އާންމު ރައްޔިތުންގެ ހިތްތަކުގައި ބިރުވެރިކަން އުފެދޭ ގޮތަށް މަގުމަތީގައި ނުރައްކާތެރިކޮށް އުޅަނދު ދުއްވާ ފަރާތްތައް ހުއްޓުވައި، އެ ފަރާތްތަކާމެދު ހަރުކަށި ފިޔަވަޅު އެޅުމަށް ދިވެހި ފުލުހުންގެ ހިދުމަތުން ހާއްސަ މަސައްކަތްތަކެއް ފަށައިފި އެވެ.
ފުލުހުން ބުނީ ނުރައްކާތެރިކޮށް ދުއްވާ މީހުން އެ އަމަލުތައް ތަކުރާރުކުރާނަމަ ޓްރެފިކް ގާނޫނާއި ގަވާއިދުތަކުގެ ދަށުން ކުރިން ކުރަމުން އައި ޖޫރިމަނާގެ އިތުރުން، އެއްވެސް އިންޒާރަކާ ނުލައި ޖިނާއީ ތަހުގީގު ހިންގާނެ ކަމަށެވެ.
ނަމަވެސް ނުރައްކާތެރިކޮށް ދުއްވާ ފުރަތަމަ މަރުހަލާގައި ފުލުހުންގެ އިދާރާއަށް ހާޒިރުކޮށް ނަސޭހަތްތެރިވާނެ ކަމަށް ފުލުހުން ބުންޏެވެ.
ފުލުހުން ބުނީ މި މަސައްކަތުގެ ދަށުން ނުރައްކާތެރިކޮށް އުޅަނދު ދުއްވާ ފަރާތްތައް ދެނެގަނެ، އެ ފަރާތްތަކުގެ މައުލޫމާތު ޕްރޮފައިލްކުރުމުގެ މަސައްކަތް މިހާރު ފަށާފައިވާ ކަމަށާއި މި މަސައްކަތުގެ މައިގަނޑު މަގުސަދަކީ މަގުމަތީގެ އަމާންކަން ގާއިމުކޮށް، ނުރައްކާތެރިކޮށް ދުއްވުމުގެ ސަބަބުން ކުރިމަތިވާ ހާދިސާތައް މަދުކުރުން ކަމަށެވެ.
މި ހާއްސަ އޮޕަރޭޝަނުގައި ފުލުހުން ބޮޑަށް ސަމާލުކަން ދޭނީ ބިރުވެރިކަން އުފެދޭގޮތަށް ޒިގްޒެގްކޮށް ދުއްވުމާއި، އުޅަނދަށް ބަދަލުގެނެސް ސައިލެންސަރު އަޑުގަދަކޮށް ދުއްވުމާއި، ހަރު ބިންމަތީގައި ފުރޮޅު ގާނަމުން ދުއްވުމުގެ އަމަލުތަކަށެވެ.
މީގެ އިތުރުން ދުވެލިމަތަ ތަކަށް މަޑުނުކޮށް ބާރު ސްޕީޑުގައި ދުއްވުމާއި، ކަމާގުޅޭ އިދާރާތަކުގެ ހުއްދަ ނުނަގައި ރޭސްޖެހުމާއި ހުނަރުދެއްކުމުގެ އިތުރުން، ނުރައްކާތެރިކޮށް އޯވަޓޭކްކުރުމާއި މަސްތުގެ ހާލަތުގައި ދުއްވާ ފަރާތްތަކާމެދުވެސް ހަރުކަށި ފިޔަވަޅު އެޅޭނެ ކަމަށް ފުލުހުން ބުންޏެވެ.
ނުރައްކާތެރިކޮށް ދުއްވާ އުޅަނދުތައް ހޯދައި، އެ އުޅަނދު ދުއްވި ފަރާތުގެ އިތުރުން އުޅަނދުގެ ވެރިފަރާތާމެދުވެސް ފިޔަވަޅު އެޅުމަށް ވަނީ ހަމަޖެހިފަ އެވެ. މިގޮތުން ހިފަހައްޓާ އުޅަނދުތައް 30 ދުވަހުގެ މުއްދަތަށް ފުލުހުންގެ ބެލުމުގެ ދަށުގައި ބަހައްޓަ އެވެ. އަދި ކަނޑައެޅިފައިވާ މުއްދަތުގެ ތެރޭގައި ވެރިފަރާތުން ހަވާލުނުވާ އުޅަނދުތައް، އުސޫލުތަކުގެ ދަށުން ނައްތާލެވޭނެ ކަމަށްވެސް ފުލުހުން ބުންޏެވެ.
ފުލުހުން އިތުރަށް ފާހަގަކުރި ގޮތުގައި، މިފަދަ ނުރައްކާތެރި އަމަލުތަކުގައި ސަރުކާރުގެ މުއައްސަސާތަކާއި ކުންފުނިތަކުގެ މުވައްޒަފުން ޝާމިލުވާކަން ވަނީ ފާހަގަކުރެވިފަ އެވެ. އެހެންކަމުން، އެ ފަރާތްތަކާމެދު އެޅެންހުރި އިދާރީ ފިޔަވަޅުތައް އެޅުމަށްޓަކައި، އެ މުވައްޒަފަކު މަސައްކަތްކުރާ މުއައްސަސާއަކަށް އެ މައުލޫމާތު ހިއްސާކުރުމުގެ މަސައްކަތްވެސް މިހާރު ދަނީ ކުރަމުންނެވެ.
މަގުމަތީގެ ސަލާމަތާއި ރައްކާތެރިކަން ކަށަވަރުކުރުމަށް ކުރާ މި މަސައްކަތުގައި، ނުރައްކާތެރިކޮށް އުޅަނދުދުއްވާ ފަރާތްތަކުގެ ތެރެއިން އެ އަމަލު ތަކުރާރުކުރާ ފަރާތްތަކުގެ ވަނަވަރު އާންމުކުރަމުން ގެންދާނެ ކަމަށްވެސް ފުލުހުން ބުންޏެވެ.
ފުލުހުން މި ހާއްސަ އޮޕަރޭޝަން ފަށާފައި މިވަނީ ނުރައްކާތެރިކޮށް ވެހިކަލްތައް ދުއްވުން އިތުރުވެފައިވާ ދަނޑިވަޅެއްގަ އެވެ. އެގޮތުން އެފަދަ ވީޑިއޯތައް ސޯޝަލް މީޑިއާގައި ދައުރުވުމުން އެ މައްސަލަތައް ފުލުހުން ބަލާފައިވެ އެވެ.
