ވަން ގޯލެކެވެ. ބަޔާންގެ އަލްފަންސޯ ޑޭވިސް ނަގައިދިން ބޯޅައެއް ސަލާމަތްކުރަން އުޅުމުގެ ތެރޭގައި ވަގްނޯމަން އަތުން ވަނީ ބައިކޮޅަށެވެ.
ހެރީ ކޭން ދިން ބޯޅައަކުން އޮލީސޭ ޖެހި ގޯލެއް ވީޑިއޯ އެސިސްޓަންޓް ރެފްރީ (ވީއޭއާރް) އިން ނިންމީ އޮފްސައިޑް ކަމަށެވެ.
ބަޔާނުގެ ފަހު ދެ ގޯލަކީ، ދެ ވަނަ ހާފުގައި ބަދަލަކަށް އެރި މޮރޮކޯގެ ފޯވާޑް، އިސްމާއިލް ސައިބާރީގެ އެހީއާ އެކު ޖެހި ގޯލުތަކެކެވެ. ނެދަލެންޑްސްގެ ޕީއެސްވީ އައިންދޯވަން އިން 55 މިލިއަން ޑޮލަރަށް ގަތް ސައިބާރީ، 82 ވަނަ މިނިޓްގައި މުޅިން ހުސްކޮށްލާފައި ދިން ބޯޅަ އަލެކްސަންޑާ ޕަވްލޯވިޗް ވަނީ ގޯލަށް ފޮނުވާލައިފަ އެެވެ. އަދި، އިތުރު ވަގުތުގެ ދެވަނަ މިނިޓްގައި ލުއިސް ޑިއާޒް ވަނީ ސައިބާރީ ދިން ބޯޅައަކުން ބަޔާންގެ ފަސް ވަނަ ލަނޑު ޖަހައިފަ އެވެ.
