އިދިކޮޅު މޯލްޑިވިއަން ޑިމޮކްރެޓިކް ޕާޓީ (އެމްޑީޕީ) ގެ އެކްޓިވިސްޓު މުހައްމަދު ޝާމިން މިއަދު ހައްޔަރުކޮށްފި އެވެ.
އޭނާ ހައްޔަރުކޮށްފައި ވަނީ ވެލާނާ އިންޓަނޭޝަނަލް އެއާޕޯޓުން ކަމަށް އޭނާގެ ލޯޔަރުންގެ ޓީމުން މި ނޫހަށް މައުލޫމާތު ދިނެވެ.
ޝާމިން ހައްޔަރުކުރުމަށް ދެއްކި ކޯޓު އަމުރުގައި އޭނާ ހައްޔަރުކުރި ސަބަބެއްގެ ގޮތުގައި ބަޔާންކޮށްފައި ވަނީ އޯގަސްޓު 28، ގެ ރޭ އެމްޑީޕީން ކުރިއަށް ގެންދިޔަ މުޒާހަރާގެ ތެރެއިން ޗާންދަނީ މަގާއި ދީދީ ގޯޅިއާ ގުޅޭ ކަންމަތީގައި މަގު ބަންދުކުރުމަށް ފުލުހުން ޖަހާފައި ހުރި ބެރިކޭޑު ހުރަސްކޮށް ބަންދުކޮށްފައިވާ ސަރަހައްދަށް ވަދެފައިވާ ކަމަށް ތުހުމަތުކުރެވޭ މައްސަލައިގައި ކަމަށެވެ.
އޭނާއާ ދެކޮޅަށް ހުރި ހެކީގެ ގޮތުގައި ބަޔާން ކޮށްފައި ވަނީ، ސީނަށް ދިޔަ ފުލުހުންގެ ބަޔާނާއި ސީސީޓީވީ ސްނެޕްޝޮޓުތަކުގެ އިތުރުން އިންޓެލިޖެންސް ރިޕޯޓެކެވެ.
ޝާމިން ހައްޔަރުކޮށްފައިވާއިރު، މީގެ ކުރިން މެއި މަހުގެ ތެރޭގައި ވެސް ފުލުހުން އޭނާ ހައްޔަރުކޮށް ބަންދުގައި ބެހެއްޓި އެވެ. އެފަހަރު އޭނާ ހައްޔަރުުކުރީ ނޫސްވެރިންގެ ހައްގުގައި މާލޭގައި ކުރި މުޒާހަރާތަކުގެ ތެރެއިންނެވެ.
