މިއުނިކް (ސެޕްޓެމްބަރު 14) - ޖަރުމަނު ބުންޑަސްލީގާ އަށް މި ފަހަރު އަލަށް ޕްރޮމޯޓްވެ، ތަފާތު ދައްކަމުން އައި އެލްވާސްބާގުގެ މައްޗަށް 2-1 އިން އެންމެ ފަހުގެ ޗެމްޕިއަން ބަޔާން މިއުނިކުން ކުދިހޯދައިފި އެވެ.
އެލްވާސްބާގުން މި ފަހަރުގެ ޖަރުމަނު ލީގަށް ޕްރޮމޯޓްވެ ފުރަތަމަ ކުޅުނު ދެ މެޗުން މޮޅުވި އެެވެ. އެ ގޮތުން، ފުރަތަމަ މެޗުގައި މީގެ އެއް ސީޒަން ކުރިން ޖަރުމަނު ލީގުގެ ޗެމްޕިއަންކަން ހޯދި ބަޔާ ލެވަކޫސަން އަތުން 3-2 އިން މޮޅުވި އެވެ. އަދި، ދެ ވަނަ މެޗުން ވަނީ، ބޮރޫޝިއާ މުންޗެންގްލަޑްބެކް އަތުން 4-3 އިން މޮޅުވެފަ އެވެ. އެކަމަކު، ތިން ވަނަ މެޗުގައި ރޭ އެލްވާސްބާގަށް ކުރިމަތިލާން ޖެހުނީ މުޅިން ތަފާތު ޗެެލެންޖަކާ އެވެ.
ރަށުންބޭރުގައި ކުޅުނު ބަޔާނުން ވަނީ ރޭގެ މެޗުގެ 26 ވަނަ މިނިޓްގައި ލީޑުނަގައިފަ އެވެ. މިއީ، ބަޔާނަށް ކުޅޭ މޮރޮކޯގެ ފޯވާޑް، އިސްމާއިލް ސައިބާރީ ނެގި ހުރަހަކުން އެ ޓީމުގެ ހެރީ ކޭން އަށް ފޮނުވާނުލެވުނު ބޯޅަ، ލެނާޓް ކާލް އަށް ލިބުމާ އެކު ގޯލަށް ވައްދާލައިގެން ކާމިޔާބުކުރި ގޯލެކެވެ.
ފުރަތަމަ ހާފުގައި ބަޔާނުން ލީޑުގައި އޮވެ ނިންމާލި ނަމަވެސް މެޗުގެ 61 ވަނަ މިނިޓްގައި އެލްވާސްބާގުން ވަނީ ހިތްގައިމު ލަނޑެއް ޖަހައި މެޗުގެ ނަތީޖާ ހަމަހަމަކޮށްފަ އެވެ. އެ ގޮތުން، އެ ޓީމަށް މި ލަނޑު ޖަހައިދިނީ މައުރީސް ކްރަޓެންމާޗާ އެވެ. އޭނާ އޭރިއާބޭރުން ފޮނުވާލި ބޯޅަ އަމާޒުވީ ގޯލުގެ މަތީ ކަނަށެވެ.
ބަޔާން މޮޅުކޮށްދިން ލަނޑު ޖެހީ ކޭން އެވެ. މެޗުގެ 72 ވަނަ މިނިޓްގައި ކޭން މި ލަނޑު ޖެހީ އަލެކްސަންޑަ ޕަވްލޯވިޗް ދިން ބޯޅައަކުންނެވެ. މިއީ، މި ފަހަރުގެ ލީގުގައި ކޭންގެ ފުރަތަމަ ލަނޑު ކަމަށް ވިޔަސް، ޖަރުމަނު ލީގުގައި ކުޅުނު 97 މެޗުން ޖެހި 99 ވަނަ ގޯލެވެ. އަދި، މީގެ ތިން އަހަރު ކުރިން ޓޮޓެންހަމް ހޮޓްސްޕާސް ދޫކޮށް ބަޔާނަށް ބަދަލުވި ފަހުން އެ ޓީމަށް ކުޅެދިން 153 މެޗުން ޖެހި 150 ވަނަ ލަނޑެވެ.
ޖަރުމަނު. ލީގު ތާވަލުގެ އެއް ވަނައިގައި އޮތް ފްރެއިބާގާއި ދެ ވަނައިގައި އޮތް ބޮރޫޝިއާ ޑޯޓްމަންޑުން ވަނީ ކުޅުނު ތިން މެޗުން ވެސް މޮޅުވެ، ނުވަ ޕޮއިންޓް ހޯދައިފަ އެވެ. ތިން ވަނައިގައި އޮތް އޮއުސްބާގާއި ހަތަރެއްގައި އޮތް ބަޔާނުން ދެ މެޗުން މޮޅުވެ، އެއް މެޗުން އެއްވަރުވެފައިވާއިރު، ލިބިފައިވަނީ ހަތް ޕޮއިންޓެވެ.
