ވެލާނާ އިންޓަނޭޝަނަލް އެއާޕޯޓު (ވީއައިއޭ) ގެ ޑޮމެސްޓިކް ޓާމިނަލުން ފުރަން ގޮސް ހުރި ދިވެއްސެއް އަތުން ވަޒަނެއްގެ ހުސް ދޯރިއެއް މިއަދު ފެނިއްޖެ އެވެ.
ފުލުހުން ބުނީ މި މައްސަލަ ތަހުގީގު ކުރަމުންދާއިރު، އެ މައްސަލައިގައި ހިމެނޭ ދިވެހި މީހާ މިހާތަނަށް ހައްޔަރުކޮށްފައި ނުވާ ކަމަށެވެ.
"ވެލާނާ އިންޓަރނޭޝަނަލް އެއަރޕޯޓްގެ ޑޮމެސްޓިކް ޓާމިނަލުން ފުރަން ގޮސް ހުރި ދިވެހި ފިރިހެނެއްގެ އަތުން ވަޒަނެއްގެ ހުސް ދޯރިއެއް ފެނިފައިވެއެވެމި މައްސަލައާ ގުޅިގެން މީހަކު ފުލުހުންގެ ބެލުމުގެ ދަށަށް ގެނެސްފައެއް ނުވޭ،" ފުލުހުން ބުންޏެވެ.
ވެލާނާ އިންޓަނޭޝަނަލް އެއާޕޯޓު (ވީއައިއޭ) އަށް ފުރަން ދިޔަ ނެމިބިއާގެ ޓޫރިސްޓެއްގެ ދަބަހުން 2021 ގެ ތެރޭގައި ވަޒަންތަކެއް ފެނިގެން އޭނާ ޑީޕޯޓުކޮށްލި އެވެ. އޭގެ ފަހުން 2023 ވަނަ އަހަރު ކުޅުދުއްފުށީ އެއާޕޯޓަށް ދިޔަ މީހެއް އަތުން ވަޒަނެއް ފެނިގެން ފުލުހުން ތަހުގީގު ކޮށްފައިވެ އެވެ.
މީގެ ކުރިން އެއާޕޯޓުން ފުރަން ދިޔަ ދިވެއްސެއްގެ އަތުން ބްލޭންކް ވަޒަނެއް ފެނިގެން އޭނާ ހައްޔަރުކޮށް ބޮޑު ޖިނާއީ ދައުވާއެއް ވަނީ އުފުލައިފަ އެވެ. ރ. އަލިފުށީ, ފެހިގޭ, އަހުމަދު އަފްލާހު 2008 ގައި އެއާޕޯޓަށް ފުރަން ދިޔައިރު އޭނާ އަތުން ވަޒަނެއް ފެނިގެން ދައުލަތުން އޭނާގެ މައްޗަށް އުފުލީ ހަނގުރާމަވެރި ހަތިޔާރު އަތުގައި ބެހެއްޓި ކަމުގެ ދައުވާ އެވެ.
އަފްލާހު ބުނެފައި ވަނީ އެ ވަޒަނަކީ ސިފައިންގެ ތަމްރީނުތަކެއް ކުރިއަށް ގެންދިޔަ ކ. ކުޑަވިލިނގިއްޔަށް ދިޔަ ދަތުރެއްގައި އެ ރަށުން ހޮވި އެއްޗެއް ކަމަށެވެ. އޭގެ އިތުރުން 2016 ވަނަ އަހަރު ފުލުހުން ހިންގި ޑްރަގް އޮޕަރޭޝަނެއްގެ ތެރެއިން ރ. ދުވާފަރުން، ސިފައިން ތަމްރީނުތަކުގައި ގެންގުޅޭ ބާވަތުގެ ވަޒަނެއް ފެނިގެން ހަތަރު މީހަކު ހައްޔަރު ކުރި އެވެ.
