މިދިޔަ އޮގަސްޓް 27، ވަނަ ދުވަހު ހިޔާ ޓަވަރެއްގެ އެޕާޓްމަންޓެއްގެ ބެލްކަނީގައި ބަދުއަހްލާގީ އަމަލު ހިންގި ކަމަށް ބުނާ މައްސަލައެއްގައި ހިމެނޭ ކަމަށް ތުހުމަތުކުރެވޭ ދެ މީހުން މިއަދު ހައްޔަރުކޮށްފި އެވެ.
ފުލުހުން ބުނީ މި މައްސަލައާ ގުޅިގެން ހައްޔަރުކުރީ 36 އަހަރުގެ ދިވެހި ފިރިހެނަކާއި 25 އަހަރުގެ ދިވެހި އަންހެނެއް ކަމަށެވެ. އެ ދެ މީހުންގެ ބަންދާމެދު ގޮތެއް ނިންމުމަށް ކޯޓަށް ހާޒިރުކުރުމުން ފަސް ދުވަހަށް ބަންދުކޮށްފައިވާ ކަމަށް ފުލުހުން ބުންޏެވެ.
މި މައްސަލައާ ގުޅޭ ވީޑިއޯ ސޯޝަލް މީޑިއާގައި ދައުރުވާން ފެށުމުން އެ މައްސަލަ ފުލުހުން ބަލަން ފެށި އެވެ. އެއަށްފަހު އެ މައްސަލައިގައި ހިމެނޭ އެޕާޓްމަންޓާއި އެ މީހުން ދެނެގަތުމުގެ މަސައްކަތް ފުލުހުން ދިޔައީ ކުރަމުންނެވެ.
ފުލުހުން ބުނީ މި މައްސަލަ ތަހުގީގު ކުރަމުންދާ ކަމަށެވެ. މައްސަލައާ ގުޅޭ އިތުރު ތަފްސީލެއް އަދި މައްސަލައިގައި ހިމެނޭ މީހުންގެ ވަނަވަރެއް ފުލުހުން ހާމަކޮށްފައެއް ނުވެ އެވެ.
