ކުރީގެ ރައީސް އަބްދުﷲ ޔާމީންގެ ސިޔާސީ ޕާޓީ، ޕީއެންއެފްގެ މެމްބަރުންނަށް ނޭނގި އެ ޕާޓީން ވަކިކުރަމުންދާ ކަމަށް ތުހުމަތުކޮށް، އިލެކްޝަންސް ކޮމިޝަންގެ ރައީސްގެ މައްޗަށް ޖިނާއީ ތަހުގީގެއް ހިންގުމަށް އެދި މިއަދު ހުށަހަޅަން ނިންމައިފި އެވެ.
ޕީއެންއެފްގެ ސެކްރެޓަރީ ޖެނެރަލް އަދި ކުރީގެ މިނިސްޓަރު މުހައްމަދު މަލީހު ޖަމާލު އެކްސްގައި ކުރެއްވި ޕޯސްޓެއްގައި ވިދާޅުވީ އިލެކްޝަންސް ކޮމިޝަންގެ ކަންކަންވަނީ ހައްދުން ނައްޓާފަ ކަމަށާއި ޕީއެންއެފްގެ މެމްބަރުންނަށް ނޭނގި ޕާޓީން ވަކިކޮށްފައިވާ މިހާރު ސާބިތުވެއްޖެ ކަމަށެވެ.
"[އެހެންވެ] އީސީގެ ރައީސްގެ މައްޗަށް ޖިނާއީ ތަހުގީގެއް ހިންގާ ދިނުމަށް އެދި މާދަމާ [މިއަދު] 2 ޖަހާއިރު ޕޮލިހަށް ހުށަހަޅާނަން. ތަކުރާރުކޮށް ނަސޭހަތްދީ އިސްލާހު ނުވި،" މަލީހު ވިދާޅުވި އެވެ.
މަލީހުގެ މި ތުހުމަތުތަކާ ގުޅިގެން، 'އަދަދު' ނޫހަށް މައުލޫމާތު ދެއްވަމުން އިލެކްޝަންސް ކޮމިޝަންގެ ރައީސް މުހައްމަދު ޝަކީލް ވަނީ އެ ތުހުމަތުތައް މުޅިން ދޮގުކުރައްވާފަ އެވެ.
އޭނާ ވިދާޅުވީ އިލެކްޝަންސް ކޮމިޝަންގެ ނިޒާމު ހަމަޖެހިފައިވާ ގޮތުން، މީހަކަށް ނޭނގި އެހެން މީހަކު ޕާޓީއަކަށް ނުވެއްދޭނެ ކަމަށާއި އަދި ވަކިވެސް ނުކުރެވޭނެ ކަމަށެވެ.
"އީސީގެ ނިޒާމު މިހާރު ހަމަޖެހިފައިވާ ގޮތުން މީހަކަށް ނޭނގި މީހެއް ޕާޓީއަކަށް ނުވެސް ވެއްދޭނެ އަދި ވަކިވެސް ނުކުރެވޭނެ. މަލީހު ވިޔަސް އަދި އެހެން މީހެއް ވިޔަސް ޕަބްލިކް އެޓެންޝަން ހޯދަން މިފަދަ ސާބިތު ނުހިފޭ ވާހަކަ ނުދެއްކުމަށް ދަންނަވަން،" ޝަކީލް ވިދާޅުވި އެވެ.
ޕީއެންސީއަށް ވަގަށް މެންބަރުން ވައްދާފައިވާ ކަމަށް މީގެ ކުރިން ވެސް ތުހުމަތު ކުރެވިފައިވާއިރު، އެ މައްސަލަތައް ބަލައި، ފިޔަވަޅު އަޅާފައެއް ނުވެ އެވެ.
