ސްޓޭޓް ބޭންކް އޮފް އިންޑިއާ (އެސްބީއައި) އަށް ދައްކަން ޖެހޭ 50 މިލިއަން ޑޮލަރު ރާއްޖެއިން ދެއްކީ ބެންކް އޮފް މޯލްޑިވްސް (ބީއެމްއެލް) ގައި ހުރި އާންމުންގެ ފައިސާއިން ކަމަށް ކުރީގެ ރައީސް މުހައްމަދު ނަޝީދު މިއަދު ވިދާޅުވެއްޖެ އެވެ.
ނަޝީދު އެކްސް ގައި ވިދާޅުވީ ވިޔަފާރިވެރިންނާއި އާންމުން ތަކެތި ގަންނަން ބީއެމްއެލްއަށް ޑޮލަރު ޖަމާކުރުމުން އެ ޑޮލަރު ސަޕްލަޔަރުންނަށް ނުދަނީ އެ ފައިސާ ސަރުކާރުން ނަގާތީ ކަމަށެވެ.
"ދައުލަތުގެ ރިޒާވްގައި އެއްވެސް މިންވަރަކަށް ޑޮލަރު ނެތް. ޓީ-ބިލްގެ 50 މިލިއަން ޑޮލަރު ދެއްކީ ބީއެމްއެލްގައި ހުރި އާންމުންގެ ފައިސާއިން. ވިޔަފާރިވެރިން، އާންމުން ތަކެތި ގަންނަން ބީއެމްއެލްއަށް ޑޮލަރު ޖަމާކުރީމަ އެ ޑޮލަރު ސަޕްލަޔަރުންނަށް ނުދަނީ ސަރުކާރުން އެ ފައިސާ ނަގާތީ،" ނަޝީދު ވިދާޅުވި އެވެ.
އިންޑިއާއަށް ދައްކަންޖެހޭ ފައިސާ އަނބުރާ ދެއްކުމުން މޯލްޑިވްސް މަނިޓަރީ އޮތޯރިޓީ (އެމްއެމްއޭ) ގެ ޔޫސަބަލް ރިޒާވް ވަރަށް ބޮޑަށް ދަށްވެ، އަސާސީ ކަންކަމަށް ބޭނުންކުރަން ފައިސާ ނުހުންނާނެ ކަމަށްވެސް މިއަދު ނަޝީދު ވިދާޅުވި އެވެ.
"އެހެންކަުން މާދަމާއިން ފެށިގެން އެމްއެމްއޭގެ ޔޫސަބަލް ރިޒާވް ވަރަށް ބޮޑުތަނުން ދަށްވާނެ އެވެ. ކާޑަށް، ތެލަށް އަދި ބޭހަށް ދައްކާނެ ފައިސާ ސަރުކާރުގައި ނުހުންނާނެ އެވެ،" ނަޝީދު ވިދާޅުވި އެވެ.
ފިނޭންސުން ވަނީ ކުރިއަށް އޮތް ތަނުގައި ވެސް ދަރަނި ދެއްކުމަށް ޓަކައި ދުރާލާ ތައްޔާރުވެ، ކަނޑައެޅިފައިވާ ވަގުތަށް ދަރަނި ދައްކައި ހަލާސްކުރަމުން އަންނާނެ ކަމަށް މިއަދު ބުނެފަ އެވެ.
އެމްއެމްއޭއިން އާންމުކޮށްފައިވާ އެންމެ ފަހުގެ ރިޒާވު އަދަދުތަކުން ދައްކާ ގޮތުގައި މިދިޔަ މަސް ނިމުނުއިރު، ޖުމްލަ ރިޒާވުގައި ހުރީ 643 މިލިއަން ޑޮލަރެވެ. އަދި، ބޭނުންކުރެވޭ ރިޒާވުގައި ހުރީ 200 މިލިއަން ޑޮލަރެވެ.
