މެޑްރިޑް (ސެޕްޓެމްބަރު 13) - ސްޕެނިޝް ލީގުގައި ރޭ ކީިލިއަން އެމްބާޕޭގެ ދެ ގޯލާ އެކު، ރެއާލް މެޑްރިޑުން 4-1 އިން ރަޔޯ ވަޔެކާނޯ ބަލިކޮށް އަލުން މޮޅުވުމުގެ ޓްރެކަށް އަތުވެއްޖެ އެވެ.
ލީގުގެ ފުރަަތަމަ ތިން މެޗުން މޮޅުވި ނަމަވެސް، އެންމެ ފަހުން ރެއާލް ކުޅުނު މެޗުން ވަނީ ރެއާލް ބެޓިސް އަތުން ބަލިވެފަ އެވެ. އެ މެޗުގެ ފަހު ވަގުތު ރެއާލް ބަލިނުވެ ސަލާމަތްކޮށްދޭން ލިބުނު ޕެނަލްޓީ ނާކާމިޔާބުވި އެމްބާޕޭ ވަނީ ރޭ ރަޔޯ ބަލިިކުރުމުގައި ރެއާލަށް މުހިންމު ރޯލެއް އަދާކޮށްފަ އެވެ.
އަމިއްލަ ދަނޑުގައި ރޭ ކުޅުނު ރެއާލުން ވަނީ ފުރަތަމަ 17 މިނިޓް ތެރޭ ދެ ލަނޑު ޖަހައިފަ އެވެ. ރެއާލުން 14 ވަނަ މިނިޓްގައި ލީޑުނެގީ އެމްބާޕޭ ޖެހި ޕެނަލްޓީންނެވެ. މިއީ، ރެއާލްގެ ފުލްބެކް، އަލްވާރޯ ކަރޭރާސް އަށް ރަޔޯގެ އޭރިއާތެރެއިން އެ ޓީމުގެ ފްލޯރިއަން ލެޖުއިން ކުރި ފައުލަކަށް ދިން ޕެނަލްޓީ އެކެވެ. އެމްބާޕޭ ވަނީ ހަމަޖެހިލައިފައި ޕެނަލްޓީ ގޯލަށް ވައްދާލައިފަ އެވެ.
ލީޑުނެގިތާ ތިން މިނިޓް ފަހުން ރެއާލަށް ދެ ވަނަ ލަނޑު ޖަހައިދިނީ ކަރޭރާސް އެވެ. މިއީ، މެޗުގެ 17 ވަނަ މިނިޓްގައި އެމްބާޕޭ ދިން ބޯޅައަކުން ޖެހި ގޯލެކެވެ. އޭގެ ފަހުން، ރެއާލްގެ ވިނީޝިއުސް ޖޫނިއާ (ވިނީ) ފޮނުވާލި ޝޮޓެއް ރަޔޯގެ ކީޕަރު، އެމިލް އަޑުއޭރޯ ވަނީ މަތަކޮށްފަ އެވެ. އެކަމަކު، މެޗުގެ 35 ވަނަ މިނިޓްގައި، ވިނީ ދިން ބޯޅައަކުން ޖޫޑް ބެލިންހަމް ވަނީ ފުރަތަމަ ހާފު ނިމުމުގެ ކުރިން ރެއާލްގެ ތިން ވަނަ ލަނޑު ޖަހައިފަ އެވެ.
ތިން ގޯލު ފަހަތުން ފަށަން ޖެހުނު ނަމަވެސް ރަޔޯ އިން ދެ ވަނަ ހާފު ފެށިގެން ހަ ވަނަ މިނިޓްގައި ލަނޑު ޖަހައިފަ އެވެ. މިއީ، ރެއާލް އޭރިއާތެރެއިން ލިބުނު ފުރުސަތަކުން ސާޖިއޯ ކަމޭލޯ ޖެހި ގޯލެކެެވެ. އެ ބޯޅަ ހުއްޓުވަން ރެއާލްގެ ކީޕަރު، ތިބޯ ކޯޓުއާ އަށް މާ ބޮޑު ކަމެއް ނުކުރެވުނެވެ.
މެޗުގައި ރެއާލުން ފަހު ލަނޑު ޖެހީ އިތުރު ވަގުތުގެ ތެރޭގަ އެވެ. މިއީ، މެޗުގެ އިތުރު ވަގުތުގައި، ތުރުކީގެ ތަރި، އާޑާ ގުލާ ދިން ބޯޅައަކުން އެމްބާޕޭ ޖެހި ގޯލެކެެވެ.
މި ނަތީޖާއާ އެކު، ރެއާލުން ވަނީ އެއް ވަނައިގައި އޮތް ބާސެލޯނާ އަށް ވުރެން އެއް މެޗު އިތުރަށް ކުޅެގެން އެ ޓީމާ ޕޮއިންޓުން އެއްވަރުކޮށްފަ އެވެ. ބާސެލޯނާ އަށް ހަތަރު މެޗުން 12 ޕޮއިންޓް ލިބިފައިވާއިރު، ރެއާލަށް އެ އަދަދަށް ޕޮއިންޓް ހޯދުނީ ފަސް މެޗު ކުޅެގެންނެވެ.
