އެލްޗޭ، ސްޕެއިން (ސެޕްޓެމްބަރު 16) - ސްޕެނިޝް ލީގުގައި ރޭ ދެ ގޯލުގެ ލީޑެއް އަތުން ގެއްލި ޕްރެޝަރަށް ވެއްޓުނު ރެއާލް މެޑްރިޑް، ފަހު ވަގުތު ކާލޯސް އެސްޕީ ޖެހި ގޯލުން 3-2 އިން އެލްޗޭ އަތުން މޮޅުވެއްޖެ އެވެ.
މިއީ، ފަހު ވަގުތު އެސްޕީ ޖެހި ލަނޑަކުން މި ސީޒަނުގައި ރެއާލް މޮޅުވި ދެ ވަނަ ފަހަރެވެ. މި ފަހަރުގެ ލީގުގައި ރެއާލުން ކުޅުނު ފުރަތަމަ މެޗުގައި އެސްޕަންޔޯލާ އެއްވަރުވާން ދަނިކޮށް ވެސް ރެއާލް މޮޅުކޮށްދިން ލަނޑު ބެންޗުން އަރައި ޖެހީ، މި ފަހަރު ލެވަންޓޭ ދޫކޮށް ރެއާލާ ގުޅުނު ޒުވާން ފޯވާޑް، އެސްޕީ އެވެ.
އެލްޗޭ ދަނޑުގައި ރޭ ކުޅުނު މެޗުގެ 25 ވަނަ މިނިޓްގައި ރެއާލުން ލީޑުނެގި އެވެ. މިއީ، ހިލޭ ޖެހުމަކުން، ރެއާލްގެ ތުރުކީގެ ތަރި، އާޑާ ގުލާ ފޮނުވާލި ބޯޅައެއް ދަނޑީގައި ޖެހިފައި، އެލްޗޭ ކީޕަރު، މަޓިއަސް ޑިޓޫރޯ ފައިގައި ޖެހިފައި ބައިކޮޅަށް ވަން ގޯލެކެވެ.
ފުރަތަމަ ލަނޑު ޖެހިތާ ހަތް މިނިޓް ފަހުން، މެޗުގެ 32 ވަނަ މިނިޓްގައި ރެއާލުން ދެ ވަނަ ލަނޑު ޖެހި އެވެ. މިއީ، ކައުންޓަ އެޓޭކުގައި ޔަން ޑިއޮމަންޑޭ ނެގި ހުރަހަކުން ކީލިއަން އެމްބާޕޭ ޖެހި ގޯލެކެވެ. އެމްބާޕޭ ވަނީ ހަމަޖެހިލައިފައި ގޯލުގެ ތިރީ ކަަނަށް ބޯޅަ ފޮނުވާލައިފަ އެވެ. އޭގެ ފަހުން، އެމްބާޕޭ ޖެހި ގޯލެއް ވަނީ އޮފްސައިޑް ކަމަށް ނިންމައިފަ އެވެ. އަދި، ވިނީޝިއުސް ޖޫނިއާ ޖެހި ޝޮޓެއް އެލްޗޭ ކީޕަރު ޑިޓޫރޯ މަތަކުރި އެވެ.
މެޗަކުން މޮޅެއް ނުލިބި، ލީގުގެ އެންމެ ފުލުގައި އޮތް އެލްޗޭ އިން ވަނީ ދެ ވަނަ ހާފުގައި ކުޅެން އަރައި ދެ ލަނޑު ޖަހައި އެއްވަރުކޮށްފަ އެވެ. އެ ގޮތުން، 71 ވަނަ މިނިޓްގައި އެލްޗޭ އިން ފުރަތަމަ ލަނޑު ޖެހީ އޭރިއާތެރެއަށް ހުރަސްވި ބޯޅައަކުން އަބިއެލް އޮސޯރިއޯ ބޮލުން ޖެހި ގޯލުންނެވެ. އަދި، މެޗުގެ 83 ވަނަ މިނިޓްގައި، ރެއާލްގެ އޭރިއާތެރޭގައި ހުރެފައި، ތިރީ ކަނަށް ބޯޅަ އަމާޒުކޮށްލައިގެން ފެރް ނީނޯ ވަނީ އެލްޗޭ އަށް އެއްވަރުކޮށްދީފަ އެވެ.
އިތުރު ވަގުތުގެ ފުރަތަމަ މިނިޓްގައި، ރެއާލުން ކައުންޓަ އެޓޭކުގައި ކުރިއަށް ޖެހި، އެމްބާޕޭ ގޯލު ކުރިމައްޗަށް މުޅިން ހުސްކޮށްލާފައި އެސްޕީ އަށް ދިން ބޯޅަ އޭނާ ވަނީ ހަމަޖެހިލައިފައި ގޯލަށް ފޮނުވާލައިފަ އެވެ.
މި ނަތީޖާއާ އެކު، ރެއާލުން ވަނީ ލީގުގެ އެއް ވަނައިގައި އޮތް ބާސެލޯނާ އަށް ވުރެން އެއް މެޗު އިތުރަށް ކުޅެގެން އެ ޓީމާ ޕޮއިންޓުން އެއްވަރުކޮށްފަ އެވެ. އެއް ވަނައިގައި އޮތް ބާސެލޯނާ އަށް ފަސް މެޗުން 15 ޕޮއިންޓް ލިބިފައިވާއިރު، ރެއާލުން 15 ޕޮއިންޓް ހޯދީ ހަ މެޗު ކުޅެގެންނެވެ. މިރޭ، ރޭސިން ސަަންޓަންޑެއާއާ ކުޅެ، މޮޅުވެގެން ބާސެލޯނާ އަށް އަނެއްކާ ވެސް ތިން ޕޮއިންޓުގެ ލީޑެއް ނެގުމުގެ ފުރުސަތު އެބައޮތެެވެ.
