ޔޭޔޭ ބްރޭންޑުގެ ސީރިއަލް ޕެކެޓުތަކެއްގައި ފޮރުވައިގެން ގިނަ އަދަދެއްގެ ބޭރު ފައިސާ ވަގަށް ބޭރުކުރަން އުޅުނު މައްސަލައެއްގައި ވެލާނާ އިންޓަނޭޝަނަލް އެއާޕޯޓުން ހަ ބިދޭސީން ހައްޔަރުކޮށްފި އެވެ.
ފުލުހުން މީޑިއާތަކަށް ބުނި ގޮތުގައި މިއީ ގަވާއިދާ ހިލާފަށް ބޭރު ފައިސާ ގަނެވިއްކުމުގެ މުއާމަލާތްތައް ހިންގާ ބަޔަކު ހޯދައި، ގާނޫނީ ފިޔަވަޅު އެޅުމަށް ކުރެވެމުންދާ މަސައްކަތުގެ ތެރެެއިން ހިންގި އޮޕަރޭޝަނެއްގައި ހައްޔަރުކުރި ބަޔެކެވެ. އަދި، އެ އޮޕަރޭޝަން ހިންގީ، މިކަން ހުއްޓުވަން އުފައްދާފައިވާ ޓާސްކްފޯހަށް ލިބުނު މައުލޫމާތަކާ ގުޅިގެން ކަމަށް ވެސް ފުލުހުން ބުންޏެވެ.
މި މައްސަލައިގައި ހިމެނޭ މީހުން ވެލާނާ އެއާޕޯޓުން ފުރަން ގޮސް ތިއްބައި، ހުއްޓުވައި، ބަލައިފާސްކުރިއިރު 174,161 ޔޫއެސް ޑޮލަރާއި 56,760 ޔޫރޯ އާއި 1،815 ސްޓާލިން ޕައުން ހިމެނޭހެން ޖުމުލަ 18 ގައުމެއްގެ ފައިސާ ފެނުނެވެ. ފުލުހުން ބުނީ އަތުަލައިގަތް ފައިސާގެ އަގު 3.8 މިލިއަން ރުފިޔާއަށް އަރާ ކަމަށެވެ.
އެންމެ ފަހުން ހައްޔަރުކުރި މީހުންނާއެކީ، ގަވާއިދާ ހިލާފަށް ބޭރު ފައިސާ ގަނެ ވިއްކާ މައްސަލަތަކުގައި ހައްޔަރުކުރިކަން އެނގިފައިވާ ބިދޭސީންގެ އަދަދު ވަނީ 15 އަށް ވުރެ އިތުރުވެފަ އެވެ.
ޑޮލަރުގެ ވިޔަފާރި ކުރާ ހަ ބިދޭސީއަކު ފުލުހުން ހައްޔަރުކޮށްފި
"މި ފަރާތްތަކަކީ ހުއްދަ ދެވިފައިވާ މަސައްކަތުގެ ދާއިރާގެ ބޭރުން ބޭރު ފައިސާ ގަނެ ވިއްކުމުގެ ވިޔަފާރީގައި ހަރަކާތްތެރިވަމުން އަންނަ ފަރާތްތަކެއްކަން ފާހަގަ ކުރެވޭ،" ފުލުހުން ބުނެފައިވެ އެވެ.
ކަޅު ބާޒާރު ހުއްޓުވަން ހިންގާ އޮޕަރޭޝަނުގެ މައުލޫމާތު ދޭން އެންމެ ފަހުން ބޭއްވި ނޫސްވެރިންގެ ބައްދަލުވުމުގައި ހޯމް މިނިސްޓަރު އަލީ އިހުސާން ވިދާޅުވީ 12 ބިދޭސީއެއްގެ މައްސަލަ ބަލަމުންދާ ކަމަށާއި، އޭގެ ތެރެއިން ނުވަ މީހަކު ތިބީ ޑިޓެންޝަނުގައި ކަމަށެވެ. އެކަމަކު އެއީ ފުލުހުންގެ ބަންދުގައި ކަމެއް ނޫނީ އިމިގްރޭޝަން ބަންދުގައި ކަމެއް ސާފެއް ނޫނެވެ.
ހުއްދަ ނެތި ޑޮލަރު ވިއްކާ މައްސަލަތަކުގައި ހައްޔަރުކޮށްފައިވާ ހަ ބިދޭސީންގެ ވަނަވަރު ހާމަކުރަމުން، ފުލުހުން ބުނީ، ތިން އަހަރެއްހާ ދުވަހުގެ ތެރޭގައި މި މީހުންގެ އެކައުންޓުތަކުގައި 1.6 މިލިއަން ޑޮލަރާއި 54 މިލިއަން ރުފިޔާ ދައުރުކޮށްފައިވާ ކަމަށެވެ.
ފުލުހުން ވަނީ ކަޅު ބާޒާރަށް ޑޮލަރު ފޯރުކޮށްދޭ ކަމަށް ތުހުމަތުކޮށް، ނައިޑް ޓްރޭޑިން އާއި އެ ކުންފުންޏާ ގުޅިފައިވާ ކުންފުނިތައް ހުންނަ އޮފީސް ބަލައިފާސްކޮށް، އެކައުންޓުތައް ފްރީޒުކޮށްފަ އެވެ. އަދި މޯލްޑިވްސް މަނިޓަރީ އޮތޯރިތީ (އެމްއެމްއޭ) އިން ވަނީ "އެކްސްޕްރެސް މަނީ އެކްސްޗޭންޖު" ގެ ހުއްދަ ބާތިލުކޮށްފަ އެވެ.
ސަރުކާރުން ޑޮލަރު މައްސަލައިގައި ހަރުކަށި ތަންފީޒީ ފިޔަވަޅުތަކެއް އަޅައިގެން މައްސަލަ ހައްލުކުރަން ނިކުތީ، ޑޮލަރު ތާށިކަން ބޮޑުވެ، ކަޅު ބާޒާރުގައި ޑޮލަރެއް ލިބޭ އަގު 22ރ. އިން މަތިވެ، އޮބިނޯންނާ ހިސާބަށް ކަންކަން ދިޔަ ފަހުންނެވެ. މި މަސައްކަތް ފެށި ފަހުން، ސަރުކާރުން ބުނަނީ، ކަޅު ބާޒާރުގައި ޑޮލަރު ވިއްކާ އަގު ތިރިކުރެއްވިއްޖެ ކަމަށެވެ.
