ލަންޑަން (ސެޕްޓެމްބަރު 10) - ދެ ގޯލުގެ ލީޑެއް ނެގި ލީޑްސް ޔުނައިޓެޑް އަތުން ފަހަތުން އަރައި 6-3 އިން މޮޅުވި ޗެލްސީން އިނގިރޭސި ލީގު ކަޕްގެ ހަަތަރު ވަނަ ބުރުން ޖާގަ ހޯދައިފި އެވެ.
ޗެލްސީގެ ދަނޑު ސްޓެމްފޯޑް ބްރިޖުގައި ރޭ ކުޅުނު މެޗުގައި ލީޑްސް އިން ފުރަތަމަ ހާފު ނިންމާލީ އެއް ގޯލު ކުރީގައި އޮވެ އެވެ. އެ ގޮތުން، 23 ވަނަ މިނިޓްގައި ހެރީ ވިލްސަން ދިން ބޯޅައަކުން ލީޑްސް އަށް ލީޑުނަގައިދިނީ ޓަރިކް މުހަރެމޮވިޗް އެވެ. އަދި، ދެ ވަނަ ހާފު ފެށިގެން ދެ މިނިޓް ތެރޭގައި، ބްރެންޑެން އާރޮންސަން ވަނީ ލަނޑެއް ޖަހައި، ލީޑްސްގެ ލީޑުފުޅާކޮށްދީފަ އެވެ.
މެޗުގެ ނަތީޖާ ހަަމަހަމަކުރަން ޗެލްސީން ގާތްގާތުގައި ޖެހި ދެ ލަނޑު ވެސް ކާމިޔާބުކުރީ ކޯލް ޕާމާ އެވެ. އެ ގޮތުން، 53 ވަނަ މިނިޓްގައި ޕާމާ ފުރަތަމަ ލަނޑު ޖެހީ ޕެނަލްޓީ އަކުންނެވެ. އަދި، އޭގެ ދެ މިނިޓް ފަހުން، އިތުރު ލަނޑެއް ޖަހައި ޕާމާ ވަނީ އެ ޓީމަށް ނަތީޖާ ހަަމަހަމަ ކޮށްދީފަ އެވެ.
މެޗުގެ 60 ވަނަ މިނިޓްގައި ޗެލްސީގެ ތިން ވަނަ ލަނޑު ޖެހީ ޕެޑްރޯ ނެޓޯ އެވެ. އަަދި، ޑެނީ ވެލްބެކް ވަނީ މެޗުގެ 65 ވަަނަ މިނިޓްގައި ޗެލްސީގެ ހަތަރު ވަނަ ގޯލު ޖަހައިފަ އެވެ. ޕާމާގެ ދެ ވަަނަ ލަނޑާއި ނެޓޯ އާއި ވެލްބެކް ޖެހި މި ލަނޑުތަކަށް ފުރުސަތު ތަނަވަސްކޮށްދިނީ މޯގަން ރޮޖާސް އެވެ.
ލީޑްސް އިން މެޗުގެ 75 ވަނަ މިނިޓްގައި ޑޮމިނިކް ކަލްވެޓް-ލެވިން ޖެހި ލަނޑުން އުންމީދެއް ހޯދި ނަމަވެސް، އޭގެ ފަސް މިނިޓް ފަހުން، ވަލެންޓިން ބާކޯ ވަނީ ގޯލެއް ޖަހައި ޗެލްސީ އަށް ހަަމަޖެހިލަން ދެ ގޯލުގެ ލީޑެއް ނަގައިދީފަ އެވެ. އިތުރު ވަގުތުގެ ހަތަރު ވަނަ މިނިޓްގައި ޗެލްސީން ވަނީ މެޗުގައި ހަ ވަނަ ލަނޑެއް ޖަހައިފަ އެވެ. މި ލަނޑު ޖަހައިދިނީ ބާކޯ ތަނަވަސްކޮށްދިން ފުރުސަތެއްގައި ވެލްބެކް އެވެ.
މި ފަހަރުގެ ސީޒަނުގައި އިނގިރޭސި ޑޮމެސްޓިކް ތިން މުބާރާތުގައި އެކަނި ކުޅޭ ޗެލްސީން، ލީގު ކަޕްގެ ހަތަރު ވަނަ ބުރުގައި ކުޅޭ މެޗު އޮންނާނީ އަންނަ މަހު އެވެ.
