ކުރީ ސަރުކާރުން ސްޓޭޓް ބޭންކް އޮފް އިންޑިއާ (އެސްބީއައި) އަށް ވިއްކާފައިވާ ޓީބިލުތަކަށް ދައްކަން ޖެހޭ ފައިސާގެ ތެރެއިން ބާކީ ނުދައްކާ އޮތް 50 މިލިއަން ޑޮލަރުގެ ދަރަނި ދައްކައި ހަލާސްކޮށްފި ކަމަށް މިއަދު އިއުލާންކޮށްފި އެވެ.
ފިނޭންސް މިނިސްޓްރީން ނެރުނު ނޫސް ބަޔާނެއްގައި ބުނީ، ކުރީ ސަރުކާރުން ބަޖެޓު ސަޕޯޓުގެ ގޮތުގައި ނަގާފައިވާ 150 މިލިއަން ޑޮލަރު އެއްކޮށް ދައްކާ ނިމިފައިވާ ކަމަށެވެ. މި އަދަދު އެއްކޮށް ދައްކާފައި ވަނީ މި ސަރުކާރުގެ ދައުރުގެ ތެރޭގަ އެވެ.
އެ ގޮތުން ފުރަތަމަ ޕޭމަންޓު ދެއްކީ، ޖެނުއަރީ 2024 ގައި އެވެ. ދެވަނަ ޕޭމަންޓު ދެއްކީ މި އަހަރުގެ މެއި 11، ގައި ކަމަށް ފިނޭންސުން ބުންޏެވެ.
ކުރީ ސަރުކާރުން 2019 ގައި އެސްބީއައިއަށް ޓީބިލުތަކެއް ވިއްކައިގެން ނެގި މި ދަރަނި އެ ސަރުކާރުގެ ދައުރުގެ ތެރޭގައި ތިން ފަހަރެއްގެ މަތިން ރޯލްއޯވާ ކުރި އެވެ.
ނަމަވެސް މި ސަރުކާރުން ވަނީ ވެރިކަމާ ހަވާލުވުމަށް ފަހު، އެ ފައިސާގެ ތެރެއިން 50 މިލިއަން ޑޮލަރު އަނބުރާ ދައްކާފަ އެވެ. އެ ފަހަރު ފައިސާ ދެއްކުމަށް ފަހު، މި ސަރުކާރުން ވެސް އިންޑިއާ ސަރުކާރުގައި އެދިގެން ބަކީ 100 މިލިއަން ޑޮލަރުގެ ދަރަނި ރޯލްއޯވާކުރި އެވެ.
ފިިނޭންސް މިނިސްޓްރީން އާންމުކޮށްފައިވާ ތަފާސްހިސާބުތަކުން ދައްކާ ގޮތުގައި މި ސަރުކާރުން ވަނީ ދެ އަހަރާ ބައިގެ ތެރޭގައި ބޭރު ދަރަނި ދައްކަން 2.3 ބިލިއަން ޑޮލަރު ހަރަދުކޮށްފަ އެވެ. މީގެ ތެރޭގައި ކުރީ ސަރުކާރުން ވިއްކި 500 މިލިއަން ޑޮލަރުގެ ސުކޫކާއި މި ސަރުކާރުން އިންޑިއާގެ ރިޒާވު ބޭންކުން ނެގި 400 މިލިއަން ޑޮލަރުގެ ކަރަންސީ ސްވޮޕް ފެސިލިޓީ ހިމެނެ އެވެ.
