އައްޑޫގައި މަސްތުވާތެކެތީގެ ވިޔަފާރި ފުޅާ ދާއިރާއެއްގައި ކުރާ ކަމަށް ފުލުހުން ތުހުމަތުކުރާ އަބްދުﷲ އިބްރާހިމް (އަބުޗާ) ޕެރޯލް ބޯޑުން ދޫކޮށްލައިފި އެވެ.
ދިވެހިރާއްޖެއަށް 98 ކިލޯގެ މަސްތުވާތަކެތި އެތެރެކުރަން އުޅުނު މައްސަލައިގައި 25 އަހަރަށް އަބުޗާ ޖަލަށް ލާން ހުކުމް ކުރީ މިދިޔަ އަހަރުގެ މެއި 19، ގަ އެވެ.
އެ މައްސަލައިގައި އޭނާގެ މައްޗަށް ކޮށްފައި ވަނީ 12.5 އަހަރުގެ ތިން ހުކުމެވެ. ޕެރޯލަށް އޭނާ ޝަރުތު ހަމަވީ 6.5 އަހަރު ޖަލުގައި ހޭދަ ކުރުމުންނެވެ.
އައްޑޫގެ ޑްރަގުގެ ބޮޑެއް ކަމަށް ބުނާ އަބުޗާ 25 އަހަރަށް ޖަލަށް
އޭނާ އިއުތިރާފު އެއްބަސްވުމެއް ހެދީ 98 ކިލޯގެ ޑްރަގު އެތެރެކުރަން އުޅުނު މައްސަލައިގައި ކަމަށް މައުލޫމާތު ލިބިފައިވޭ.
ޕެރޯލް ބޯޑުން އަބުޗާ ދޫކޮށްލާފައިވާކަން މި ނޫހަށް ވަނީ ތަފާތު ތިން މަސްދަރަކުން ކަށަވަރުކޮށްދީފަ އެވެ.
ޖަލުތަކާއި ޕެރޯލްގެ ގާނޫނުގެ 125 ވަނަ މާއްދާގައި ބަޔާންކޮށްފައި އޮންނަނީ މަސްތުވާތަކެތި ވިއްކުމާއި ވިޔަފާރިކުރުމާއި އެ ތަކެތި ދިވެހިރާއްޖެއަށް އެތެރެކުރުމުގެ ކުށް ސާބިތުވެފައިވާ މީހަކަށް ޕެރޯލްގެ ފުރުސަތު ލިބޭނީ އެ މީހަކަށް ކޮށްފައިވާ އެންމެ ދިގު ހުކުމުގެ ދެބައިކުޅަ އެއްބައި ތަންފީޒުކޮށް ނިމުމުން ކަމަށެވެ.
މި ނޫހާ ވާހަކަދެއްކި ފުލުހުންގެ ބައެއް އިސް އޮފިޝަލުން ވިދާޅުވީ މަސްތުވާތެކެތި ޓްރެފިކް ކުރާ މީހުންނާއި ގޭންގު ލީޑަރުންގެ އިތުރުން ވެސް އެފަދަ ބޮޑެތި ކުށްތަކަށް އަރައިގަންނަ މީހުންނަށް އަދަބު ލުއިކޮށްދިނުމާއި ޕެރޯލް ނުދިނުމަށް މީގެ ކުރިން ވެސް ތަކުރާރުކޮށް ސަރުކާރުތަކުގައި އެދޭ ކަމަށެވެ.
އަބުޗާ ދޫކޮށްލާފައިވާއިރު، އޭނާއަކީ އެތައް ކުށެއްގެ ރިކޯޑު އޮތް މީހެކެވެ. އެގޮތުން، 2019 ވަނަ އަހަރު ވެސް ރާއްޖެއަށް މަސްތުވާތަކެތި އެތެރެކުރިކަމުގެ ތުހުމަތުގައި އޭނާ ހައްޔަރުކުރި އެވެ. ނަމަވެސް، އެ މައްސަލައިގެ ތަހުގީގަށްފަހު ކޯޓަށް ފޮނުވުމުން ހަމަ އެ އަހަރުގެ ސެޕްޓެމްބަރުގައި އޭނާ ވަނީ ދޫކޮށްލައިފަ އެވެ.
އޭގެ އިތުރުން، ގޭންގް ރޭޕްގެ މައްސަލައަކާއި މާރާމާރީގެ ދެ މައްސަލައަކާއި ނުރުހުމުގައި ބަދުއަހުލާގީ އަމަލު ހިންގަން އުޅުނު މައްސަލައެއްގެ އިތުރުން، އަމުރަށް ނުކިޔަމަންތެރިވުމުގެ ކުށުގެ ތުހުމަތުގައި ވެސް މީގެ ކުރިން އަބުޗާ ހައްޔަރުކޮށްފައިވެ އެވެ.
ކުށެއްގެ އިސްލާހު (އޮކްޓޯބަރު 6، 2026)
އަބްދުﷲ އިބްރާހިމް ޕެރޯލް ބޯޑުން ދޫކޮށްލީ ގާނޫނާ ހިލާފަށް މި ލިޔުމުގައި ކުރިން ލިޔެވިފައި ވަނީ މައުލޫމާތުގެ ކުށަކުންނެވެ. އޭނާގެ މައްޗަށް ކޮށްފައިވާ ކޮށްފައި ވަނީ 12.5 އަހަރުގެ ތިން ޖަލު ހުކުމެކެވެ. ގާނޫނުގައި ބުނެފައި ވަނީ މަސްތުވާތަކެތީގެ މައްސަލައެއްގައި ކޮށްފައިވާ އެންމެ ބޮޑު ހުކުމުގެ ދެބައިކުޅަ އެއްބައި ތަންފީޒުވުމުން ޕެރޯލަށް ޝަރުތުހަމަވާނެ ކަމަށެވެ. އަބްދުﷲ އިބްރާހިމް ވަނީ ހުކުމުގެ 6.5 އަހަރު ތަންފީޒުކޮށްފަ އެވެ.
