މިއުނިކް (އޮގަސްޓް 19) - ހަފްތާއެއްގެ ތެރޭގައި ދެ މެޗެއްގެ ތެރެއިން، ސިއްހީ ކުއްލި ހާލަތެއް ދިމާވި ބަޔާން މިއުނިކަށް ކުޅޭ ޖަރުމަނުގެ ތަރި، ޖަމާލް މުސިއާލާ، ފަރުވާ ހޯދަނީ ނާރުގެ ބައްޔަކަށް ކަމަށް ބުނެފި އެވެ.
އުމުރުން 23 އަހަރުގެ މުސިއާލާ އަށް އެންމެ ފުރަތަމަ ސިއްހީ ހާލަތެއް ދިމާވެ، ހޭނެތޭ ގޮތްދިމާވާން ފެށީ މިދިޔަ ހަފްތާގެ އަންގާރަ ދުވަހު އެކުވެރިކަމުގެ މެޗެއްގައި ހެއިޑެންހައިމް އަތުން 4-2 އިން ބަޔާން މޮޅުވި މެޗުގަ އެވެ.
އޭގެ ފަހުން، މިދިޔަ ހޮނިހިރު ދުވަހު، ޓެލެކޮމް ކަޕްގައި ބަދަލު ކުޅުންތެރިއެއްގެ ގޮތުގައި ކުޅެން އަރައި، އާރްބީ ލައިޕްޒިގު ކޮޅަށް ލަނޑު ޖެހި މުސިއާލާ އަށް އަނެއްކާ ވެސް އެ މައްސަަލަ ދިމާވެ، ދަނޑުމަތީގައި ބާއްވައިގެން ފަރުވާ ދީފައިވެ އެވެ.
ސިއްހީ ހާލަތެއް ދިމާވެ ދަނޑުމައްޗަށް ވެއްޓުނު މުސިއާލާގެ ހާލު ރަނގަޅުވަމުން އަންނަ ކަމަށް ބަޔާނުން ބުނެފި
އާރްބީ ލައިޕްޒިގާ ދެކޮޅަށް ކުޅުނު މެޗުގައި ސިއްހީ ކުއްލި ހާލަތެއް ދިމާވެގެން ދަނޑުމައްޗަށް ވެއްޓުނު ބަޔާން މިއުނިކްގެ ޖަމާލް މުސިއާލާގެ ހާލު މިހާރު ރަނގަޅުވަމުން އަންނަ ކަމަށް އެ ކްލަބުން ބުނެފި. ރިޕޯޓްތައް ބުނާގޮތުގައި މުސިއާލާއަށް މި މައްސަލަ ދިމާވީ މެޗު ކުޅުނު ވަގުތު ހޫނުމިން ގަދަވުމުގެ ސަބަބުން ހީޓް ސްޓްރޯކެއް ކުރިމަތިވެގެން
އިންސްޓަގްރާމް މެދުވެރިކޮށް މުސިއާލާ ވަނީ އޭނާ އަށް ކުރިމަތިވެފައިވާ ސިއްހީ ހާލަތާ ގުޅޭ މައުލޫމާތު ސަޕޯޓަރުންނާއި މީޑިއާ އަށް ހިއްސާކޮށްފަ އެވެ. އެ ގޮތުން، މުސިއާލާ ބުނެފައިވަނީ، އޭނާގެ ހާލު ރަނގަޅު ކަމަށާއި މިދިޔަ ދުވަސްތަކުގައި އޭނާގެ ކަންކަން ބެލުމަށްޓަކައި މެސެޖުކޮށް ހެދި އެންމެންނަށް ޝުކުރު އަދާކޮށް، ދިމާވެފައިވާ ހާލަތު އިތުރަށް ތަފްސީލްކޮށްދޭން ބޭނުންވާ ކަމަށެވެ.
އެ ގޮތުން، މި ވަގުތު އެނާ ފަރުވާ ހޯދަމުން އަންނަނީ ނާރުގެ ބައްޔަކަށް ކަމަށާއި އެއީ ކުރު މުއްދަތެއްގެ ފަރުވާ އަށް ފަހު ވެސް ރިކަވާވެވޭނެ ކަމެއް ކަމަށް މުސިއާލާ ވަނީ ބުނެފަ އެވެ. އަދި، އެ މައްސަލައިގެ ސަަބަބުން ކުރިމަތިވި، ދެ އެޕިސޯޑެއް އެންމެ ފަހުން ކުޅުނު ދެ މެޗުގައި ހިނގާފައިވާ ކަމަށާއި މިހާރު މަސައްކަތް ކުރަމުން އަންނަނީ ދުވަހުން ދުވަހަށް ކުރަން ޖެހޭ ކަންކަން ބަރާބަރަށް ކުރުމަށް ކަަމަށް މުސިއާލާ ބުނެފައިވެ އެވެ.
ބަޔާނުން 3-1 އިން އާރްބީ ލައިޕްޒިގު އަތުން މޮޅުވި މެޗުގައި، މުސިއާލާ ކުޅެން އެރީ 15 މިނިޓަށެވެ. އޭނާ ވަނީ މެޗުގައި ބަޔާނަށް ގޯލެއް ވެސް ކާމިޔާބުކޮށްދީފަ އެވެ. ގޯލު ޖެހިތާ މާ ލަސްތަކެއް ނުވެ، މުސިއާލާގެ ބޮލަށް އެނބުރުން އައި، ދަނޑު މައްޗަށް ވެއްޓެން ދިޔަ ގަނޑީގައި އޭނާ ހިފެހެއްޓީ، މި ފަހަރުގެ ސީޒަނުގައި ބަޔާނަށް ބަދަލުވި މޮރޮކޯގެ ފޯވާޑް، އިސްމާއިލް ސައިބާރީ އެވެ. ދަނޑުމަތީގައި ބާއްވައިގެން މުސިއާލާ އަށް ކުއްލި ފަރުވާ ދިންއިރު، ފަހުން، އޭނާ ދަނޑުން ފޭބީ މެޑިކަލް އޮފިޝަލުންގެ އެހީގައި އަމިއްލަ އަށް ހިނގައިފައި ގޮހެވެ.
މުސިއާލާ ބުނީ، އޭނާ އަށް ދިމާވާ ކަންތައްތަކުގެ ސަބަބުން ކުއްލިއަކަށް އެކަން ފެންނަ މީހަކަށް ބިރުވެރިކަން އިހުސާސް ކުރެވޭނެކަން އެނގޭ ކަމަށާއި އެކަމަކު، ޑޮކްޓަރުންގެ އެހީގައި މިހާތަނަށް ހެދި ޓެސްޓްތަކުން ވެސް ޔަގީންކުރެވިފައިވަނީ، "ހެލްތު ރިސްކެއް" ނެތްކަމަށެވެ. އަދި، ނިއުރޮލޮޖިސްޓުންނާއި މި ފަދަ ބަލިތައް ތަހައްމަލުކޮށްފައިވާ އެކި ފަރާތްތަކުގެ ތަޖުރިބާއިން އޭނާގެ ކަންކަން ރަނގަޅު ކުރެވޭނެ ކަމުގެ ޔަގީންކަން އެބައޮތް ކަމަށް މުސިއާލާ ވަނީ ބުނެފަ އެވެ.
ދިރާސާ ރިޕޯޓްތައް ބުނާގޮތުން، މުސިއާލާ އަށް މި ދިމާވި ފަދަ ނާރުގެ މައްސަލަތައް މީގެ ކުރިން ބައެއް ކުޅިވަރު އެތުލީޓުންނަށް ކުރިމަތިވެފައިވެ އެވެ.
އިނގިރޭސި ޔޫތު ގައުމީ ޓީމުތަކަށް ކުރިން ކުޅުނު މުސިއާލާ، ޖަރުމަނަށް ބަދަލުވެ، ބަޔާނުގައި މޮޅު ކުޅުމެއް ދައްކަމުން އަންނައިރު، ފާއިތުވި ދެ އަހަރަކީ އަނިޔާގެ ސަަބަބުން އޭނާ އަށް ގިނަ ކަންތައްތަކެއް ދިމާވި މުއްދަތެކެވެ.
އެ ގޮތުން، މިދިޔަ އަހަރުގެ ފީފާ ކްލަބް ވޯލްޑް ކަޕްގެ ތެރެއިން މުސިއާލާގެ ފައިގެ ކުޑަ ހުޅަށް ސީރިއަސް އަނިޔާއެއް ދިމާވެގެން، އޮޕަރޭޝަނެއް ކުރުމަށް ފަހު، ރިކަވާވެގެން ކުޅުމަށް އެނބުރި އައީ މި އަހަރުގެ ޖެނުއަރީ މަހު އެވެ. އެކަމަކު، ފަހުން ވެސް ފަޔަށް އަނިޔާގެ އިތުރު މައްސަލަ ދިމާވެގެން ކުޅުމާ ދުރުގައި މަޑުކުރަން ޖެހުނެވެ. އަލުން ފިޓްނަސް ރަނގަޅުކޮށް، މި ފަހަރުގެ ފީފާ ވޯލްޑް ކަޕްގައި ވާދަކުރި ޖަރުމަނު ޓީމުގައި ހިމެނި މެޗުތަކުގައި ވެސް ކުޅުނެވެ.
