ސެވިލް، ސްޕެއިން (ސެޕްޓެމްބަރު 20) - ހަތަރު ދުވަސް ތެރޭ ރަފީނިއާ ހެދި ދެ ވަނަ ހެޓްރިކާ އެކު ބާސެލޯނާ އިން ސްޕެނިޝް ލީގުގައި ރޭ ފަހަތުން އަރައި 3-1 އިން ސެވިއްޔާ އަތުން މޮޅުވެއްޖެ އެވެ.
މިިދިޔަ ބުދަ ދުވަހުގެރޭ، ރޭސިން ސަންޓަންޑޭ އަތުން 7-2 އިން ބާސެލޯނާ މޮޅުވި މެޗުގައި ވެސް ރަފީނިއާ ވަނީ ހެޓްރިކެއް ހަދައިފަ އެވެ. ރޭގެ މެޗުގައި ޖެހި ގޯލުތަކާ އެކު، ރަފީނިއާ މި ސީޒަނުގެ މިހާތަަނަށް ހުރިހާ މުބާރާތެއްގައި ވަނީ 14 ލަނޑު ޖަހައިފަ އެވެ.
އަމިއްލަ ދަނޑުގަައި ކުޅުނު ސެވިއްޔާ އިން ވަނީ ރޭގެ މެޗުގައި ލީޑުނަގައިފަ އެވެ. މިއީ، މެޗުގެ 19 ވަނަ މިނިޓްގައި، ފީލިކްސް ކޮރެއިއާ ދިން ބޯޅައަކުން ޔޫސުފް ފޮފާނާ ޖެހި ގޯލެކެވެ. މި ލަނޑާ އެކު، ސެވިއްޔާ އިން ލީޑުގައި އޮތީ ތިން މިނިޓް ވަންދެނެވެ. މެޗުގެ 22 ވަނަ މިނިޓްގައި ބާސެލޯނާގެ އަންދްރެސް ކްރިސްޓެންސަން ދިން ބޯޅައަކަށް އަރައި ރަފީނިއާ ވަނީ ސެވިއްޔާގެ ކީޕަރު، އޮޑީސިއަސް ވްލާޗޯޑިމޯސް ކައިރިން ގޯލަށް ބޯޅަ އަމާޒުކޮށްލައިފަ އެވެ.
ފުރަތަމަ ހާފުގެ ބާކީ ބައިގައި ދެ ޓީމުން ވެސް ލަނޑެއް ޖެހޭތޯ ކުރި މަަސައްކަތް ކާމިޔާބެއްނުވި އެވެ. އެކަމަކު، ދެ ވަނަ ހާފު ފެށިގެން ހަތް މިިނިޓް ތެރޭ ބާސެލޯނާ އިން ވަނީ ލަނޑު ޖަހައި، މެޗުގައި ފުރަތަމަ ފަހަރަށް ލީޑުނަގައިފަ އެވެ. މިއީ، 52 ވަނަ މިނިޓްގައި ލަމީން ޔަމާލް ދިން ބޯޅައަކުން ރަފީނިއާ ޖެހި ގޯލެކެވެ. ބާސެލޯނާ އިން ދެން ކާމިޔާބުކުރި ގޯލުގައި ވެސް ފެނިގެންދިޔައީ މި ކޮމްބިނޭޝަން އެެވެ. މެޗުގެ 69 ވަނަ މިނިޓްގައި ރަފީނިއާ ހެޓްރިކް ހެދި ގޯލު ޖަހަން ވެސް ފުރުަސަތު ތަނަވަސްކޮށްދިނީ ޔަމާލް އެވެ.
މިއީ، ބާސެލޯނާ އިން ލީގުގައި ޖެހިޖެހިގެން މޮޅުވި ހަތް ވަނަ މެޗެވެ. އަދި، ސީޒަނުގެ ހުރިހާ މުބާރާތަކަށް ބަލާނަމަ، ބާސެލޯނާ އިން ޖެހިޖެހިގެން ހޯދި އަށް ވަނަ މޮޅެެވެ.
ބާސެލޯނާ އިން މި ވަގުތު ސްޕެނިޝް ލީގުގެ ކުރީގައި އޮތީ ދެ ވަނައިގައި އޮތް ރެއާލަށް ވުރެން ހަ ޕޮއިންޓް އިތުރަށް ހޯދައިގެންނެވެ. ހަތް މެޗުން 21 ޕޮއިންޓާ އެކު، ސައްތަ އިން ސައްތަ ރެކޯޑެއް އޮތް ބާސެލޯނާ ލީގު ތާވަލުގެ ކުރީގައި އޮތްއިރު، ހަ މެޗުން 15 ޕޮއިންޓާ އެކު، ދެ ވަނައިގައި އޮތް ރެއާލާ އެއްވަރަށް ތިން ވަނައިގައި އޮތް ރެއާލް ބެޓިސް ވެސް ވަނީ މެޗު ކުޅެގެން ޕޮއިންޓް ހޯދައިފަ އެވެ.
ރެއާލުން މިރޭ އެތުލެޓިކޯ މެޑްރިޑާ ކުޅެން ޖެހޭއިރު، ބެޓިސް ބައްދަލުކުރާނީ ޑިޕޯޓިވޯ ލަ ކަރޫނިއާއާ އެވެ.
