ލަންޑަން (ސެޕްޓެމްބަރު 7) - އާ ވިސްނުންތަކަކާ އެކު ޗެލްސީން ކުރިއަށްދާއިރު، އިނގިރޭސި ޕްރިމިއާ ލީގުގައި ރޭ އާސެނަލް އަތުން ޗެލްސީ ބަލިވި މެޗުގައި ދަސްވި ކަންކަން ގިނަ ކަމަށް އެ ޓީމުގެ ކޯޗު، ޒަބީ އަލޮންސޯ ބުނެފި އެވެ.
ޗެލްސީގެ ކޯޗުކަމާ ހަވާލުވެ، އަލޮންސޯ އެ ޓީމު ގޮވައިގެން ނުކުތް ފުރަތަމަ ތިން މެޗުން ވަނީ މޮޅުވެފަ އެވެ. އެއީ، ފުލަމް، ލޫޓަން ޓައުން އަދި ބްރައިޓަން ހޯލްްވް އެންޑް އަލްބިއަން އަތުންނެވެ. އާސެނަލްގެ އެމިރޭޓްސް ސްޓޭޑިއަމްގައި ރޭ ޗެލްސީން މޯގަން ރޮޖާސްގެ ލަނޑުން ލީޑުނެގިއިރު، ފުރަތަމަ ހާފުގައި ކައި ހަވާޓްޒް ވަނީ އާސެނަލަށް އެއްވަރުކޮށްދީފަ އެވެ. އަދި، ދެ ވަނަ ހާފުގައި މާޓިން އޮޑެގާޑް ޖެހި ގޯލާ އެކު، ޗެލްސީ ބަލިވީ 2-1 އިންނެވެ.
މެޗަށް ފަހު އޮތް ނޫސްވެރިންގެ ބައްދަލުވުމުގައި އަލޮންސޯ ބުނީ، ޗެލްސީ ގޮވައިގެން އޭނާ ކޮންމެ މެޗެއްގައި ވެސް ނުކުންނާނީ ވީ އެންމެ ރަނގަޅަށް ވާދަކުރުމަށް ކަމަށެވެ. އެ ގޮތުން، އާސެނަލާ ދެކޮޅަށް ކުޅެން އަރައި ފުރަތަމަ މިނިޓުން ފަށައިގެން ޑިފެންސް ކުރުމަކީ ރަނގަޅު ވިސްނުމެއް ނޫން ކަމަށާއި އެހެންވެ، ފުރަތަަމަ ވެސް ބޭނުންވީ ކުރިއަށް ޖެހިގެން ކުޅުމަށް ކަމަށް އަލޮންސޯ ވަނީ ބުނެފަ އެވެ.
"އެނގޭ މިހެން ކުޅޭއިރު އަހަރެމެންނަށް އުނދަގޫތަކެއް ހުންނާނެކަން، ގޯސްތަކެއް ވެސް ހެދޭނެކަން. އަހަރެމެން މި ދަނީ ދަސްކުރަމުން. މިއީ ލީގުގައި އަހަރެމެންގެ ތިން ވަނަ މެޗު. އާ ފެށުމެއްގެ ތެރޭގައި މި ތިބެވެނީ. މިއީ ޗެލްސީ އަށް ވެސް އާ ކަންތައްތަކެއް. އަހަރެން ވަރަށް އުފަލުން މި ހުރީ ފެނުނު ފައިޓިން ސްޕިރިޓް ރަނގަޅު. ކުރެވޭނެ ހުރިހާ ކަމެއް އެންމެ ފަހު ވަގުތާ ހަމައަށް ޖެހެންދެން ކުރިން،" އަލޮންސޯ ބުންޏެވެ.
"ވަރަށް ގިނަ ކަންކަން މި މެޗުން ވެސް ދަސްވި،"
ކުރިން ރެއާލް މެޑްރިޑާއި ބަޔާ ލެވަކޫސަނަށް ކޯޗުކޮށްދިން އަލޮންސޯ ބުނީ، އާސެނަލުން ވަރަށް ރަނގަޅަށް ޗެލްސީގެ ބަލިފައިތަން ދެނެގަނެގެން މެޗު ކުރިއަށްގެންދިޔަ ކަމަށާއި ޓީމެއްގެ ގޮތުގައި މަސައްކަތް ކުރަން އެ ޓީމަށް ފަސޭހަތަކެއް ހުރި ކަމަށެވެ.
"އާސެނަލުން ހުރިހާ ގޮތަކުން މަސައްކަތް ކުރި، އެ ޓީމުގެ ދެ ވަނަ ލަނޑު ހަގީގަތުގައި އަހަރެމެންނަށް ވިސްނުންތެރިކަމާ އެކު ކުޅުނު ނަމަ ހުއްޓުވޭނެ. އެކަމަކު އެ ފަދަ ކަންކަމަކީ އެކުގައި ކުޅެގެން ކުރިއަށް އޮތްތަނުގައި ޑިފެންސްކުރެވޭނެ ކަންކަން،" އަލޮންސޯ ބުންޏެވެ.
އޭނާ ބުނީ އަނިޔާގައި ތިބި ކުޅުންތެރިން އެނބުރި ޓީމާ ގުޅުމާ އެކު، މިހާރު ދިމާވާ ބައެއް މައްސަލަތަކަށް ހައްލު ގެނެވޭނެ ކަމަށެވެ.
ޗެލްސީން ދެން އެންމެ އަވަހަށް ކުޅޭ މެޗުގައި ބައްދަލުކުރާނީ އިނގިރޭސި ލީގު ކަޕްގައި ލީޑްސް ޔުނައިޓެޑާ ދެކޮޅަށެވެ.
