އިސްލާމުންގެ މުގައްދަސް ބިން މައްކާއަށް މިދިޔަ އަންގާރަ ދުވަހު ޑްރޯން ހަމަލާއެއް އަމާޒު ކުރީ ޔަމަނުގެ ހޫތީން ކަމަށް ރާއްޖޭގެ ހުކުރު ހުތުބާގައި މިއަދު ބުނެފި އެވެ.
ހޫތީން މައްކާއަށް ދޭން އުޅުނު ޑްރޯން ހަމަލާއެއް ހުއްޓުވާފައިވާ ބުނީ ސައުދީ އަރަބިއްޔާއިންނެވެ. ނަމަވެސް ހޫތީން އެކަން ދޮގުކޮށް، އެއީ ސައުދީ އަރަބިއްޔާއިން އުފެއްދި ވާހަކަތަކެއް ކަމަށް ވަނީ ބުނެފަ އެވެ.
އިސްލާމިކް މިނިސްޓްރީ އިން ތައްޔާރުކޮށް ރާއްޖޭގައި މިއަދު ކިޔާފައިވާ ހުކުރު ހުތުބާގައި ބުނީ މައްކާ އާއި މަދީނާގެ ހުރުމަތް ކަނޑައި ހޫތީން ހަމަލާތަކެއް ދެމުންދާ ކަމަށާއި އެކަން ހަރުކަށި އިބާރާތުން ކުށްވެރިކުރާ ކަމަށެވެ.
"... ހުރުމަތްތެރި ކުރައްވާފައިވާ މާތްވެގެންވާ މައްކާ އާއި މަދީނާގެ ހުރުމަތް ކަނޑައި ހޫތީން ދެމުންދާ އަނިޔާވެރި ލާއިންސާނީ އުދުވާނީ ހަމަލާތަކާއި އިންޒާރުތައް ހަރުކަށި އިބާރާތުން ކުށްވެރި ކުރަން،" ހުތުބާގައި ބުންޏެވެ.
ރާއްޖެއަކީ ސައުދީ އަރަބިއްޔާއިން ހޫތީންނާ ދެކޮޅަށް އުފައްދައިގެން އުޅޭ މެރިޓައިމް ޑިފެންސް ކޯލިޝަނުގެ މެންބަރެކެވެ. އެ ކޯލިޝަނާ ގުޅެން ރާއްޖޭގެ ގާނޫނު ހަދާ މަޖިލީހުން ވަނީ މިދިޔަ މަހު ފާސްކޮށްފަ އެވެ.
އޭގެ އިތުރުން، "ހޫތީންގެ ހަމަލާތަކުން" މައްކާ އާއި މަދީނާ ސަލާމަތް ކުރަން މިއަދުގެ ހުތުބާގައި ދުއާއެއް ވެސް ކުރި އެވެ.
"ހައްދަވާ ބޮޑުކުރެއްވި ރަސްކަލާކޮ. މާތްވެގެންވާ މައްކާ އާއި މަދީނާ އާއި އެތަންތަނުގެ އަހުލުވެރީންނަށް އަނިޔާވެރި ހޫތީން ދެމުންދާ އުދުވާނީ ހަމަލާތަކުން ރައްކާތެރި ކުރައްވާ ހިމާޔަތް ކުރައްވާނދޭ،" ހުތުބާގައި ބުނެފައިވެ އެވެ.
ހޫތީންނަކީ ޔަމަނުގެ ސަރުކާރާ ދެކޮޅަށް ހަނގުރާމަ ކުރަމުންދާ ހަތިޔާރު އެޅި ޖަމާއަތެކެވެ. އެ ޖަމާއަތުގެ އަސްލު ނަމަކީ "އަންސާރު ﷲ" އެވެ. އެއީ ޝިއައީ ޖަމާއަތެކެވެ. ހޫތީން ޔަމަނުގެ ސަރުކާރާ ދެކޮޅަށް ހަމަލާތަކެއް ދީ ވެރި ރަށް ސަނާއިން ސަރުކާރު ބޭރު ކުރި އެވެ.
ސައުދީ އާއި ހޫތީންނާ ދެމެދު މައްސަލަ ޖެހި ހަމަލާ ބަދަލު ކުރަން ފެށީ ސަނާ އެއާޕޯޓަށް ސައުދީން ހަމަލާ ދިނުމުންނެވެ. އެއަށްފަހު ހޫތީން ވަނީ ސައުދީ ބައެއް އެއާޕޯޓުތަކާއި ޕޯޓުތަކާއި ތެޔޮ އުފައްދާ ކާރުހާނާތަކަށް ހަމަލާދީފަ އެވެ.
