ކުރީ ސަރުކާރުގައި ސްޓޭޓް ބޭންކް އޮފް އިންޑިއާ (އެސްބީއައި) އަަށް ވިއްކާފައިވާ 150 މިލިއަން ޑޮލަރުގެ ޓީބިލުތަކަށް ދައްކަން ޖެހޭ ބާކީ 50 މިލިއަން ޑޮލަރު ދެއްކުން ފަސްކޮށްދޭން ދިވެހި ސަރުކާރުން އިންޑިއާ ސަރުކާރުގައި އެދުނު ކަން، އިންޑިއާގެ އޮފިޝަލުން އަދަދު ނޫހަށް ކަށަވަރުކޮށްދީފި އެވެ.
މި މައްސަލައިގެ ގޮތުން ނަން ނުޖަހާ ގޮތަށް މި ނޫހަށް މައުލޫމާތު ދިން އިންޑިއާގެ މަސްދަރުތަކުން ބުނި ގޮތުގައި، އެ ދަރަނި ރޯލްއޯވާކޮށްދޭން ދިވެހި ސަރުކާރުން އެދުނު ކަމަށެވެ. އިންޑިއާއިން ދިން ޖަވާބުގައި، ވަކި ސަބަބެއް ނުބުނެ، އެ ގައުމުގެ ސަރުކާރުން ވަނީ މި ފަހަރު އެ ދަރަނި ރޯލްއޯވާ ކުރެވެން ނެތް ކަން ދިވެހި ސަރުކާރަށް އަންގާފަ އެވެ.
މީގެ ކުރިން އިންޑިއާ ސަރުކާރުން ވަނީ ކުރީ ސަރުކާރަށް ތިން އަހަަރު ވަންދެން، އަދި މި ސަރުކާރަށް ވެސް މި ދަރަނި ރޯލްއޯވާކޮށްދީފަ އެވެ. މި މުއްދަތުގެ ތެރޭގައި އިންޓްރެސްޓުގެ ގޮތުގައި އެރި 45 މިލިއަން ޑޮލަރު ދެއްކީ އިންޑިއާ ސަރުކާރުންނެވެ.
އެސްބީއައިގެ ދަރަންޏަކީ އެމްޑީޕީގެ ވެރިކަމުގެ ފުރަތަމަ އަހަރު ބަޖެޓު ސަޕޯޓުގެ ގޮތުގައި، އިންޑިއާ ސަރުކާރުގެ މެދުވެރިވެގެން، އެކި ބައިބަޔަށް (ޓްރާންޗުތަަކަށް) އެ ބޭންކަށް ވިއްކި 200 މިލިއަން ޑޮލަރުގެ ޓީބިލުތަކުގެ ދަރަންޏެވެ. އިންޑިއާ ސަރުކާރުން ވަނީ 2020 އިން 2023 އަށް ހިނގި ހަތަރު އަހަރުގެ ތެރޭގައި ރާއްޖޭން އެއްވެސް އަގެއް ނުދައްކާ ގޮތަށް މި ދަރަނި ރޯލްއޯވާކޮށްދީފަ އެވެ.
ނަމަވެސް، މި ސަރުކާރުން ވަނީ ވެރިކަމާ ހަވާލުވުމަށް ފަހު، ޖެނުއަރީ 2024 ގައި އޭރު މެޗުއާ ވާން އޮތް 50 މިލިއަން ޑޮލަރުގެ ޓްރާންޗަށް ފައިސާ ދައްކާ، މި ދަރަނި 150 މިލިއަން ޑޮލަރަށް މަދުކޮށްފަ އެވެ. އެ ފަހަރު ފައިސާ ދެއްކި ނަމަވެސް، އެ އަހަރުގެ މެއިގައި ދައްކަން އޮތް ފައިސާ ދެއްކުން ފަސްކޮށްދިނުމަށާއި އޭގެ ތެރެއިން 50 މިލިއަން ޑޮލަރު ހިލޭ އެހީއަށް ބަދަލުކޮށްދޭން އެދުނެވެ.
ދިވެހި ސަރުކާރުގެ އެދުމަށް އިޖާބަދީ އިންޑިއާއިން ވަނީ 50 މިލިއަން ޑޮލަރު ހިލޭ އެހީއަށް ބަދަލުކޮށްދީ، 2024 ވަނަ އަހަރާއި މިދިޔަ އަހަރުގެ ތެރޭގައި ރޯލްއޯވާކޮށްދީފަ އެވެ. މި ސަރުކާރުން އެދިގެން ރޯލްއޯވާކޮށްދިން މުއްދަތުގެ ތެރޭގައި ވެސް އިންޓްރެސްޓު ދެއްކީ އިންޑިއާ ސަރުކާރުންނެވެ.
އެސްބީއައިއަށް ނުދައްކާ ހުރި 100 މިލިއަން ޑޮލަރުގެ ތެރެއިން 50 މިލިއަން ޑޮަލަރު ދެއްކީ މި އަހަރުގެ މެއި މަހުގަ އެވެ. އަދި، އެންމެ ފަހުން ދައްކަން ޖެހޭ 50 މިލިއަން ޑޮލަރު ދެއްކީ ނިމުނު ހަފުތާގެ ތެރޭގަ އެވެ.
މި ދަރަނި ދެއްކުމަށް ފަހު ފިނޭންސް މިނިސްޓަރު ހަސަން ޒަރީރު ވަނީ މިއީ އެސްޑީއެފް ގައި ހުރި ފައިސާ ބޭނުންކޮށްގެން ދުރާލާ ތައްޔާރުވެގެން ދެއްކި ފައިސާއެއް ކަމަށް ބުނެފަ އެވެ. އެހެން ބުނި ނަމަވެސް މިހާރު ލިބުން ހުރި މައުލޫމާތުން އެނގެނީ ދިވެހި ސަރުކާރުން އެންމެ ފަހު ވަގުތާ ޖެހެންދެން ވެސް ތިބީ ދަރަނި ނުދައްކާ ވާނެ ގޮތެއް ވޭތޯ އުއްމީދުކޮށްގެން ކަމެވެ.
މި ސަރުކާރުގެ ދައުރުުގެ ތެރޭގައި ރާއްޖެ ބަނގުރޫޓުވުމުގެ ހާލަތަށް ނުވެއްޓި، ހަަމަޖެހެވުނު ސަބަބުތަކުގެ ތެރޭގައި އިންޑިއާ ސަރުކާރުން ލިބުނު އެހީތެރިކަން ފާހަގަކޮށްލެވެ އެވެ. ޓީބިލުތައް ދެއްކުން ފަސްކޮށްދިނުމުގެ އިތުރުން އިންޑިއާއިން ވަނީ 2024 ގައި ރިޒާވުގެ ހާލަތު އެންމެ ގޯސްވިއިރު، 400 މިލިއަން ޑޮލަރުގެ ކަރަންސީ ސްވޮޕެއް ހަމަޖައްސައިދީފަ އެވެ. މި ސްވޮޕުގެ މުއްދަތު ހަމަވުމުން އެ ގައުމުން ވަނީ 312.7 މިލިއަން ޑޮލަރުގައި އަގު ކުރެވޭ 30 ބިލިއަން ރުޕީސްގެ އެހެން ފެސިލިޓީ ދޫކޮށްފަ އެވެ.
މިހާރު ވެސް ގްރޮސް ރިޒާވު ގުނަމުން ދަނީ ރުޕީސް ފެސިލިޓީން ނަގާފައިވާ ޑޮލަރުތައް ހިމަނައިގެންނެވެ. އެމްއެމްއޭއިން ހާމަކޮށްފައިވާ ގޮތުގައި މިދިޔަ މަސް ނިމުނުއިރު، ޖުމްލަ ރިޒާވުގައި ހުރީ 643.8 މިލިއަން ޑޮލަރެވެ. މި އަދަދުތަކުން ހިސާބުކުރާއިރު، ރިޒާވުގެ 48 ޕަސެންޓަކީ މި ފެސިލިޓީގެ ފައިސާ އެވެ.
