މާލެ ސްކޭޓް ޕާކް ތޮށިގަނޑުގެ ހިލަ ގާތަކުގެ ތެރޭގައި ތާށިވި ފިރިހެނަކު މިއަދު ސަލާމަތްކޮށްފި އެވެ.
ފުލުހުން ބުނީ ހަވީރު 17:16 ހާއިރު މިކަމުގެ ރިޕޯޓް ލިބުމާއެކު އެ ސަރަހައްދަށް އެމްއެންޑީއެފް ފަޔާ އެންޑް ރެސްކިއު އާއި ފުލުހުން އެޓެންޑުވެ އެ މީހާ ސަލާމަތްކޮށްގެން ފަރުވާ ދިނުމަށް އައިޖީއެމްއެޗް ހޮސްޕިޓަލަށް ގެންގޮސްފައިވާ ކަމަށެވެ.
އެ ސަރަހައްދުން އަދަދު އަށް މައުލޫމާތު ދިން މީހުން ބުނާ ގޮތުގައި އެ މީހާ ހިލަ ގާތަކުގެ ތެރޭގައި ތާށިވެފައި އޮތްކަން އެނގުނީ އޭނާ ހަޅޭއް ލަވާ އަޑަށެވެ. ބެލެވޭ ގޮތުގައި އޭނާ ގާތަކުގެ ތެރޭގައި ތާށިވެފައި އޮންނަތާ އެތައް ގަޑިއިރެއް ވެފައިވާ ކަމަށް ވެސް މި ނޫހަށް މައުލޫމާތު ދިން މީހާ ބުންޏެވެ.
"އެ މީހާ ހަޅޭއް ލަވާ އަޑަށް އެތާނގައި ތަށިވެފައި އޮތްކަން އެނގުނީ. އެއާއެކު އެމްއެންޑީއެފް އާއި ފުލުހުންނަށް ރިޕޯޓްކޮށްގެން އައީ. އޭނަ އެތާ ތާށިވެފައި އޮންނަތާ އެތައް ގަޑިއިރެއް ވާނެ،" މައުލޫމާތު ދިން މީހާ ބުންޏެވެ.
މި ހާދިސާ ހިނގައިދިޔަ ގޮތް ފުލުހުން ތަހުގީގު ކުރަމުންދާ ކަމަށް އެ މުއައްސަސާއިން ބުންޏެވެ.
