މިއުނިކް (ސެޕްޓެމްބަރު 19) - ހެރީ ކޭން، ޖަރުމަނު ލީގުގައި އެންމެ އަވަހަށް 100 ގޯލު ހަމަކުރި ގޯލު ޖެހި މެޗުގައި ބަޔާން މިއުނިކުން 7-0 އިން ޔޫނިއަން ބާލިންގެ މައްޗަށް ކުރިހޯޯދައިފި އެވެ.
އަމިއްލަ ދަނޑުގައި ކުޅުނު ބަޔާނުން ރޭގެ މެޗުގައި ލީޑުނެގީ، ސިއްހީ މައްސަލައެއް ދިމާވެ، އެނބުރި ފިޓްނަސް އަށް އަންނަން މަސައްކަތް ކުރަމުން އަންނަ ޖަރުމަނުގެ ތަރި، ޖަމާލް މުސިއާލާ ޖެހި ގޯލުންނެވެ. މިއީ، މެޗުގެ 18 ވަނަ މިނިޓްގައި އަލްފަންސޯ ޑޭވިސް ދިން ބޯޅައަކުން ޖެހި ގޯލެކެވެ.
އުމުރުން 33 އަހަރުގެ ކޭން، ވަނީ 39 ވަނަ މިނިޓްގައި ޕެނަލްޓީ އަކުން ލަނޑު ޖަހައި، ބަޔާންގެ ލީޑުފުޅާކޮށްދީފަ އެވެ. މިއީ، މައިކަލް އޮލީސޭ އަށް ޔޫނިއަން ބާލިން އޭރިއާތެރެއިން އެ ޓީމުގެ، ޓޮމް ރޯތު ކުރި ފައުލަކަށް ދިން ޕެނަލްޓީ އެކެވެ. މި ލަނޑާ އެކު، ކޭން ވަނީ ޖަރުމަނު ލީގުގައި އެންމެ މަދުން މެޗު ކުޅެގެން، 100 ގޯލު ހަމަކުރި ކުޅުންތެރިޔާގެ ރެކޯޑް ހަދައިފަ އެވެ. ކޭން، މި އަދަދަށް ގޯލު ހަމަކުރީ، 98 މެޗުންނެވެ. ކުރިން މި ރެކޯޑް އޮތް ކޮލޯންގެ ލެޖެންޑް ޑިއެޓާ މުލާ އަށް 100 ގޯލު ޖެހުނީ، 129 މެޗުންނެވެ.
ފުރަތަމަ ހާފު ނިމުމުގެ ކުރިން އޮލީސޭ ވަނީ ބަޔާނަށް ތިން ވަނަ ލަނޑު ޖަހައިދީފަ އެވެ. ދެ ވަނަ ހާފު ފެށިގެން ނުވަ މިނިޓް ތެރޭ ކޭން ވަނީ އޮލީސޭ ނެގި ހުރަހަކުން ބޮލުން ގޯލެއް ޖަހައިފަ އެވެ. މިއީ، ތިން އަހަރު ކުރިން ބަޔާނަށް ބަދަލުވި ފަހުން، ހުރިހާ މުބާރާތެއްގައި ބަޔާނަށް ކުޅެދިން 154 މެޗުން ކޭން ޖެހި 152 ވަނަ ގޯލެވެ. ކޭން އަކީ، މި ފަހަރު ފްރާންސް ފުޓްބޯލް މެގަޒިން އިން ދުނިޔޭގެ އެންމެ މޮޅު ފުޓްބޯޅަ ކުޅުންތެރިޔާ އަށް ދޭ ބެލޮންޑިއޯ އެވޯޑަށް ވެސް ނޮމިނޭޓްވެފައިވާ ކުުޅުންތެރިއެކެވެ.
ޑޭވިސް ދިން ބޯޅައަކުން، މެޗުގެ 70 ވަނަ މިނިޓްގައި ބަޔާންގެ ފަސް ވަނަ ލަނޑު ޖެހީ މި ފަހަރުގެ ޓްރާންސްފާގައި ޕީއެސްވީ އައިންދޯވަން އިން ބަޔާނަށް ބަދަލުވި، މޮރޮކޯގެ ފޯވާޑް، އިސްމާއިލް ސައިބާރީ އެވެ. އޭގެ ފަހުން، ތިން މިނިޓް ތެރޭ ދެ ލަނޑު ޖަހައިގެން، އޮލީސޭ ވަނީ މެޗުގައި އޭނާގެ ހެޓްރިކް ފުރިހަމަކޮށްފަ އެވެ. މި ދެ ލަނޑު ޖަހަން ވެސް ފުރުސަތު ތަނަވަސްކޮށްދިނީ ޓޮމް ބިޝޮފް އެވެ.
މި މޮޅާ އެކު، ޖަރުމަނު ލީގުގެ އެންމެ ފަހުގެ ޗެމްޕިއަން، ބަޔާނުން ވަނީ ހަަތަރު މެޗުން 10 ޕޮއިންޓް ހޯދައި، ލީގުގެ އެއް ވަނަ އަށް ޖެހިލައިފަ އެވެ. އެކަމަކު، މި ހަފްތާގައި ބޮރޫޝިއާ ޑޯޓްމަންޑާއި ފްރައިބާގް އަދި އޮއުގްސްބާގު ކުޅޭ މެޗުތަކުގެ ނަތީޖާ ނުކުންނަ ގޮތަކުން ބަޔާނުގެ މަގާމަށް ބަދަލު އައުމުގެ ފުރުސަތު އެބައޮތެވެ.
