ޕާކިސްތާން ފުޓްބޯޅަ ބޭނުންވާ މިސްރާބުން ކުރިއަރާނީ ރަނގަޅު ޕްރޮފެޝަނަލް ފުޓްބޯޅަ ލީގެއް އޮވެގެން ކަމަށް ޕާކިސްތާން ގައުމީ ފުޓްބޯޅަ ޓީމުގެ ކޯޗު ނޮލްބާޓޯ ސޮލާނޯ ބުނެފި އެވެ.
އިނގިރޭސި ޕްރިމިއާ ލީގުގައި ނިއުކާސަލް ޔުނައިޓެޑާއި އެސްޓަން ވިލާ އަށް ކުޅުމުގެ އިތުރުން، ޕެރޫ ގައުމީ ޓީމުގެ އެސިސްޓަންޓް ކޯޗަަކަށް މަސައްކަތްކުރި ސޮލާނޯ، މިހެން ބުނެފައިވަނީ، ޓެކްނޯ ސާފް ޗެމްޕިއަންޝިޕް 2026 ގެ ފައިނަލުގައި އިންޑިއާ އަތުން 2-1 އިން ބަލިވި މެޗަށް ފަހު އޮތް ނޫސްވެރިންގެ ބައްދަލުވުމުގަ އެވެ.
މި ފަހަރުގެ ސާފް ޗެމްޕިއަންޝިޕްގައި އިންޑިއާ އަތުން ޕާކިސްތާން ދެ ފަހަރު ބަލިވި އެވެ. ގްރޫޕް ސްޓޭޖުގެ ފުރަތަމަ މެޗުން ޕާކިސްތާން އަތުން އިންޑިއާ 3-2 އިން މޮޅުވި އެވެ. އަދި، ފައިނަލުގައި ޕާކިސްތާނުން ލީޑުނެގި ނަމަވެސް ފަހަތުން އަރައި އިންޑިއާ މޮޅުވީ އެވެ.
އިންޑިއާއާ ދެކޮޅަށް ޕާކިސްތާނުން ގްރޫޕް ސްޓޭޖުގައި ކުޅުނު މެޗުގައި އެ ޓީމުގައި ހިމެނޭ ޔޫރަޕްގެ ލީގުތަކުގައި ކުޅޭ ކުުންތެރިން ނެތެވެ. އެކަމަކު، ފައިނަލް މެޗުގައި އެ ކުޅުންތެރިންނާ އެކު ކުޅެގެން ވެސް އިންޑިއާ ކައިރިން މޮޅެއް ނުހޯދެ އެވެ. އަނެއްކޮޅުން، ސާފް ޗެމްޕިއަންޝިޕްގައި ކުޅުނީ އިންޑިއާގެ ސީނިއާ ޓީމެއް ނޫނެވެ. އެކި ގޮތްގޮތުން ބަލައިގެން އެކުލަވާލި ޓީމެކެވެ.
"މިދިޔަ 10 ނޫނީ 15 ވަރަކަށް އަހަރު ޕްރޮފެޝަނަލް ލީގެއްގެ ތެރެއިން ކަންކަން ކުރެވިގެން އެ އައި ތަފާތު އެކި ހާލަތްތަކުގައި މި ފެނިގެންދިޔައީ،" ދިމާވި ގޮންޖެހުންތަކާއެކު ވެސް އިންޑިއާ އިން ތަށި ހޯދުމާ ގުޅޭގޮތުން ސޮލާނޯ ބުންޏެވެ.
"ޕާކިސްތާނާއި އިންޑިއާގެ ފުޓްބޯޅަ އަޅާކިޔަންޏާ، ގަބޫލުކުރަންޖެހޭ ހަގީގަތަކީ އެ މީހުން އެ އޮތީ ކުރީގައި ކަން،"
ސޮލާނޯ ބުނީ، މިއީ ޕާކިސްތާނުން އެ ގައުމުގެ ފުޓްބޯޅަ ދެން އޮތް ހަރުފަތަށް ގެންދިއުމަށްޓަކައި ގިނަ ފިޔަވަޅުތަކެއް ވިސްނުންތެރިކަމާ އެކު އަޅަން ޖެހޭ ވަގުތެއް ކަމަށެވެ. މިދިޔަ އަަހަރު ޕާކިސްތާންގެ ކޯޗުކަމާ ހަވާލުވި ސޮލާނޯ ބުނީ، އަމާޒަކީ އަންނަ އަހަރު ރަނގަޅު ފެންވަރެއްގެ ޕްރޮފެޝަނަލް ލީގެއް ފެށުން ކަމަށެވެ.
"ދުނިޔޭގެ އެކި ގައުމުތަކުން (ޕާކިސްތާން ދަރިކޮޅަށް ނިސްބަތްވާ) 15 ނޫނީ 20 ވަރަކަށް ކުޅުންތެރިން ގެނެސްގެން ޓީމެއް ހަދައިގެން ވަރުގަދަ ޓީމެއް ބިނާކުރުމަކީ ހައްލެއް ނޫން. އަހަރެމެން އެބަޖެހޭ ލޯކަލް ކުޅުންތެރިން ކުރިއަރައިގެން ދާނެ ފަދަ ވަރުގަދަ ލީގެއް ކުރިއަށްގެންދަން،" ސޮލާނޯ ބުންޏެވެ.
އެންމެ ފަހުން، ޕާކިސްތާންގައި ފުޓްބޯޅަ ލީގެއް ފުރިހަމަަކޮށް ބޭއްވީ، 2018/2019 ސީޒަނުގަ އެވެ.
ޕާކިސްތާނުން ވަނީ މި އަހަރު ރާއްޖޭގައި ބޭއްވި ޑައިމަންޑް ޖުބިލީ ފުޓްބޯޅަ މުބާރާތުގެ ޗެމްޕިއަންކަން ޖޫން މަހު ހޯދައިފަ އެވެ. އޭގެ ފަހުން، ސެޕްޓެމްބަރު/ އޮކްޓޫބަރު މަހު، ފީފާ އާސިއާން ކަޕްގައި ވާދަކޮށް ރަނގަޅު ނަތީޖާތަކެއް ނެރުނެވެ. އަދި، ސާފް ޗެމްޕިއަންޝިޕްގެ ފައިނަލުން ފުރަތަމަ ފަހަރަށް ޖާގަ ހޯދައި ރަނގަޅު ކުުޅުމެއް މުޅި މުބާރާތުގައި ދެއްކި އެވެ.
ސޮލާނޯ ބުނީ، ޕާކިސްތާން ފުޓްބޯޅަ ކުރިއަށްދާ މިސްރާބު ރަނގަޅު ކަމަށާއި އެކަމަކު މި ވަގުތު ދުނިޔޭގެ ފުޓްބޯޅައިގައި "ހުއްޓިގެން ބަލަހައްޓައިގެން" ހުރެގެން ވާނެ ފައިދާއެއް ނެތް ކަމަށެވެ. ކޮންމެ ގައުމަކުން ވެސް ފުޓްބޯޅައިގައި ކުރިއަށްދާން އެ ކުރެވޭނެ ކަމެއް ހުރި ވަސީލަތްތަކެއްގެ ބޭނުންހިފައިގެން ކުރަމުން އަންނަ ކަމަށް ސޮލާނޯ ވަނީ ފާހަގަކޮށްފަ އެވެ.







