ޑޮލަރު ޓްރާންސްފާތައް އަންނަ ހަފުތާގައި ހަމައަކަށް އެޅޭނެ: ބީއެމްއެލް

ބޭންކް އޮފް މޯލްޑިވްސް (ބީއެމްއެލް) އިން ވޭތުވެދިޔަ ދެ ހަފުތާގެ ތެރޭގައި ޓެލެގްރަފިކް ޓްރާންސްފާ (ޓީޓީ) އާއި އެހެން ބޭންކުތަކަށް ފޮނުވާ ޓްރާންސްފާތައް ހިމެނޭހެން ޑޮލަރުގެ މުއާމަލާތްތައް ފުރިހަމަކުރުމުގައި ލަސްތަކެއް ކުރިމަތިވީ ކަމަށް އެއްބަސްވެ، އަންނަ ހަފުތާގެ ތެރޭގައި އެ މައްސަލަ އާންމު ހާލަތަށް ގެނެވޭނެ ކަމަށް އެ ބޭންކުން މިއަދު ބުނެފި އެވެ. 

މި މައްސަލައިގައި ބީއެމްއެލްއިން ނެރުނު ބަޔާނެއްގައި ވަނީ މި ހާލަތު މެދުވެރިވީ ޑޮލަރު ވިއްކަން ޖެހޭ މިންވަރު، ހާއްސަކޮށަް ރުފިޔާ އެކައުންޓުތަކުން ކުރާ ބޭރުގެ މުއާމަލާތްތަކަށް، ވަރަށް ބޮޑަށް އިތުރުވެފައިވާތީ ކަަމަށެވެ.

އެ ބޭންކުން ހިއްސާކުރި ތަފާސްހިސާބުތަކުގައި ވަނީ މިދިޔަ މަހުގެ ނިޔަލަށް މަހެއްގެ މައްޗަށް އެވަރެޖުކޮށް 81.6 މިލިއަން ޑޮލަރު މަގުން 653 މިލިއަން ޑޮލަރު ވިކްކާފައިވާ ކަމަށެވެ. މިއީ މިދިޔަ އަހަރަށް ވަރު 33.3 ޕަސެންޓުގެ އިތުރުވުމެކެވެ. މި ނިސްބަތުން ޑޮލަރު ވިއްކުން ކުރިއަށްދާ ނަމަ އަހަރު ނިމޭއިރު، އެއް ބިލިއަން ޑޮލަރު ވިއްކޭނެ ކަމަށް އެ ބޭންކުން ލަފާކުރެ އެވެ.

ބީއެމްއެލްއިން ބުނީ ބޭންކަށް މަރުކުރެވޭ ޑޮލަރާ އަޅާބަލާއިރު، މި މިންވަރަށް ރުފިޔާއަށް ޑޮލަރު ވިއްކައިގެން ބޭރުވުމަކީ ދެމެހެއްޓެނިވި ކަމެއް ނޫން ކަަމަށެވެ. އަދި މި ހިނގާ ސެޕްޓެމްބަރު މަހަކީ، އާންމުކޮށް ވެސް ޑޮލަރު ތާށިކަން އެންމެ ބޮޑުވާ މަސް ކަމަށް ބުނެ، ގޮންޖެހުންތައް އިތުރުވެފައިވާ ކަމަށް އެ ބޭންކުން ބުންޏެވެ. 

ބީއެމްއެލްއިން ބުނީ ޑޮލަރު ލިބޭ މިންވަރާއި ޑޮލަރު ހޭދަވާ މިންވަރު މެނޭޖުކުރަން އެ ބޭންކުން ފިޔަވަޅުތަކެއް އަޅާފައިވާ ކަމަށެވެ. އެ ގޮތުން  އީ-ކޮމާސް މުއާމަލާތްތައް ލިމިޓްކޮށް، ޒަރޫރީ އަދި ކޮންމެހެން ބޭނުންތެރި މުއާމަލާތްތަކަށް އިސްކަންދޭން ފަށާފައިވާ ކަމަށް އެ ބޭންކުން ބުންޏެވެ.

މި ފިޔަވަޅުތަކުގެ ނަތީޖާ ފެނި، ބޭންކުން ބޭރުވާ ޑޮލަރުގެ މިންވަރު، ބޭންކަށް ލިބޭ ޑޮލަރުގެ މިންވަރާ އެއްހަމައެއްގައި ހިފެހެއްޓިފައިވާ ކަމަށް ބީއެމްއެލްއިން ބުންޏެވެ. 

ބީއެމްއެލްއިން ޑޮލަރު ސަޕޯޓު ހޯދަން ވަރަށް ދަތި، ގިނަ ވިޔަފާރިތަކަށް ނުލިބޭ

ބީއެމްއެލް މެދުވެރިކޮށް ވިޔަފާރިތަކުން ފޮނުވާ ޓީޓީތަކަށް ޑޮލަރު ސަޕޯޓު ލިބުން ދަތިވެ، އެކައުންޓުގައި ފައިސާ ނެތް ނަމަ އިތުރު އެންގުމަކާ ނުލައި ޓީޓީ ބާތިލުވާނެކަން އެ ބޭންކުން އަންގައިފި.މި ބަދަލުގެ ސަބަބުން މުދާ ގެންނަ ފަރާތްތަކަށް ބޮޑެތި ގޮންޖެހުންތަކެއް ކުރިމަތިވަމުންދާއިރު، ޑޮލަރު ލިބޭ މިންވަރު މަދުވުމުގެ ޝަކުވާ ވިޔަފާރިވެރިން ދަނީ ކުރަމުން.

ބީއެމްއެލްގެ ބަޔާން ނިންމާލަމުން އެ ބޭންކުން ވަނީ، މިހާރު ދިމާވެފައިވާ މައްސަލައަކީ ބޭންކުގެ މާލީ ހާލަތުގެ މައްސަލައެއް ނޫން ކަމަށް ކަސްޓަމަރުންނަށް ޔަގީންކަން އަރުވާފަ އެވެ. އެ ބޭންކުން ބުނާ ގޮތުގައި މިއީ ޑޮލަރު ސަޕްލައިގެ ވަގުތީ މައްސަލައެކެވެ.

ބޭންކަކީ މާލީގޮތުން ހަރުދަނާ ބޭންކެއް. މިހާރު ދިމާވެފައިވާ ހާލަތަކީ ޑޮލަރުގެ ޑިމާންޑާއި ސަޕްލައިއާ ދެމެދު އުފެދިފައިވާ ވަގުތީ ނުތަނަވަސްކަމެއް. މިއީ ބޭންކުގެ އޮޕަރޭޝަންތަކުގެ ނުވަތަ ބެލެންސް ޝީޓުގެ ބަލިކަށިކަމެއް ނޫން." ބީއެމްއެލްގެ ބަޔާނުގައި ވެ އެވެ.

ބީއެމްއެލްގެ ޑޮލަރު ތާށިކަމުގެ މައްސަލައަށް އަވަސް ހައްލެއް ލިބޭނެ ކަމުގެ ޔަގީންކަން އެ ބޭންކުން ދިންއިރު، އެތެރޭގެ ބޭންކުތަކަށް ޓްރާންސްފާ ނުކުރެވޭތީ އާއީ ޓީޓީ ފޮނުވާތާ އެތައް ދުވަހެއް ވާއިރުވެސް އެ ފައިސާ ނުފޮނުވޭތީ ވިޔަފާރިވެރިން ތިބީ ވަރަށް ކަންބޮޑުވެފަ އެވެ. ހަމައެހެންމެ، މިހާރު ޑޮލަރު ސަޕޯޓު ހޯދަން ވެސް ވަރަށް ދަތި ކަމަށް އެ ވިޔަފާރިތަކުން އަންނަނީ ބުނަމުންނެވެ. 

އޭގެ އިތުރުން، އާންމުންނަށް ވެސް ރުފިިޔާ ކާޑުތައް ބޭނުންކޮށްގެން ޑޮލަރުން މުއާމަލާތް ކުރަން ވަރަށް އުނދަގުލެވެ. ބީއެމްއެލްއިން ކޮންމެ ދުވަހަކު ހަތެއް ޖަހާއިރު ރީސެޓުވާ ގޮތަށް ޑެއިލީ ބަޖެޓެއް ކަނޑައެޅި ފަހުން ވެސް ކާޑުން ފައިސާ ކަނޑަން ވަރަށް އުނދަގޫ ކަމަށް އާންމުން ވެސް އަންނަނީ ޝަކުވާކުރަމުންނެވެ.